29.08.2020 
德國足協聯賽（第六級） 第 2 週
Offenburger FV - SF Elzach-Yach
Karl-Heitz-Stadion
賽果： 5:1  (2:1)
入場人數： 256 人
門票： €7 (特惠 €5)
更多相片

自三月疫情開始去到六月慢慢緩和時，我地去左三個國家睇波。德國國內近幾個星期都開始放寬「有身體接觸運動」既限制，各地都開始有唔同既友誼賽，仲搞下鄉下地區盃賽咁熱下身，而各州同時都可以自己訂立可入場人數。

例如我地住既 Hessen 就可以比 250 人入場睇波，不過我地友誼賽無咩興趣。等到而家有啲低組別聯賽重新開 league，我地就南下去近 Freiburg 同法國邊境既 Offenburg 度睇返場 Verbandsliga。當地有個幾特別既規則，就係同行既人當一人計！

由法蘭克福出發大約兩個零鐘車程，係球場外就有個停車場，落車後行 10 步都唔洗就到球場門口！入場後要填個人資料，如果場內球迷後來確診既話都可以追蹤其他人。 係歐洲越耐就越注重私隱，可以唔比個人資料既話我都唔會比。而家連去餐廳食飯都要填表，不過係德國都仲對啲人處理資料有信心既…

除左要填資料，其餘時間都完全唔似有疫情！場內一切正常，唔洗戴口罩，保持距離就 ok。大家可以好正常咁睇波！！就連場內既餐廳仔都坐滿哂，我諗大家都好掛住可以入場睇波既日子。 聽匈牙利朋友講，佢隊波降左班，入場人數反而多左成倍。

雖然場內無咩年輕德國仔，又唔多人，但 OFV 有班酒肉球迷組織企係北看台間唔中其下歌幫球隊打氣。佢地既死敵係鄰市 Kehl。 今季開 league OFV 第一場已經遇上死敵，入場人數有近五百人！

OFV 球場無射燈，即係平時唔可以用黎踢夜波。佢地係地區盃賽遇過唔少附近既大球隊，仲有如果佢地成功升班的話，有機會係第五級聯賽遇上 Stuttgarter Kickers 之流既球隊，所以作客球迷區係必須既！

Offenburg 係德法邊境附近，場內除左賣普通德國腸，仲有 Merguez！Merguez 腸發源地係北非，成份主要係牛肉同羊肉，配上特制調味料，係法國好愛歡迎！ 德國買到既 merguez 同法國版既完全唔同味，今次係球場食到既都係一般般，一來味道唔夠重，二來佢燒得唔夠 lone!

今場波出乎意料地好睇，上半場攻勢都幾平均。客隊剛剛由第七級聯賽因為武肺聯賽腰斬而升班，唔知夠唔夠班踢高一級既聯賽呢？ 客隊先入第一球，但係去到下半場主隊禁住黎攻，入多三球完場！

完場後，我地就開車去法國睇多場法國第四級聯賽，順便去法國超市買餸～～

都係要問一句，到底幾時回復正常呀？？而家傳緊職業聯賽可能可以開放比球迷入場，但只會提供座位同唔會賣啤酒。 我諗黎緊我地都唔會睇德甲乙丙，專心開發鄉下球隊。