01.08.2019
歐霸外圍賽 第二圈
Eintracht Frankfurt - Flora Tallinn 
Waldstadion Frankfurt
賽果：2:1 (1:1)
入場人數： 48,000 （約 50 名作客球迷）
門票：免費
更多相片

講起歐霸就一定要提上季令人跌破眼鏡既法蘭克福，除左殺到入四強之外，仲有佢地既球迷既氣勢真係十分之震憾，每次主場開波前後果十分鐘真係起哂雞皮，場場爆滿呢啲就例牌架啦，但佢地全場陣五萬人一齊打氣唱歌，仲有超震憾既 CHOREO….

佢地一早以綑綁式套票賣飛，球迷會、季票持有人等等忠實球迷有優先權，只要佢地買左套票就會包佢地有波飛入場，直至球隊出局為止。法蘭克福呢隊波成績麻麻，無咩海外球迷，而個城市本身令人覺得只係好似香港咁既金融城市，足球應該唔係好特別。但佢地既球迷其實係德國係數一數二出名。有好多人想買上季歐霸既黃牛都一票難求。 我地當然都想可以入場感受氣氛，但係諗到我地又唔係忠實球迷，寧願留返啲飛比真球迷好過。

黎到今季，法蘭克福再有機會挑戰歐霸，球隊係暑假開始賣套票，當然大家都未知會抽中咩球隊，但係 4 萬張套票極速被掃清！！我地係完全無諗過買飛。但有一日係公司突然收到 Message 話當地地區交通公司 RMV 送飛！！！！！

我地平時買開月票返工，每花 1 歐就有 100 分，每個月閒閒地都有萬幾分。而 RMV 突然話可以用 5000 蚊換飛去睇法蘭克福既歐霸首戰！我睇左幾次先敢相信自己對眼，一開始諗住只係球場外 d fanzone 定唔知乜，但點知真係波飛，即刻換左三張飛～～請埋同事去睇。雖然佢無講坐咩位，但我地都估到應該係作客區上層。因為來自愛莎尼亞既 Tallinn 真係帶唔到 4000 人黎作客，所以提早放棄作客區比法蘭克福賣更多飛。最後就變左呢啲 PR 飛～～～

然後就每日倒數去睇法蘭克福。去到星期四，我地響應呼籲著白衫，收工先去食飯，然後就搭火車去球場。一車車去白衫係球場站落車。 去到球場買杯野飲就埋位，95％ 既球迷都係著白衫，當中有人著其他色，但係你睇落去真係只見一遍全白色，已經好震憾！！！

等到差唔多開波，佢地就開始播會歌，然後宣布正選十一人，連埋背景音樂，大家一齊大叫球員名，近五萬外球迷同聲齊叫….. 平時真係好少會發生。呢一刻可以話係我睇過咁多場波 top 5 大聲。 叫完球員名之後，大家就開始唱 Europacup… in diesem Jahr. 佢地上季都係未開波就會開始唱，大聲到連歐霸主題曲都聽唔到，然後唱球開波後 5－10 分鐘都完全唔停口。 好癲，今次我地可以現場聽，甚至加把口一齊唱！！！

然後西北看台就打開寫住 Mein Verein 既巨型大字報，下層既人揮動白旗，然後一齊拋紙碎好似落雪咁好靚！！！！我地樓下有幾十個作客球迷，聽到佢地間唔中叫下球隊名打氣咁。我地個位雖然睇唔到作客球迷，但其實個 view 勁正，唔洗兩頭擰去望球迷，直望就可以睇波睇後生德國仔～～～

主隊應該就高兩三班既，但佢地好似唔係好認真踢咁，唔係特別輕鬆贏波。 過左個暑假，佢地走左唔少重心球員，但佢地都唔係會肯花錢買球員既球隊。佢地既球迷中意啲實而不華，唔會比球隊花太多錢係球員上。 但陣型方面睇落都仲可以既….

上半場雙方各射入一球，下半場主隊靠十二碼再超前。就係咁場波就入左雪櫃。下場佢地會對列支敦士登既 Vaduz。球場容納人數仲多過成個國家既人口。。。可能又會再派飛？？

完場後，作客球員當左呢度係自己主場咁環繞球場一圈向球迷致謝，而看台上既法蘭克福球迷都以掌聲回敬呢班老遠黎到既球員。 賽後佢地既領隊話：我地未見過咁震撼既球迷氣勢，所以完全我地想多謝班球迷令我地大開眼戒。

跟住就到主場球員向球迷致謝，最後佢地係西北看台前停留，同球迷一齊慶祝晉身下一圈。睇夠之後，我地就搭同事既順風車飛返屋企，訓五個鐘後又要起身繼續返工。

今次好似係第一次週中放工後去睇波，原來係好攰架！！！！下次有免費飛我都要認真諗下我既虛弱身上捱唔捱得住…….