08.12.2019
德國西南地區聯賽 第 20 週
SC Freiburg II - SV Elversberg
Möslestadion
賽果： 0:0
入場人數： 350 (約 60 名作客球迷)
更多相片

黎到 Freiburg 第二日，一早先係酒店食完早餐，同同事會合就一齊出發到市中心。我地先係球場附近泊低架車，然後沿河邊行返轉頭，望下 Freiburg 日頭係咩樣。

雖然係星期日，但因為有聖誕市集，所以市中心都有好多人～ 同事大約一點就坐火車去法國 Strasbourg ，我地就慢慢行返返去架車度。途中經過聖誕市集，食左 Raclette 芝士同埋 Käsespätzle，只賣5€ 仲要同餐廳食差唔多 size！！超滿足咁去睇波～

要去球場就要穿過火車路軌，但其中一路閘因為故障所以封左路，我地要兜勁遠先搵到另一道閘可以穿過路軌再去球場。 最後因為兜路遲左五分鐘先入到球場….

今場波唔知做乜佢地竟然開放作客區（咁多年都未試過），一入場就見到一班戴住黑白聖誕節帽既球迷～ 原來球隊今朝向坐巴士黎既球迷每人送左一頂聖誕帽。 我地自駕就無份了，另外一班朋友同我地一樣早一日就南下，但佢地係先去左歐洲最大既主題公園度玩～

場上面同上一場波一樣，攻極都攻唔入。 作客呢個球場既往績不嬲都麻麻地，所以都無咩太大期望。 加上呢場無論贏定輸，之後都係要歇冬兩個月，有態無態都無去到二月都係重新黎過，所以大家都淨係望隊波要有鬥心。話就話唔太 care 今場波既戰果，但大家都係睇到好激氣！！！最後雙方無入球完場都算合理既。

完場後我地就去法國再一次同同事會合。Strasbourg 離 Freiburg 只有大約 45 分鐘車程。 我地係德國邊境城市 Kehl 泊低架車就轉搭電車過境。 單程車費只係 1.8€ 超平。話說法國係多個城市推行無車城市，要比錢先可以揸車入城，希望大家可以多啲搭公共交通，所以公共交通車費都唔高。 唔似德國一邊話要減廢，一邊又唔肯減價囉。

搵左間餐廳食當地必食既 Flammkuchen，唔知中文叫咩，可以話係法式薄餅～ 個餅低係超薄同埋新鮮食既話係脆既～ 而同事就話要食鵝肝。 食完就去行聖誕節市集，睇夠就揸大約兩個鐘車返到法蘭克福。

就係咁，睇左今年最後一場波，全年睇左 52 場波，除左開都有一星期一場～ 返工之後無咁多時間同動力係咁睇波，希望下年可以 keep 住有一星期一場既stat 啦～