21.04.2019
捷克甲組足球賽聯 第 29 週
AC Sparta Praha - MFK Karviná
Stadion Letná
賽果： 1:3 (0:2)
入場人數: 10.425 (25 名作客球迷)
門票：190czk (約 7€）
更多相片

黎到第三日黎到捷克甲組既賽事，因為已經係倒數第二場波，所以全部比賽都係同一時間開波，而我地就㨂左去睇 Sparta。 一來我自己想再返去自己既舊主場，二來 Stadion Letna 好似話就快要重建，所以要盡快入場！

場波五點先開波，即刻我地有一整日可以去先去做遊客。 朝早先去市中心同埋舊城行個圈，行到咁上諗住搭電車去某一個站，點知個站因為維修所以架電車要兜路。兜兜下我地完全唔知去左邊，最後我地決定留係山上面，先去 Sparta 果度行個圈先再落返城。

去到 Hradcanska 要轉車，點知上錯車去反方向，我仲係咁話點解條街唔同左樣。峰迴路轉咁終於去到 Sparta 站落車。距離開左仲有四個幾鐘，但場外已經有啲後生仔係出面坐，我地就圍住球場行個圈，睇下最新既 graffiti。

行左成朝已經好攰，我提議不如留係山上面，搵間 kebap 店食晏。原先諗住去超市買幾枝啤酒去公園度飲，但其實去超市買酒勁唔抵，因為係餐廳飲平超多！我地決定搵間餐廳，坐係出面飲仲好。點知行左勁耐都搵唔到一間有得坐係出面既餐廳，最後回到起點決定入第一間見到既酒店。當然…… 我地唔小心就㨂左 Sparta 球迷既聚腳地。 入面有一區係球迷組織既人飲到勁 high，我地入去既時候勁多驚訝既眼精望住我地，好在我地睇落唔似球迷，侍應都比左張原本話 Reserved 既枱比我地坐。侍應姐姐超開心聽我用捷克文點啤酒～服務勁好。

就係咁，我地係酒吧坐左兩個幾鐘，每人飲左三杯大啤酒，然後就慢慢行去球場。呢個球場其中一樣出名既係佢地既告示牌，唔可以帶玻璃樽之類，佢地有圖話唔可以帶炸彈同手槍 😀 我地想要果區無哂三連位，唯有求奇㨂一區坐。入到場先知我地㨂左龍門正後方，要比太陽曬又乜都睇唔到。見到啲看台無保安睇住就即刻走去上層搵位坐。好在今場波都唔算賣哂，我地可以好安樂咁坐到完場。

呢個球場我有唔少回憶，當年第一次入場其實係為左睇歐霸畢爾包黎作客。賽前一日佢地有記者會，仲有公開操練。我既 professor 叫我可以去記者會，話學生就係要去學野架啦，聽完佢咁講我就我膽粗粗去球場門口既記者招待區話我係香港黎既學生記者想入去學下野。佢問我拎證明文件，我話得學生證，佢地研究左好耐，佢地話：「正常你就要一早申請定記者證架。但一申請就係申請成個賽事既，無得單為一場波申請架。 咁啦，你去閘口睇下啲保安比唔比你入等佢地話事啦。」

咁我就好驚又表現到好誠懇咁同保安講話我想黎學野，我比張卡片佢睇，佢望左兩眼就放我入去！！！！！點解歐洲啲保安好似成日都好求奇咁。。。咁我就入左去記者室，可以拎一大本賽事資料，仲有免費咖啡同蛋糕。場內既真記者個個用奇異眼光望住我，佢地個個拎住記事本或者電腦，總之一切記者應有既用具。而我就一手拎住蛋糕一手拎住本資料用超興奮既眼光望黎望去，搵到個位就坐。

啲人實以為我黎玩野，因為成個記者會都只係西班牙文（或者係巴斯基文），同埋有個捷克翻譯，一句英文都無….. anyway，學野係假既，見到啲球員先係真！記者會完左，賽會就叫啲記者入去球場影佢地操練。坐滿人既球場當然震撼，但估唔到我第一次入 Letna 時，四個看台都係吉既，場內只有射燈同埋班畢爾包球員。

十五分鐘過後，賽事職員就趕大家走，話佢地既閉門操練要開始。我同個職員講 我由香港黎架，可唔可以比我留耐少少。 佢話：「好可惜呢個決定係畢爾包球隊既決定，如果呢隊波係 Sparta 既話佢就可以話事比我留低。」 好啦，咁就唯有跟隊走人～～

講返場波！個球場當然係由紅藍為主，四四方方睇落唔似係一個舊球場，但其實都已經有啲歷史。我地個位唯一既唔好處就係望唔到下面既作客球迷。但好好彩今場波既客隊無咩球迷，都唔預會有好多人入場。而 Sparta 既實力理應高過客隊，但係場波越睇就越唔對路。對住下游球隊，Sparta 竟然完全無威脅。失左第一球波後，班主場球迷即刻更加落力打氣。 除左我地對面既球迷組織外，我地附近既普通球迷都勁大聲咁一齊嗌 Sparta! 同埋會一齊唱歌。 唯有我唔係好中意既就係佢地勁多支反死敵 Slavia 既白色旗仔，反而無乜用自己球隊既旗。Sparta 既球迷組織唔係話好震撼，但佢地一大班人唱足全場。不過講場面既話，有另外幾隊捷克組織更加有氣勢，所以我地一定要再返黎見識下！！！

半場時，客隊領先兩球。 我地好少會半場休息時去買野食，但當日好想食腸同埋好口渴，點知排左 15 分鐘都未到我地。仲要去到收銀前先發現佢地啲腸係用油煎唔係用火燒既！！！！！最後只係買左枝茶….. 超失望。

下半場 Sparta 踢法完全無好轉，仲比對方射入第三球。下層既作客球迷超開心咁慶祝。去到尾段主隊終於成功開齋… 完場後我地行去睇二個位，終於見到班作客球迷，有大約 25 個人同自己既球員慶祝贏 Sparta! 然後我地就離場，經過公園行落山，再搭電車去我其中一間最中意既酒吧～～～～

我地已經諗住下年復活節要再返布拉格～ 可能會變成我地既復活節傳統 :-))))