07.12.2019
德國足球甲組聯賽 第十四週
弗賴堡 對 禾夫斯堡
Dreisamstadion
賽果： 1:0 (0:0)
入場人數： 23,800 （約 800 名作客球迷）
門票： 37€ （座位）
更多相片

想去 Freiburg 睇波想左好耐，但佢地個球場好細好難買飛，一直都諗住實有機會既。講講下講到佢地新球場起好，仲宣布埋今季會係最後一季用 Dreisamstadion 黎踢德甲，我地就知無論如何都要今季去睇場波。好好彩比我地捕到可以星期六睇德甲，過一晚夜然後星期日睇 SVE 作客。

最重要既係呢場波既對手只係禾夫斯堡，佢地一定帶唔到二千人南下 Freiburg。當球隊宣布賣飛後，主場飛好快就賣哂。我地即刻上禾夫斯堡個網站睇作客飛，連註冊都唔洗就買到作客區波飛！ 平時我地唔會買作客區，但為左可以入場睇波都無計啦。

呢個 Weekend trip 我邀請左個同事同佢老婆一齊去，佢地搬黎德國半年左右，一直都無時間去見下德國其他城市，我建議佢地跟我地南下，我地睇波時佢地可以自由活動，中意既話仲可以坐火車去法國 Strasbourg 睇下聖誕市集。

最後我地四人行由法蘭克福開大約兩個半鐘車去到 Freiburg 。 太早去到酒店未有得 check-in，好在今次揸車可以放啲行李係車尾。 泊低架車就先出去市中心行個圈。 Freiburg 市中心好靚呀～～每條街都有條河仔（對香港人黎講佢其實只係坑渠）但德國人話係小河流。OK. 食左少少野就向球場出發。

今次要入作客區其實都要準備得好好，怕球迷組織啲人見到生面口然後趕我地走，所以我地免得過都唔想係球場入面買野食，唔想同佢地一齊排隊。所以我地一身學生遊客 look 咁入場，完全無問題。 我地附近都有啲醒目主場球迷買作客區入場睇波！！

作客區下層係企位，上層係座位。 上層一半都坐唔滿 （但都可以有堆人走左落樓下企）。 球場既背景係黑森林，開波時仲有啲太陽射落主隊球迷組織度！ 球隊向主場球迷每人派左頂聖誕帽，望落好靚好有氣氛。

去睇波呢場波真係為左見下個球場，兩邊既球迷其實都唔太重要，一來已經見過，二來佢地都無咩特別。但主場球迷組織以外既球迷全部都睇得好投入，因為呢個城市既人都好愛自己既球隊。 （但又唔知點解唔比球場發出嘈音 sosad)

話說上個月市政府突然宣布話新球場唔可以係星期日同夜晚八點後比賽，震驚全國上下。 後來原來係法院擺烏龍拎左舊數據黎做裁決。 佢地二隊球場因為旁邊間酒店投訴所以唔可以用打氣物品發出「嘈音」…. 如果連一隊球隊都被禁聲既話真係好絕望。 其實佢地而家呢個球場都好靚，好有英國球場既風格，係衰在太細！

場波超悶，全場加埋都唔知有無中過目標，所以無咩好提，去到最尾果幾分鐘主隊靠一個超靚自由球死角入波。 大家超開心咁慶祝，完場前班球迷無啦啦又慶祝，我完全黑人問號，做咩呀？入左波呀？完左場拿？但佢地仲係後場仲踢緊喎？球上無球員慶祝既？ 原來係大電視播出慕遜加柏反勝拜仁，代表住弗賴堡係積分榜過左拜仁。 哈哈，完場後上左電車，個個都係度講拜仁比十二碼絕殺。

睇完波返到市中心，同同事係餐廳相聚，帶佢食德國菜。食飽再行聖誕市集先返酒店。第二朝仲有地區聯賽等緊我地～～