10.08.2019
德國西南地區聯賽 第三週
SV Elversberg - SC Freiburg II
Waldstadion an der Kaiserlinde
賽果： 0:0
入場人數：1.189 (約 10 名作客球迷)
更多相片

成為城市人之後就預左無咁多時間可以返去莎蘭睇波；今次都係咁岩因為有事要返莎蘭先可以順便睇埋波。

暑假有唔少球員離隊，但損失都唔算慘重。點都慘唔過來自莎蘭既啤酒公司因為財果決定停止贊助 Elversberg，球會轉左去用 Bitburger。莎蘭人視 Bitburger 為死敵，好多人話寧願係場外飲夠先入場都唔想飲屎水。除左轉左啤酒公司，仲轉左小食供應商。新供應商唔再用炭火燒烤，變左做鐵板燒！！見到有人頂左幾啖就頂唔順 dum 走舊包…. 我都唔捨得比錢買野食。

呢場波戲碼超弱，今季既西南地區聯賽好似好無聊咁，有睇頭既唔係升左班就降左班，睇返啲二隊同埋蚊型鄉下隊參賽。希望今季輪到我地可以脫離地區聯賽，向其他地區出發！！

球隊唯然開季首戰大炒升班馬七球，但黎到今場就只能同 Freiburg 二隊拉鋸，攻極都攻唔入，毫無入肉功勢。但好在睇得出啲球員都仲有好勝心肯去追波搶波。同時對方都踢得好好，完全唔比時間我地既球員去慢慢推，迫到班友亂哂。

完場後，我地留低同班朋友飲多兩杯汽水聚下舊先再離場。

最近真係得足球可以令我分下心，唔好淨係掛住睇 Telegram 既最新消息。而我都無咩心機想打字，平日返工忙完唔想用腦，週末又有一堆令人擔心既新聞… 黎緊我地都好快會返香港，希望到時我地有機會可以出一分力幫下手。