25.10.2019
德國甲組足球聯賽 第 9 週
緬恩斯 對 科隆
Stadion am Europakreisel
賽果：3:1 (1:1)
入場人數：31.999 人 （約 4000 作客球迷）
門票：25€ （座位） 
更多相片

有咩開心得過放工？就係放工直接去睇波！！呢幾個星期有幾位韓國同事黎德國工幹，之前講過要一齊去睇波，上次佢地已經睇過法蘭克福，今次就放工去睇緬恩斯。

德國睇波最好就係門票會包埋地區交通費用，我地可以免費由法蘭克福搭火車去緬恩斯。我預計最遲 5 點半收工出發，由公司到 Mainz 火車站要大約一個鐘，之後仲要轉車去球場，到左球場又可能要排隊入場。

班同事話想將部電腦帶返酒店，覺得安全啲，反正都係順路，都唔會花太多時間既… 咁佢地先去酒店，我地另外三個就先去 Wiesbaden 火車站食啲野先，然後就係 Mainz 同大家會合。 班同事返酒店放低電腦之後 miss 左班車，最後 8 點先到 Mainz (場波 8 點半開波！！） 等埋佢地，我地就拿拿聲搭巴士去球場，不到五分鐘就到達。但係個巴士站離球場仲有近十分鐘路程！！！

佢地勁興奮咁一路行一路影相，我就好似家長咁要係咁推佢地行咪咁慢吞吞… 半路有間流動酒吧無啦啦大叫：免費啤酒！！！ 我地就唔小心忘記左就開波，好開心咁去排隊等啤酒…. 好在入場時唔洗排隊，好順利入場波，岩岩睇到開波。

但係….. 球場內一堆白煙…… 即係班作客球迷早幾分鐘放完pyro…. 但我睇唔到 T_T 好在我地其中一人早左入球場，起碼影左啲相。。 入場後我地仲要先行上山頂再兜去另一個區先去到自己個位（係角落頭）。 班同事繼續好興奮咁影相，其中兩個平時無睇開波，連今場波其實係邊隊對邊隊都唔知，問我佢應該要支持邊隊。我話你而家係 Mainz，咁你就支持緬恩斯啦！ 點知佢睇睇下波決定支持科隆，哈哈，仲超級激動咁同佢地打氣。

我地呢區原先係家庭區，係作客區同一邊，但眼見似（大）學生區多啲。開波無耐科隆先射入一球詐糊，我地附近勁多作客球迷都彈左起身慶祝，然後我地先發現我地身處係「中立區」，乜野球迷都有～～～ 好多都似係支持唔同球隊既大學同學黎睇波。

有一位俄羅斯同事佢都係對足球無乜興趣，但我有同佢講過足球文化，佢都有睇下啲相關資料。佢話場波既氣氛係佢意料之外，終於明白點解會話主場有著數，班球迷真係好有感染力，又好有興趣咁問我啲球迷唱緊咩歌，點解互動之類。

科隆既球迷好有活力，打氣既氣勢不嬲都唔算差。今日即使係星期五晚，佢地都帶左近四千名球迷到場，處於作客區外既球迷都會周不時跟住一齊唱歌踩場。

上次我地黎到睇緬恩斯已經係差唔多三年前既事。當然佢地第一次晉身歐霸，我地去睇佢地第一場歐霸主場，以為會全場爆滿，點知勁多吉位好失望。今次第一次黎睇佢地踢德甲，入場人數同氣氛都係意料之外地好！

緬恩斯今場有新既球場 MC 上任，平時我緊係唔會有興趣知啲球隊用邊個做 MC，但係萬萬都估唔到，呢位新 MC 竟然係我既大學同學！！！當年我成日同佢講賀治比～～～ 佢本來係當地既知名電台主持，近年開始參與當地既嘉年華節目，後來被球隊邀請佢接任球場 MC 之位 （上任做左近 30 年），身為緬恩斯球場既佢好快就答應佢。 早排佢仲訪問左深受緬恩斯球迷愛戴既高普！！！！經過喇叭聽到呢把熟悉既聲音感覺好奇妙！

講返場波，雙方有攻有守好好睇，唔知係咪一路要同同事講緊下場波、球迷、球場等等，時間過得超快。 兩隊波現時係積分榜下游，技術水平都係差唔多。我地成日覺得下游爭分既比賽好睇過榜首果啲，唔想降班既動力好似通常都大過爭冠軍既動力咁。 下半場開波前見到作客區啲人笠哂頭套就知佢地又準備放煙，可能佢知我地上半場睇唔到所以下半場燒多次！ 我啲同事以為咁樣係正常，我要解釋比佢地知咁樣係唔正常之餘仲會累到球隊被罰錢，比人影到既話仲會被罰入場禁制令。但係球迷就係小學雞，你越唔比我做既野我就越要做，係入場前通過搜身帶到煙花入場係代表成功挑戰權威，帶到入場就當然要燒比你睇～ 唔好以為你話唔比我地就唔會做。

完場後，我地要先搭巴士返火車站，再轉火車返法蘭克福。由於法蘭克福機場車場附近有大工程，由星期五晚起，所以原本要經法蘭克福隧道既火車都要停駛，即係我地要兜老遠先可以返屋企，最後終於係夜晚一點半先返到屋企….

btw 我既大老闆（過多幾年就退休）係緬恩斯季票持有人，我同佢講諗住同班同事去睇緬恩斯，佢話佢放假，我地可以拎佢張飛去睇。 但原本佢係企位，我話班同事未必想企…. 佢即刻話 有無搞錯呀，企位區先係最正囉！！！ 哈哈 年近六十既佢，果然係真球迷！ 我要再解釋佢知 我地未必夠其他德國人高，驚睇唔到場波佢先無咁激動～～