19.10.2019 保加利亞甲組聯賽 第 13 週 PFC Levski Sofia - FK Arda Kardzhali Georgi-Asparuchow-Stadion 賽果： 2:1 (0:0) 入場人數： 2.558 (約 50 名作客球迷) 門票： 17 Lewa (約 8.5 歐元） 更多相片
黎到保加利亞首都計劃要一連三日睇波，今日我地會去睇一隊比較大既球隊，唔係鄉下隊。由於場波係夜晚先開波，日頭我地有好多時間可以去做下遊客先。
早一日上山睇完 Bistritsa 之後凍親有啲唔舒服，低估左當地夜晚既溫度，諗住差唔多廿度就連褸都無帶。最後要去求奇買件可以保暖既衫著多一層，唔可以比自己病發！
日頭我地係市中心睇景點，出發去球場前我地去左睇當地既「女人街」。一個市集有雜貨舖（啲貨放到出門口，乜都有好似香港咁！！） 仲有街市，睇下當地啲人中意食乜，有超大蕃茄同埋超多紅椒。最後仲有啲時間剩就搵間餐廳坐低飲啤酒，望下風景望下當地啲人既生活。
坐夠飲夠就搭電車去球場。 當地既火車大部份都係來自其他歐洲國家既二手車，有德國萊比錫既電車，仲有來自捷克布拉格。用二手車唔係問題，但佢地連翻新都唔會做。我地搭左架布拉格電車，車身顏色仲係紅白色，車入面啲告示貼紙都仲係捷克文。交通細則呢啲一大pat 字我唔識睇啦，然後我離遠望住個交通地圖覺得好熟口面。落車前行埋啲睇，就連張地圖都係布拉格地圖黎！！！！
啊，仲有！！！佢地都慢慢進步緊既，例如搭車可以用當地既八達通。 我地買左張預付卡，知道上電車會有部機要嘟。 上左車之後一部機都見唔到，拎住張卡問個司機點比錢…. 我無諗住佢識英文，同埋實會黑口黑面咁。佢拎住張卡打哂問號咁，英文佢就真係唔識，但佢好似想嘗試用英文答我。 然後我話 But no machine!! 佢就話 Yes no machine, no problem! 🙂
落車前就已經見到球場既射燈，好大好靚。我地要先經過一個住宅區，果然一離開市中心啲路就即刻爛哂。係極微既街燈帶路下安全抵達球場外邊既公園。行到去我地想買飛既果區就去售票處度買飛。
我地話想買 Block 2 （主看台既最邊邊），個售票員碌大對眼然後問佢同事野。佢好驚訝咁問：Are you sure? 然後我地勁疑惑既樣望住佢完全唔知點答，因為我地肯定果度唔係作客區亦都唔係球迷區。 佢見我口啞啞咁佢又問佢同事，然後又話 Ah OK, 仲話 great view! sosad 心諗做乜9？？？？
買完飛就即入場，首先又要經過警察既安檢，仲要比佢睇身份證，但佢地又唔係認真睇架喎。過左第一關我地就係場外影下相，去 fan shop 買左條頸巾同貼紙，然後就上去看台～ 上看台前要過安檢第二關，黎到呢度佢地先查飛。 佢 scan 張飛時，我地望住個系統話今朝 11 點已經 scan 過張飛 sosad 唔係想同我講係門口售票處都買到假飛呀？ 佢 scan 多次都係話已經用過。 但最後佢叫我地繞過度閘照比我地入…..
入閘後佢地超認真咁搜袋，個女仔搜到我地岩岩係 fan shop 買果條頸巾話唔帶得入場。今次到我碌大對眼話我兩分鐘前係 fan shop 買架喎，FAN SHOP!!! 然後有個大隻佬走埋黎講左兩句就話 okok 就放左我地入去。
過埋第二關後要行兩層樓梯，離遠就聞到超香既牛油爆谷味～ 不過無胃口食。出左看台之後大把位任㨂，唔小心行左上去類似 vip 區既地方。其他區啲位無手柄，但呢區有手柄同放野飲既 lone。但個保安望住我地走上去無理我地，咁我地搵個無咁食風既位置就坐低～
呢個球場算係典型既東歐球場，好開放同我似好多位咁。 對面看台無我地呢面咁高，亦都好似無我地呢面咁多人。 我地既右邊既看台係主場球迷（企位）區，個看台超大，但一個欄杆都無！！！以現今歐洲足球既安全規格，好難先會見到呢種無欄杆既企位看台。 你睇下德國既球場每四五行同每隔幾米就有一個欄杆… 雖然唔識睇俄文（／保加利亞文），但對我地某幾隻俄文字母既認識，掛係球迷前既大布係寫住 Ultras Levski Sofia。而看台前都掛左唔少大大小小既橫額。
雖然佢地企唔滿個看台，但對比起尋日已經有睇頭好多啦！佢地既對面有幾十個作客球迷。望望下，發現我地呢個看台既最左邊有另一堆人企係度打氣。 係囉！明明計劃行程果陣睇過下相同其他遊記記得佢地既球迷看台應該再有多啲人，但同時我地都聽過佢地啲組織內訌，而家分開各有各做。 咁睇黎呢堆人就係分裂出黎果班。
唔知係東歐定乜，佢地超中意內訌然後自成小圈子各自打氣…. 諗返轉頭，我地可能估到點解門口賣飛果條友咁驚訝，可能平時分裂出黎果班友係企係我地呢區，最近或者今日佢地轉左地盤？？ （東歐啲人都係偏右，加上佢地唔中意有外人企係佢地附近）。 我地都可能係好好彩㨂岩左區。
龍門後既球迷看台佢地有個超大聲既大聲公帶住佢地唱歌打氣唱足成場，唱左唔少我地平時聽開既打氣歌，仲有啲南美既歌。上半場無入球，下半場完場前廿分鐘一次過黎三球！好彩唔洗食蛋～～～
就係咁，終於睇左一場有啲氣氛既比賽。雖然氣氛唔算特別好，但都叫見識左佢地為球隊打氣既熱情～ 回程時都係答返布拉格電車返市中心。呢個城市好正，有啲餐廳係 24 小時，睇完波返到市中心大街都仲有舖頭氣賣緊野食。返到去差唔多 11 點竟然仲可以買到pizza 食！！！！ 有一秒有種身處香港既感覺，因為係德國真係八九點左右就變死城….
返到去就期待呢個旅程既最後一場波，係我地係保加利亞既壓軸！