22.02.2020
德國西南地區聯賽 第 21 週
SV Elversberg - VfR Aalen
Waldstadion an der Kaiserlinde
賽果：1:0 (0:0)
入場人數：1147 （約 80 名作客球迷）
門票：5€
更多相片

黎到二月尾，終於等到地區聯賽再次開波。 歇冬後首戰係主場迎戰 VfR Aalen。

呢隊波呢幾年越踢越沉，由乙組跌落丙組，上季再以榜尾跌埋落地區聯賽。睇佢地個勢都唔似會可以即刻升返上去，隨時仲可以繼續跌。我地睇死佢地既最主要原因係… 佢地現任領隊係 SVE 既前領隊，即係上季我地場場唱歌想唱走佢果個 Roland Seitz！

今次佢帶住另一隊波重回舊地，我地就當然唔想衰比佢睇啦！仲有我地歇冬前既戰況唔錯，希望過左個冬天我地都仲可以 Keep 住個勢。

返到黎主場，C1 看台前掛左一塊新橫額，白底黑字 SV 07 Elversberg – Waldstadion Kaiserlinde。呢個冬天大家開左個會諗方法去聚集多啲人一齊打氣，其中一樣就係希望能夠令其他球迷認為C1 唔係只係屬於「果班球迷組織」，而係屬於所有 SVE 球迷既。所以係看台前掛上球會橫額，而係某個欄杆前先掛上球會組織既橫額。

開波前聽住啲80年代既歌，仲播埋 Last Christmas，差啲唔小心以為就黎聖誕…. 除左條 playlist，開波後球員都一切正常。過去兩左月簽左幾個新球員～ 睇落佢地都好快夾到隊波。

啲球員竟然識走位，仲會去搶波搶身位，唔會等波到。通常佢地踢得咁好就代表埋唔到門（好似真係永遠睇人地隊波先會踢得完美仲輕鬆入波）。

客隊帶左近 80人黎到莎蘭，佢地全部人都全場不停唱歌打氣。係地區聯賽黎講真係算唔錯，唔似我地頭果廿分鐘有氣勢，之後就無哂聲氣淨係圍內講廢話～～ 上半場完結後，前領隊追住球證理論，最後被罰黃牌，全場球迷即刻拍哂手，仲一齊唱我地上季成日唱叫佢返歸果首歌。無諗過竟然係呢首歌可以令到全場球迷團結 😀

下半場越踢越悶，但又越來越不安，因為真係唔想輸。去到最後一分鐘，我地有一個攻勢，右路傳中，呢一刻唔知點解好似慢鏡咁，我係球場既另一邊見到對面既守門員同條主有空位，我睇住個波飛去遠柱，然後有個白衫球員跳高，個波就係我望住果個空位入左網！！！好似無睇波睇到要尖叫… 就係咁樣絕殺左 Aalen。

即刻諗起上季我地都係成日咁樣輸波，踢得唔錯但入唔到波最後輪一球。正如我一開始所講，如果 Aalen 要降班既話真係完全唔會意外。

球證一吹雞，大家又唱歌叫前領隊返歸～～ 好驚險咁搶左三分返黎，繼續落後榜首四分。