23.11.2019
德國西南地區聯賽 第 18 週
FC Gießen - SV Elversberg
Waldstadion Gießen
賽果： 2:3 (1:1)
入場人數： 731 (50 名作客球迷)
門票：8€ （企位）
更多相片

國際賽休息左一個星期之後，我地跟 SVE 到 Gießen 作客。 Gießen 離法蘭克福大約一個鐘車程，係今季既升班馬。 球隊既立成年份係 2018 年 🙂

球隊既前身係 SC Teutonia Watzenborn-Steinberg。因為個名又長又難聽又無識，上年突然變定以 Gießen 為根據地既球隊。上季我地係第五級聯賽 Hessenliga 都有睇過佢地，因為有銀彈政策所以佢地輕鬆升上地區聯賽。 不過升到上黎佢地又開始有財困，傳聞佢地拖緊糧。。。

佢地既主場原本係一個算係有啲特色，不過因為要配合地區聯賽既規定，佢地開左好多欄杆搞到個球場好醜。仲有個球場只有流動廁所….

賽前 SVE 已經連贏七場，打破球會紀錄。今日硬係有種不詳預感對住廢隊會輸波，但又因為要追榜首完全唔想輸。係正我地對面有由幾條佬組成既打氣團，節奏唔岩音準又錯既打氣…. 仲要好有火咁挑釁我地。

一如所料，對方先取得入球。 對面瘋狂慶祝， 好快我地就搏到 12 碼追和。除左對面班友，佢地啲球員都唔知點解好乞人憎。可能因為無糧出所以佢地好嬲？ 仲有球證都唔知點解好似幫住對面咁囉。唔知點樣對方又搏到 12 碼，好在中柱唔入。係呢個時候我開始見到啲希望，主要都係 SVE 球員好落力咁去爭波搶波走位。

下半場我地連入兩球（其中一個都係 12 碼），三球都係同一個球員入波 （Maniel Feil）～～～ 完前前十分鐘對方再入多粒。最尾勁緊湊，兩邊都踢越越火各食左張紅牌。球證吹完場雞果刻真係即刻鬆一口氣！！！

連贏八場，下場係歇冬前最後一場主場。 希望可以食住個勢繼續踢好波！！