11.07.2020
愛莎尼亞甲組聯賽 第 12 週
FC Flora Tallinn - Paide Linnameeskond
Lillekula Arena
賽果： 3:1 （0:0）
入場人數： 714 人 （約 20 名作客球迷）
門票：5€ （預售，自由座）
更多相片

呢個 trip 本來係用黎避開歐國盃無聯賽睇，突登搵北歐附近地區去睇聯賽。年頭訂完香港就即刻訂埋去愛莎尼亞，最後香港去唔成，好擔心今次會好似香港咁最後要取消。

最後雖然唔洗取消，但個行程都改左三次。第一次係我地主動改既，由於我地係歐洲 lockdown 前已經訂左機票，漢莎比我地可以退錢或者任改期，改期既話仲送多50€ 現金卷。去到六月左右疫情開始好轉，歐盟境內邊境都開通返，我地日日睇住各國既聯賽安排，首先有捷克，然後波羅的海三國都話七月起會比球迷入場睇波。我地超好彩！！！不過本來我地訂左六月尾出發既，為左可以睇波就開左去七月先出發～

改左機票後大約兩個星期，漢莎通知我地班機取消左，幫我地改早一班機出發。ok, 早啲出發果班機本來貴啲所以我地無㨂，而家免費改早啲我地當然無所謂～過多幾日，我地睇下航班資料時發現我地班機既 status 係取消左！ 即刻打電話去問，佢話而家去 Frankfurt 去Tallinn 既班次由每日三班減到每三日一班。 好好彩我地出發同回程果日佢地都仲有機！ 最後我地由下午5點出發，被改去12 點出發，最後朝早7 點起飛！

去完捷克之後我地就好似小朋友等聖誕咁日日倒數出發日子，又要擔心會唔會連呢班機都被取消，未去到機場未上到機都仲擔心緊。不過數下數下，終於到左出發果日啦！ 凌晨 3 點起身，4 點出門口，5 點到機場，好唔習慣機場咁少人！

愛莎尼亞同德國有一個鐘時差，飛兩個鐘左右，當地時間 10 點到步。呢個國家好多野都電子化，車飛一係買八達通一係用 App 比錢。車站無機比你買飛。食飯買野比錢佢地好順手咁就推部讀卡機比你嘟信用卡，完全唔會問你比卡定現金。連啲老人家係超市都會用自助收銀機，同保守既德國人成勁大對比。

呢場波係到達第二日既行程～ 星期六一早去左碼頭接特登係芬蘭搭船過黎見我既細佬，可惜天氣唔太好，係古城行左一陣就因為落大雨而要去間餐廳坐低避下雨。3 點出發搭電車去球場，落車後要行大約十分鐘。球場前有個火車站，要過條火車軌就要穿過一條同我一樣咁高既隧道，無問題…. 問題係條隧道水浸！！！！行第二條路既話就要行半個鐘兜勁大個圈…. 最後要大字型用腳尖企係側邊啲石仔行 T_T

Flora Tallinn 我地上年睇波佢地作客法蘭克福，所以今次係我地第二次睇佢地了。不過我地完全唔識啲球員～ 上半場開波無耐，主場球迷走出黎放煙同放嘭嘭聲既煙花！ 雖然無入球，但起碼有啲煙睇下～

掛住同細佬傾計我都無咩特別留意場波，所以上半場應該都無咩特別。半場休息後細佬就要趕船先走，我都專心返睇波，估唔到佢一早左就有四個入球睇。 雖然早兩星期去左捷克睇波，但今場波個球場係有四面看台既球場。又係另一個久違既感覺！

而家令我地更期待既就係滿座既比賽。德國足總話新一季會係九月開始，啲球迷已經話緊唔比入場就唔好開季。呢點我絕對認同，我地要正常入場睇波呀！！！