31.07.2019
德國乙組聯賽 第一週
SpVgg Fürth - FC Ergebirge Aue
Sportpark Ronhof
賽果： 0:2 (0:1)
入場人數： 9.970 (約 1.800 名作客球迷)
門票：35.5€
更多相片

今晚星期我地黎個久違既火車之旅。一張 Bayern-ticket 就可以係巴伐利亞州入面任搭地區火車，目的地係紐倫堡旁邊既小城市 Fürth，算係黎屋企最近又未去過既球場，加上對手既球迷氣勢不嬲都唔錯。

星期日九點半出門口，揸車到最近既巴伐利亞某個火車站泊低架車就展開火車之旅。我地要先搭個半鐘車到 Würzburg，然後轉車再搭一個鐘鬆啲就到 Fürth。呢個城市同紐倫堡位於同一個交通網絡，可以搭地鐵就來往兩個城市。

到達後，我地先到市中心諗住搵野食。唔知點解啲建築物有一種英國味，全部都好古舊但又岩岩翻新完咁，好多樓都無人住。雖然係星期日姐，但洗唔洗靜到咁。係餐廳食完午飯就向球場出發。張 Bayern-ticket 除左可以搭火車之外，仲可以搭地鐵同巴士，所以我地由市政府站搭巴士去球場，5 分鐘都唔洗就到站。

落車既時候我見唔到球場，點解搭特別比賽日巴士都唔會到球場門口，跟住啲人行先知原來球場位於民居旁邊，要去到某一條小路先會見到球場射燈，然後穿過小路先會見到球場。

就係我地到門口時，個天就開始倒水咁落雨。好彩好快可以買到飛，主看台對面，35€ 一張飛囉！！！！德乙咋喎，Fürth 咋喎， 35€ 係想點？ 睇德甲我都算，仲要睇德國二流球隊我都唔洗比呢個價。

入場後我地經過球迷看台，好多球迷都響應球迷組織既活動身穿白色衫。入座後我地發現個位比上蓋擋左作客區，轉左幾次位最後去左最前果行，終於可以安安樂樂咁睇開波。 睇住主場球迷準備 choreo，打開幾條同看台一樣咁闊既膠布（留意，係一塊過！！！） 隱約睇到係寫住 SpVgg ，係唔知前面塊大字布寫左乜。

作客球迷一早就企滿左整個企位區，開波前間唔中唱下歌熱身。我地既位置比較近作客區，啲打氣聲我地都食得好應。 球員進場時，主場球迷就展開 choreo，原來係慶祝封王 90 週年。 有時真係唔係好解理點解啲德國人咁中意想當年，唔係 9 週年，而係 90 週年… （開波前球場都有廣播講當年封王既功神，其中一個個姓叫做 Auer，大家即刻笑左出黎！！！）

作客球迷同時都開始出力打氣，呢個時候我個頭又要兩頭望唔知望邊好。突然，我發現作客球迷組織既鼓手係一個女仔！！！！佢勁有氣勢咁係度打鼓超級迷人。我眼定定咁望住佢打住鼓又同時唱歌，好型呀～～～～

Aue 來自東德近捷克邊境，其實同我地上星期去既 Chemnitz 好近。 今次係我地第四次睇佢地作客（唔知點解咁有緣），而過去三場波佢地都輕鬆贏波，如果佢地今次再贏既話，我係咪應該要寫信去球隊叫佢地封我做吉祥物請我去睇下波？？呢隊波同好多其他東德球隊一樣有一個舊名，BSG Wismut Aue，但而家係 Erzgebirge Aue。呢隊波同史浩克一樣係一隊礦工隊，所以佢地其中一個打氣方式係舉起雙手打交叉，然後握緊拳頭。 每場波賽後，啲球員都會走到球迷面前，單膝跪下然後同球迷做出同樣手勢。

主隊 Fürth 長期活係紐倫堡既陰影下，球迷無人地咁多。但佢地既球迷區既人數超乎意料喎！佢地最少有兩三個人全場都一齊打氣，定係因為今場係開 league 戰所以個個都好有動力？

林志堅加盟傑志之前好似係踢 Fürth，由漢堡大城市走到黎小城市小球隊，再加上長期有傷，應該都無咩好日子過。 場波其實幾好睇，Fürth 有好多攻勢，但就係過唔到已經為 Aue 把關把左超過 10 年 Männel 既十指關。條友救左幾個必入球，但除左呢幾次黃金機會外，主隊都幾乎無埋過門。客隊其實無咩攻勢力，不過人地就係入到兩球！

完場前，電話震一震，收到天氣災難警報，末來兩小時會有暴雨。而正正在球證吹雞果刻，個天就開始倒水。好在我地好快可以上到巴士，返到市中心就去搭火車回程。途中望住遠處既太陽，但我地既頭頂係一大舊黑雲落緊雨，好複雜！！ 唔洗三個鐘就返到屋企，沖個涼就去訓覺，第二日去返工…

PS. 都係果句，其實成場波我都好擔心，好想專心享受場波但又好想知最新情況。最後我都說服到自己，做左自己呢刻想做既事先，反正呢一刻我都無野可以幫到手….. 球場真係唯一可以令我放鬆既地方。