01.09.2019 德國丙組聯賽 第 7 週 1.FC Kaiserslautern - SV Waldhof Mannheim Fritz-Walter-Stadion 賽果：1:1 (1:1) 入場人數： 36,766 （約 5000 名作客球迷） 門票：€21.50 更多相片
早幾個月被公司要求清下啲假，咁岩見到因航減價 550€ 來回香港就決定返去兩星期。無諗過呢兩個月會發生咁多事，朋友同事都擔心我返香港會出事，出發前幾日仲話咩解放軍去左邊境搞到我上司係咁關心我。佢地都知有警察既地方最危險叫我小心啲。
返香港果十日過得好快（其實頭尾都五日係香港），轉眼間就要返德國。呢場波我地hau 左好耐，兩隊死敵對上一次碰頭超過十年前。凱莎羅頓一早就開始賣呢場波既飛，但去到比賽日前一星期都只限會員。係香港時某一日見到佢地終於公開售票，二話不說買左飛先！㨂返上次睇對 Karlsruhe 果個區，最平同可以睇哂兩邊球迷。
返到德國後，有一日比我地休息，星期日仲 jetlag 緊朝早六點未到就醒左，九點半出門口揸大約個半鐘車到市外既一個 Park & Ride 停車場。德國有好多呢啲 P+R 場，正常都係免費既，有啲就要買張當地車飛就可以免費泊，吸引啲人可以泊架車係市外再搭車入城，無咁塞車！而 Lautern 市外唔同地區都有 P+R 配 shuttle bus 去球場。我地係東區，主要係由法蘭克福黎既球迷；有西區 P+R 就係主要比由莎蘭黎既球迷使用咁，咁就唔洗個個揸車去球場塞死成個城市。
到達停車場後先 11 點都未到，果度已經有好多人等緊穿梭巴士上山。由於個停車場離球迷都幾遠下，所以係無機會可以行到去既。本來我地諗住搭左車去球場先，然後行返落山去火車站等作客球迷到場，但係都係敵唔過條斜路，決定留係山上等開波算。德國係一個唔會排隊搭巴士既地方，巴士黎到都係一窩蜂咁湧去車門迫上車，但就唔會有人用手背推你行入啲，真係好少會有人夾硬迫上車。（當然有例外情況啦，例如法蘭克福有比賽，連續 N 架火車都企滿人時就有好多人會試下塞上車）
入到球場後就要行上山頂，去個廁所之後㞊會落返底層買野食。頂佢呢個球場要用預付卡買野食，排到我地買卡時又話無散紙找錢叫我地搵第二個。煩左差唔多半個鐘終於有野落口！拎住個包入座，超期待開波一刻。
每個座位上面都有一張講述今日既 choreo 程序，呢個將會係一個覆蓋三邊看台既 choreo！每兩至三個座位有一塊大紅／白旗。一切由西看台開始，跟住指示做，全個 show 大約 6－8 分鐘。我地個位咁岩無旗，但有旗我地都唔會幫手fing，因為要影相。
作客球迷慢慢入場時，主場已經急大及待要狂噓佢地。雙方等左十二年終於再次碰頭！！！當然作客球迷都有一手準備啦，由比賽日前幾日已經開始入城搞事，例如打爛 Lautern 既名宿銅像。唔知今日入到場佢地又有咩好睇呢？
時間就到 1 點鐘，球員準備進場，西看台慢慢拉起一塊畫有紅魔既大布，大到覆蓋整個西看台，由底到頂。（凱莎羅頓既西看台係德國第二大企位看台），然後…….我既視線就比一大堆紅白旗遮左。枝旗有我咁高，再加埋啲兩米高既德國人係度 fing 旗，我想搵個位影張相都無……. 好嬲，好嬲，就算我唔影相淨係比自己對眼欣賞都係乜都睇唔到。
同一時間作客球迷係度放白煙，狂放。 後來睇返先睇到，西看台隻紅魔手上拎住 Waldhof Mannheim 既破爛會章，看台前既大字報話要對方死！！落畫後有一片紅白旗海配紅白煙，再拉起另一塊布，寫住 Waldhof Verrecke，前面既大字報話西南部係紅白色既！！好嬲無靚位可以比自己欣賞呢個咁震撼既 choreo….. 要靠後來睇相先睇得返成個過程。
開波後，作客球迷繼續不斷放白煙，好似永遠唔會停咁。佢地無帶球迷組織既橫額，而係帶左佢地用過多次既黑白橫額。雙方不斷唱歌對罵。話說最近都睇唔少 Waldhof 球迷，每次都覺得佢地好有氣勢，但今場黎到凱莎羅頓作客，終於被比下去。淪落到踢德丙既凱莎羅頓已經少左好多球迷入場，有時甚至連看台頂層都唔會開放比球迷入場。但今場佢地號召到過三萬名主場球迷入場，企滿西看台，過半個西看台都一齊手腳並用去打氣。目的就係衰極都唔可以衰比 Waldhof 睇！！！
好在無比自己搵借口唔去睇呢場波，氣氛黎講真係近年入場睇過既頭五好睇。場上既節奏都唔錯，客隊先開齋，然後主場係完場前追和。作為升班馬，Waldhof 黎到第七週都仲未輸過波，睇黎今季佢地應該都唔會做升降機。
完場後我地都留係場內一段時間，等睇雙方有咩賽後搞作。 由於警方好緊張呢場波，場內就應該唔會有事發生。兩邊同自己既球員唱左陣歌之後都慢慢散去，而我地就去巴士站搭車落山，然後返去法蘭克福。回程時對耳好似聽到球場既回音咁，真係好耐無睇過咁熱鬧既比賽！