07.08.2020
拉脫維亞足球甲組聯賽 第 13 週
FK Metta - BFC Daugavpils
Daugava Stadium
賽果： 1：4 （0：1）
入場人數：413
門票： €4
更多相片

相隔一個月左右，我地再次飛到波羅的海。最主要原因當然係去睇波，加上波羅三國疫情自六月尾都開始穩定，確診數字極低，無限聚令又唔洗戴口罩，係歐洲黎講係係第一批回復正常既國家。

六月尾睇機票，見到 Air Baltic 話七月前買機票既話可以免費改期。當時其實仲心大心細，因為拉脫維亞政府同足總啲規定仲有變化。一時又話可以一千人入場，一時又話唔限人數，一時又話限二百人。不過見可以改機票，如果今次去唔成，十一月仲有一次機會可以係首都 Riga 一口氣去哂兩個重要既球場。就係咁，訂左機票同酒店去 Riga。

有無限聚令都好，我地都想預先買定波飛，有咩變化都起碼唔洗驚去到門口先買唔到飛入唔到場。 好順利係出發前係網上面搶到飛～ 去到八月六號我地又一早出發去機場，飛兩個鐘到達拉脫維亞既首都。

當地普遍黎講無哂限制，主要叫人保持兩米距離，同埋搭公共交通工具無得同司機買飛，一定要去便利店買。呢啲時候真係要做好準備先好出發去旅行，到達後我地先係便利店買 5 日票先去搭巴士，上車後見到好多遊客咩都唔知咁衝上車想同司機買飛，搞到要落車去搵便利店又要等多班車。

到埗後第一日無波睇，好好做一日遊客。第二日都仲有成日玩，去到四點幾先要出發去球場。由市中心搭巴士大約二十分鐘左右，係正球場門口落車。離遠就已經見到好靚既球場射燈！

Daugava 球場本來係一個有四面看台既運動場，原先係國家隊既場地。近年因為翻新，國家隊搬到 Riga FC 主場 (Skonto Stadium）暫用。雖然現時只有三面看台，但都已經符合歐洲足協既標準，國家隊亦都自 2018 年重反呢個球場出賽。今場波既主隊 FK Metta 就係現時另一個球場租戶。

主隊既正名其實係 FS Metta/Latvijas Universitāte （FS Metta/LU），FS Metta 係足球學校，而 LU 就係拉脫維亞國家大學，自 2007 年兩隊球隊合併左，簡稱 FK Metta。拉脫維亞聯賽好多都係足球學校或者大學球隊，本來覺得幾得意，但諗落其實都正常。 大學有錢，加上足球學校又可以培訓球員～客隊同樣都係足球學校，來自近立陶宛同白俄羅斯邊境地區。

上半場場波勁無聊，無咩水準可言。遠處聽到有班球迷係度為主隊打氣，所以下半場買左件三文治就走左過去佢地附近睇下係咩類型既人。 呢個球迷組織有大約十個人，有一家大細，有後生仔。 可能佢地係 LU 畢業好愛母校，又愛球迷文化，所以整哂旗同 tshirt 黎為球隊助陣。 雖然佢地唔係唱足90 分鐘，但佢地有唔同既歌同口號，帶起埋啲小朋友一齊唱。可惜天公不造美～ 佢地要慘敗 1：4。

一完場我地就要趕去下一場波去睇 Riga 另一個大球場～ 好開心可以係呢個咁靚既球場度係新國家打卡！