07.09.2019
德國西南地區聯賽 第 8 週
SV Elversberg - FC Homburg
Waldstadion an der Kaiserlinde
賽果：2:3 (1:2)
入場人數： 2,111 人 （約 500 名作客球迷）
更多相片

返到德國之後第一場波去左睇凱莎羅頓，第二個週末就係打比戰可以順便返去派下禮物。賽前報紙話 Homburg 今季好廢呀，SVE 實輕鬆贏波啦，即刻有種不祥預感。

星期六一開始已經勁灰，好天左成個星期，黎到今日個天暗暗，天氣預報話會落雨。睇雷達告啲雨雲一舊舊咁又好似未必會中莎蘭。法蘭克福原本都無落雨，但由我地出門口果刻佢就開始落，兩個鐘既車程越落越大。中間仲要塞左半個鐘車，最後一點先返到去。

食啲野又要出門口，本來我地諗住一口氣睇兩場波，完場後就去法國，所以揸車去球場。拎住把遮行左兩步見佢停左雨就都係行返去放低把遮。點知落到球場門口排隊買飛時佢開始落雨屎！！！！！

大雨到我連相機同電話都唔敢拎出黎影相，最後好求奇咁影左幾張。今場波有好多朋友入場幫手助陣，包括視 FCH 為死敵既 FCS 球迷，仲有視賀芬咸為死敵既某隊都走左黎。我地原本同佢地都無咩交情，但今場波我地既有同一敵人….

FCH 唔知點解早兩年同賀芬咸做左朋友，比好多人恥笑。而今個週末因為國際賽期所以德甲乙丙都無比賽，因為咁賀芬咸都有人走左黎莎蘭幫 FCH 打下氣。 同樣某隊亦都因為無波睇所以走黎問我地有無興趣一齊玩下埋伏。雖然最後因為太多警察所以事敗，但場內我地睇落好似好多人好有氣勢咁！！

開波後一段時間無話邊隊踢得好，客隊首先入波，但好快就比我地靠自由球追返。去到上半場完場前佢地再次領先。當時停左雨一陣，以為終於可以抖下氣，個個由頭濕到落腳，濕到手指尖都chau 哂皮 -_-

下半場完全係惡夢黎，一來又開始倒水，二來唔知點解可以下下交失波，走錯位，無一樣野做得岩。好名正言順咁送多一球比人。去到近完場前搏到個十二碼同埋請對方食紅牌，可惜都係唔夠時間比我地追和。 成個下半場都好嬲，全身又濕又凍，又要聽住對面啲人係度唱歌。球證一吹雞我就即刻衝走左，返上車暖下身，仲有淨係想返屋企，邊度都唔想去。