02.10.2019
德國西南地區聯賽 第 16 週
SV Elversberg - 1.FC Saarbrücken
Waldstadion an der Kaiserlinde
賽果：3:0 (1:0)
入場人數：6211 （約 4 千名作客球迷）
門票：5€ （企位）
更多相片

超過一個月無去過莎蘭，等到今日對同州對手 FCS 點都要返黎撐下場。不過對手氣勢如虹，早兩日先係德國盃爆冷踢左科隆出局，再加上佢地今季只係輸過一場，係榜首領先排第二既我地 8 分。

但係就係因為對手好似好勁咁，我地就硬係覺得今場我地會令大家大跌眼鏡。

星期六既天氣預報話會落雨，好在最後只係開波前落左一陣雨。開波前我係 C1 看台四圍遊走影下相。要睇下作客球迷有咩搞作，佢地既主要球迷組織話今場唔要係普通作客區，要走左主看台度企喎。 完全無人明個用意係乜，去左座位看台既話，佢地前面無圍欄比佢地掛橫額，要前排既人用手揸住。 氣勢又無乜，又唔覺得咩特別。

今場未開波就已經有令人值得興奮既事，就係球場終於有電子比數板！早兩星期左右，有球迷已經留意到球場有小工程起左兩枝野。 大家係度估到底係比數板定係廣告板，就係賽前一日，球會終於宣布係比數板！不過就唔知趕唔趕得切試軟件然後今場波用…. 最後就當然趕得切啦！

開波後，我仲篤緊電話諗住睇埋最後一秒新聞，然後影返張相就專心睇波，咁就無啦啦就入左波！！睇返張相我就係咁岩唔小心影到入波一刻….

由於看台太多人，開波後我廢事攝黎攝去，就咁企係看台最高果行。咁岩我竟然高過前面果兩個女仔，有個超靚視線睇波！但我旁邊有幾個作客球迷。 OK, 你企主場區我唔話你，但唔該你企係主場區就收歛下啦。 每下甩波比 SVE 就狂鬧，鬧球證鬧主隊，就係我差啲開口鬧9 佢地既時候，我前面果兩個女仔就開左聲鬧佢入錯看台叫佢死開。 其他阿叔就笑住問佢係咪唔識分主客，比人鬧完之後先識收聲。

今場波球證係咁吹罰，係現場睇真係覺得球證收左 SVE 錢要幫我地贏波。 後來睇返電視就證實球證既判斷無錯～～ 下半場又係一開波我地就射入第二球，超開心！！！！對方有兩個球員直紅離場，聽講呢個球證今季好少比牌，今場完全係破哂紀錄。 然後睇住佢地係我地面前射入埋第三球。 哈哈哈哈，我肯定無人估到我地唔只贏波，仲要大炒！

平時我好少影比數板，因為覺得無咩意義。但今次要留個紀念記得歷史。

多得佢地週中出盡全力踢科隆出局，今場未能回氣….. 賽後我地既積分差距拉近至五分。 希望我地可以生生性性再拉近啲，唔好失無謂既分數！