01.05.2019
莎蘭盃 準決賽
VfB Borussia Neunkirchen - SV Elversberg
Ellenfeldstadion
賽果：0:6 (0:2)
入場人數：1200 人 （約 400 名作客球迷）
門票：8€
更多相片

好耐今睇過莎蘭盃，盃賽通常都係週中，我地無機會趕到返去睇。但呢場準決賽佢地㨂左係 5 月 1 日勞動節上演～ 比我地可以利用呢一日假期黎去睇波。

呢場波對本地人黎講有唔少意義，一來 Neunkirchen 既球場好舊好靚；二來 Elversberg 其實係 Neunkirchen 既一部份。而五月一日係德國興帶啤酒去行山，呢一日會見到好多人拖住架木車仔去行去。

球隊就借呢個機會搞一個行山活動，由 Kaiserlinde 球場出發行去 Neunkirchen 既 Ellenfeldstadion。平時開車 10 分鐘都唔洗，但我地當日就要行大約 2 個鐘。我地自己帶左四大箱啤酒，架拖車岩岩入左石仔路就已經爛左 哈哈哈哈。大家即刻要分工捧住啲啤酒行，完全無損大家既興致。球隊係中途站整左休息站，仲有野食比大家食，抖左大約 15 分鐘就繼續起行～

我地 12 點出發，最後 2 點 3 到達球場。場外當時已經有好多人。雖然我地同 Neunkirchen 唔係朋友，但亦都唔係敵人，總之一啲都唔危險。

Neunkirchen 曾經風光一時踢過甲組，前年我地見證佢由第 5 級降班落第 6 級後，佢地既情況只係雪上加霜。 佢地個球場好大好靚，但日久失修。球隊無成績，城市又無錢，呢個球場除時都會有被拆既機會

入場後我地企係主看台既對面，可以曬下太陽。SVE 多年前係呢個球場對過 Saarbrücken，但近年都未對過 Neunkirchen。 所以大家都好期待呢一場波。球證一吹雞就即刻好出力咁打氣，唔知係咪因為主看台既上蓋關係令到啲打氣聲好似好響咁！ 頭 10 分鐘我地不段唱歌，主隊竟然一啲聲氣都無。 佢地今場波有 Saarbrücken 既球迷黎幫手助陣，但佢地除左係圍欄前掛大橫額之外就無乜點出聲。

又或者佢地根本對呢場波無咩期望卦…. 開波幾分鐘都無就已經被 SVE 先射入一球，然後好快就有第 2 球。 半場時，我地去左球場出面買野食。

你知唔知莎蘭最出名係咩？ 唔係足球，唔係啤酒，而係燒烤。你問莎蘭人最自豪係咪，我肯定佢地會答你 bbq. 仲要唔係普通圓圓地果隻燒烤炭爐，而係三角搖下搖下既爐，仲要係木黎生火！ 係球場外就係有個大肥佬，拎住枝雪加黎燒野食。莎蘭鄉下話叫個三角爐Schwenker，負責燒野食既人係叫 Schwenker，燒豬扒都係叫 Schwenker。 而我最愛既食物就當然係 Schwenker! 4€ 一塊超肥超厚既豬扒包，超好食呀！！！！！！

買完塊扒然後買多三杯野飲就入返場，當時岩岩開波，到我企返埋位時 SVE 又入多一粒。然後唔知做乜勁快入多三球，大炒六球之後大家都唔再咁落力。臨完場前主隊既球迷突然好落力打氣，可能想話比球隊知佢地會不離不棄？

完場後，好多 SVE 球迷都留左係度等球員過黎一齊慶祝。大家一齊唱歌希望可以贏到莎蘭盃，慶祝完後，大家又等埋做緊訪問既領隊，一直係咁唱佢個名。佢做完訪問後向球迷方向行去，然後雙手放係心口再鞠躬致謝。就係咁，莎蘭盃決賽戲碼會同上年一樣，SV Elversberg – 1.FC Saarbrücken 🙂