26.10.2019
德國西南地區聯賽 第  15 週
1.FSV Mainz 05 II - SV Elversberg
Stadion am Bruchweg
賽果：1:2 (1:1)
入場人數：405 人 （80 名作客球迷）
門票： 6€ （企位）
更多相片

對上一次睇 SVE 已經係一個月前既事，主要係因為夾唔到時間… 但黎緊直到歇冬，我都都應該可以睇哂。

星期五晚係 Mainz 睇完德甲，返到屋企唔夠 12 個鐘又要再出發去 Mainz 既舊球場睇地區聯賽。兩點開波，我地 1 點半到。

自從佢地既一隊搬左去新球場後，舊球場就開始改建，主要用黎做青訓基地，有唔少大大小小既比賽。上年黎緊時間，其中一邊看台剛被清拆，而家已經變成一條行人路，可以行去球場另一邊。而佢地都終於係作客看台果邊開左售票處同入口，球迷搭巴士既話可以落車就買飛入場，唔洗行去球場既另一邊。

由 Elversberg 搭巴士去 Mainz 只需大約兩個鐘，算係短程，所以今場有 80 個球迷一齊黎助陣！不過過往紀錄，我地近十年都未試過係呢度贏波… 但都希望可以借住其他對手失分既情況下我地可以搶分拉近同榜首既距離。

場波我地其實踢得唔錯，一開波就已經禁住人地黎攻，點知對方第一人搶到波造一次攻勢就成功開齋…. 當我地以為惡夢要開始既時候，五分鐘後我地追和！好耐無見過佢地踢得咁流暢～～～ 下半場一開波我地仲入波反超前！！！令到大家唱歌越唱越落力。

完場前十分鐘左右有罕有奇景，就係對方龍門係禁區外用手接波，直紅出場。 由於佢地已經用哂三個換人名額，只可以搵場上某一個人黎守龍。後來我地都未必借住優勢入多幾粒，但點都好，最緊要三分已袋！

賽後，我地唱住歌睇球員過黎。好似好耐無見佢地笑得咁開心。大家都笑住離場，然後祈求下場可以再搶到三分。事關下場係對榜首 Saarbrücken。 要係佢地身上搶分先可以拉近現時既八分之距，增加我地直接升班既機會！！