25.05.2019
莎蘭盃決賽
SV Elversberg - 1.FC Saarbrücken
Waldstadion an der Kaiserlinde
賽果：1:2 (1:2)
入場人數：6213 （約 4000 名作客球迷）
門票：€10 (€8)
更多相片

今年莎蘭盃既戲碼同上年一樣，唔同既係兩隊都只有贏莎蘭盃為目標。前年我地要爭升班，上年佢地要爭升班，今年兩隊都無份升班。唔知點解對呢場波無上年咁大期望，即使我地下半季贏 FCS，但果場波兩隊都無乜壓力。今場波人地一定出盡全力既爭冠軍…

亦都解釋左點解人地啲球員全部都咁落力，迫到我地既球員有氣無訂抖，係咁斷䌫甩腳…. 總之好快就睇得出我地唔會贏到呢場波。

賽前，雙方都準備左 choreo，主隊畫左隊長出黎，多謝佢過去幾年為球隊出心出力。而客隊就準備左藍黑旗海。好可惜莎蘭足總恐嚇佢地如果夠膽放煙既話，出年唔洗諗住踢莎蘭盃。

講返場波，對方開波幾分鐘就先射入一球。場內 4000 名作客球迷超大聲咁慶祝… 但好快我地就搏到十二碼追和。除此之外都唔知仲有無再中過龍。 Elversberg 最討厭既球員 Kehl-Gomez 今場波又食紅牌，上年佢都係食紅牌， 好可惜佢張紅牌對我地無幫助。近完場時作客球迷越唱越興奮，當球證吹完場雞時，佢地即刻衝哂落場慶祝…. 防暴警察都即時走落場係我地既看台前排成一條直線防止衝突。

我地識好多 FCS 既球迷，所以就算對方贏左都無話特別唔開心既，反正人地真係值得贏。我地既球員完場後一齊走到看台前同球迷傾計，下半季既轉變大家有目共倒，最後竟然可以以第四名完成今季聯賽真係好不可思議。試上下如果我地一開季就可以踢出水準既話，人地可以無咁容易就可以升到班！！

等到賽會頒哂獎之後，我地等到隊長 Grech 過黎。佢仲走上看同同每個球迷擁抱。球迷向佢送上賽前係看台前掛上既大橫額，然後一齊大合照。然後佢呢個暑假就會返阿根廷家鄉。

就係咁，今季正式完結～黎緊可能會睇多幾場地區升班賽，其他週末就要去買家具，終於可以有啲時間整靚間屋～ 同埋可以踩單車去郊遊～～～不過啲地區波我地唔會寫中文版啦，所以，下季再見啦！ （下季已經plan 左要睇柏林聯作客法蘭克福／緬恩斯／賀芬咸～～～～～當然要時間許可先去！）