12.07.2020
愛莎尼亞足球甲組聯賽 第 12 週
Nõmme Kalju FC - JK Tallinna Kalev
Hiiu kunstmurustaadion
賽果： 2:0 (2:0)
入場人數： 407
門票： 5€ 
更多相片

難得黎到愛莎尼亞，我地當然唔可以只睇一場波啦！

星期日訓夠食飽後就出發去市內既一個皇宫花園 Kadriorg 散步，然後向海邊出發。Tallinn 係沿海城市，城市北部有個碼頭可以搭船去瑞典，芬蘭同埋俄羅斯。 但因為疫情現時只有船去芬蘭～

今日去天氣好過尋日好多，氣溫回暖到 18 度左右，加埋猛烈既太陽，終於令我地有返啲夏天既感覺。 係海邊買左個雪糕就坐低曬下太陽～ 曬左大半個鐘就慢慢起程返去市中心轉車去 Nomme 區睇波。

由市中心搭巴士去 Nomme 既車程需要大約20 分鐘，落車後要穿過一個公園加住（高級）住宅區先到球場，大約 15 分鐘路程。個公園睇落普普通通咁，行到一半見到有兩個超巨型既「滑梯」，行近啲睇發現原來係用滑雪用既。後來上網睇波先知呢個公園冬天時係一個滑雪場！但果兩條滑梯睇落勁危險囉… 木造好似危樓咁。

去到球場門口見到有架來自德國既車，即係我地仍然唔係唯一一個山長水遠黎睇波既人～呢個蚊型球場同尋日個球場完全無得比，入場後感覺去左盧森堡啲 family club 睇波咁。一邊係樹，另一邊見到幾間屋，再另一邊係臨時鐵通看台，而主看台就係一個可容納大約一至二百人既有蓋看台。

原先我地先坐係臨時看台睇波，但坐低無耐就見到遠處有舊黑雲過緊黎，好在係主看台下仲有位剩，可以等場雨過左先返去曬太陽～ 我地身邊有兩班德國人，佢地都係由德國揸車過黎，仲要朝早已經睇左一場乙組波….

外號粉紅豹既 Nomme Kalju 有個迷你球迷組織，成場波都有幫自己隊波打氣。只要佢地保持水準既話就有機會去踢歐霸外圍賽！ 我諗呢個亦都係佢地有兩個臨時看台既原因；想係自己個球場出賽既話，個球場就一定要滿足到歐洲足協既要求，唔係就好可能都係要去 Flora 個球場出賽。 不過呢個球場係仿真草場，唔知又乎唔乎合要求呢？

睇住愛莎尼亞啲球迷歷史，有唔少球隊都係二戰後因為參加過唔同既足球聯賽，包括本地聯賽同埋蘇聯既球賽，然後去到近期都重組球場加入愛莎尼亞聯賽。客隊都係 2018 年先升班上甲組，而主隊就參賽甲組後就從未降過班。

上半場粉紅豹係完上半場前入左兩球波， 呢兩球波就係全場既精華。完場後，我地搭車去到中央火車站附近食餐好既黎慶祝愛莎尼亞之旅好完美咁完結。

三個星期後我地再向北出發！