07.08.2020
拉脫維亞足球甲組聯賽 第 13 週
Riga FC - FK Jelgava
Skonto stadions
賽果： 3:0 (2:0)
入場人數：800
門票：€7
更多相片

去到拉脫維亞首都，首先我地去左國家隊主場，然後就直接去到第二個比較重要既球場－Riga FC 主場。

Riga FC 主場 Skonto Stadium 可以話係位於市中心，有唔少巴士必經之地。離我地既酒店只需五分鐘路程，由房入面直情可以望到球場既射燈！

唔係成日都可以係同一個比賽週一次過去哂兩個 Riga 既大球場，錯過左今個比賽週，就要等十一月先再有呢個機會，所以今次對我地黎講係機不可失，唔想冬天北上！

頭場睇完 FK Metta 之後，球證一吹雞我地就直奔出口等巴士去 Skonto Stadium，需時大約二十分鐘。 有諗過搭的士或者叫當地 Uber (Bolt) ，但呢兩日係市中心成日見塞車，我諗搭的士都唔會快得幾多。 好好彩巴士好快就黎，路上亦都唔算特別塞，落車後急步去走到球場。最後開波後 10 分鐘先成功入場搵到自己個位坐低。

以氣氛黎講，呢場對比起 FK Metta 正常好多。平時都有近千人入場，今次我地坐既看台都幾乎爆滿！不過又唔係正常既爆滿！ 雖然拉脫維亞已經無限聚令，但對於大型活動都仲有啲限制，要保持距離。球場每兩行就有紅膠帶封左，唔識既人要隔位坐。球場內有保安不時走入看台叫啲人坐開啲。

呢個球場得 2.5 個看台，點後係 2.5? 主隊球迷組織企既看台得大半個，另一半係球員更衣室入口同奧運體育館。而另一邊龍門後面就只係鐵絲網掛上廣告布。 早兩星期政府突然收緊限制唔比球迷入場，球隊就拆左塊廣告布比球迷係場外睇波。

Riga FC 有球迷組織企係龍門後面打氣，佢地打鼓拍手叫足 90 分鐘（淨係普通打氣拍子，無咩歌唱），對我地黎講都係久違既感覺。有人話我地知，佢地既球迷組織大部份都唔係本地人，而係俄羅斯人。

我地都唔係好理解點解拉脫維亞好似對足球無咩興趣咁。可能佢地無啲屬於自己城市既球隊？ Riga FC 係以首都命名，但呢隊波其實係六年前先正式註冊。球隊既「前身」係曾稱霸拉脫維亞聯賽既 Skonto FC。係足球界消失得既都係因為財政問題，導致球隊係 2016 年正式破產完完全全解散消失。

客隊 FK Jelgava 來自國家中部，我就唔識呢個城市啦…. 但今場都有幾個作客球迷入面叫人口號打氣。

我地入場時 Riga 已經領先一球，好在後來都見到兩個入波～ 每次入波，我地呢個看台都會噴乾冰。去到半場，仲有 DJ 係我地前面打碟，仲有乾冰表演….

完場時已經十點，所有餐廳已經關門，好在場外有小店賣野食，我地用兩歐買左塊軟 pizza 黎做我地既晚餐！返到酒店仲有早餐立返黎既兩隻蛋～ 五分鐘後就返到酒店，睇住球場熄射燈就去訓！

去埋呢次旅行真係唔知下次幾時再有波睇。德國都開始慢慢放寛緊大型活動人數限制，不過職業聯賽已經講明開季就算球迷可以入場都唔會有企位同唔可以賣啤酒。我地只好放眼去睇低組別聯賽….