21.07.2019
德國丙組聯賽 第 1 週 
Chemnitzer FC - SV Waldhof Mannheim
Stadion an der Gellertstraße
賽果: 1:1 (0:1)
入場人數: 7.381 (約 1000 名作客球迷）
更多相片

好似好耐無打過字咁，成個暑假雖然無波睇，但正正可以比我地可以好好咁休息一下。週末唔洗週圍去，可以出去行街買手袋。不過慢慢都開始掛住入場睇波，等到賽程一出就開始睇下可以去邊，然後發現方圓 200 公里內既都幾乎去過哂。

我不斷話好想好想睇德國後生仔唱歌打氣，唔想再睇超低組別既老人家。睇下睇下，越睇越遠，就睇中左前東德既馬克斯城 Karl-Marx-Stadt。因為佢地既對方將會係終於脫離地區聯賽既 Waldhof Mannheim，咁多年來第一場丙組賽事，氣氛一定唔會差得去邊。

由法蘭克福開車要大約四個鐘，沿路經過好多東德大球隊城市，係可見既將來我地應該會係成日係呢條路上面出發。路上仲有見到好多來自 Mannheim 既車，我地既車牌有機會被以為係 Mannheim 球迷，所以我地都唔敢泊車泊得太近球場。

當地人會 Chemnitz 同 Karl-Marx-Stadt 撈埋黎用。呢個城市可以話係德國最右既城市，好多右派活動都係呢度發生。 而城市叫得做 KMS，市內當然有一個超巨型既馬克斯象啦！好奇怪點解一隻蝗都唔見，佢地好中意去馬克斯既出生地拜訪佢出世果間屋，但係呢個曾經以佢地既偉人命名既城市竟然完全唔理！！

開波前大約半個鐘我地到達球場，場外見到好多人排隊，勁擔心會趕唔切入場。好在原來佢地只係排隊買飛，我地已經有飛就可以直接入閘。但啲保安勁 hea，勁多人連飛都無比人查就入到場。

我地買左近作客區既區域，坐最高果行，最後我地直接企係最後睇波。雖然個球場無咩特別，四四方方好簡單，但啲顏色配搭好靚呀！！！CFC 既主色係天藍同白色，所以佢地啲座位都係以呢兩種顏色為主。

主場既球迷區域滿座，而作客球迷就只係滿左一半，因為核心組織遲到…. 去到開波前大約 5 分鐘，佢地一大班人衝上看台，趕頭趕命咁掛起所有橫額，包括盟友法蘭克福都有黎助陣。係大台搞掂好哂所有野前，班球迷已經忍唔住自發唱歌打氣。等到鼓手準備好之後，果個氣勢終於出黎！！！！ 感覺十分之好！

Chemnitz 都係剛由地區聯賽升返上丙組，所以佢地既球迷都好興奮。有最少二百人會一齊唱歌，但作客球迷就幾乎全區一千人都一齊唱。話哂餓左咁耐，幾大都出盡力啦！ 同埋場上客隊踢得好過主隊好多，下下攻擊入肉，再加埋球證唔知點解亂咁吹比客隊拎哂著數；最後佢地 22 分鐘就開齋，射入丙組第一球！

Mannheim 又唔少熟面口，當中有我地近期最熟悉既 Kevin Koffi，佢上季下半季其實踢得好好，但呢場波佢又變返上半季咁兩碼飛機，單刀橫傳之類。

半場休息時，作客球迷忙住準備未能係開波前準備既 choreo。佢地係看台上面分派藍黑膠布，然後係看台前拉開一塊巨型橫額。等到下半場開波時，看台變成代表 SVW 既藍黑色，前面寫住 Unbreakable。

過去幾年對班球迷黎講絕對唔易過，連續三年升班失敗。前年嬲得濟搞到場波腰斬，又搞到球隊比足總罰錢又差啲被扣分。球會亦都罰班 Ultras 唔可以踏入佢地原屬既看台，又唔比佢地再係比賽日以外既日子入球場，同埋唔比佢地用球場地方黎放打氣物品。就連球迷聯盟都踢佢地出局唔比佢地話事。 但過咁樣係唔會動搖到 UM 要跟隨球隊既動力。而佢地都終於守得雲開！

下半場主隊成功追和，班主場球迷即刻醒神左好多。我地位處既普通看台都有唔少人開始跟住一齊唱歌同埋大鬧球證吹雞不公。好快就已經完場，對 Waldhof 黎講，今場絕對係丙組既好開始！

ps 香港最近發生好多事，連我身邊既朋友同事都會間唔中搵我問下香港情況。有時見客，當佢地知我係香港人時佢地下一句都會即刻關心香港。所以我都好慶幸覺得自己唔係孤身一個。