20.04.2019 捷克丙組聯賽 第 24 週 FK Slavoj Vyšehrad - SK Převýšov Stadion Evžena Rošického 賽果：2:0 （0：0） 入場人數：約 150 人 門票：50czk (30czk) 更多相片
捷克既低組別聯賽通常都係朝早 10 點 3 就開波，好彩既話可以一日睇五場波。但我地就只係想睇一場波然後去做遊客。布拉格一個大城市入面有分唔同既細區，所以佢地有啲球隊就算係來自布拉格都唔會有布拉格係名內。呢場波可以話係星期六唯一既選擇。首先因為臨近季尾所以幾乎個個聯賽都同一時間開波。甲乙組就星期日踢，丙姐就今日踢，淨係得呢場係布拉格，其餘都走左去作客….
Vyšehrad 係其中一個遊客可以去既地方，係地鐵站一出行十分鐘左右就可以去到 Vyšehrad 城堡公園既山頂，可以望住 Vltava 河享受風景。上網睇左佢地既球場由地鐵站穿過公園再行大約 5 分鐘就到達。
我地大約 9 點半就到左地鐵站，大約 15 分鐘就到左球場。 我朝早特登食少啲，諗住係球場可以食 Klobasa。 去到球場時真係打左個突，一來無人賣飛。我地笑住話估唔到丙組仲平過頂組。 然後就係球場旁邊係度起緊野，可能係更衣室或者餐廳。最慘係無人賣野食又無人賣野飲….. 要捱住餓睇波。
捷克啲球場通常都位於住宅區，呢個小球場都唔例外，被旁邊既住宅圍住。好啦，個球場無咩特別，但天氣咁好又唔洗比錢，當曬下太陽都好。
同上場波一樣，係球場內見到幾個 Groundhopper，有啲仲已經打左卡。去到 10 點鐘，啲球員無啦啦分開兩邊，球證走去中圈然後吹雞開波。 我地完全係黑人問號，乜唔係 10 點 3 開波咩？ 用相機zoom 去啲球員度睇，佢地波衫上寫住既球會名唔係 Vyšehrad 又唔係 Převýšov。 我地係咪去左平行時空？？？？
然後！！！上網搵到原來今場波根本唔係係呢個球場踢，而係去原本已經停用左既Stadion Evžena Rošického 。 一路上我地係咁話好可惜唔會好難先會再有比賽係呢個球場上上演。（後來睇相先發現門口貼左張紙話轉左場，我地完全無視左佢）
但個球場係山上面，無車可直達，當時 10 點鐘，睇下 google maps 已經無左 5 分鐘，我即刻話截的士趕去。問題係係歐洲唔係好似香港咁易見到的士… 好好彩附近有間 Holiday Inn。 諗住酒店前邊實有的士係度等客，不過呢度真係唔係香港又唔算市中心…. 同時見到有兩個頭先係球場既人係門口好似都係等緊的士。我估佢地同我地一樣突然發現去錯球場。
由於呢場波係一個平時無機會可以去既球場踢，所以我地決定一定要趕到去睇。 去到酒店門口我即刻走到櫃台，叫佢幫我 call 架的士。 想當年剛到步同離開時我都係搭的士去機場，同香港差唔多價錢。今次睇左路程應該都係 15 分鐘左右車程應該都唔會貴得去邊。
等左 5 分鐘，櫃台姐姐就黎同我地講的士到左叫我地可以出去，係門口迎接我地既係一個西裝友，佢帶我地去佢架 ben屎度…. 上面寫住 Hotel Car. 心諗 仆街！佢功好服務咁幫我地開門關門，英文又講得好好咁介紹自己。 香港啲酒店 call 一次酒店車要 500 蚊左右 （好似係），但我明明叫既係的士唔係酒店車… 但呢個時候我地都唔理得咁多。
架酒店車穿過市中心，然後經過布拉格城堡，條路我以前日日都搭車經過！！去到某個位就開始上山，唔洗十分鐘我地就到左球場門外。 佢話：盛惠 460czk～ 最後我地比左 500czk 即係大約 20€。 但我地三個人除返開即係每人 7€ 左右，真係唔算貴。 我地係咁話好在搭的士黎咋，如果唔係既話就要由山腳行奪命斜上山，行到上去球場可能都已經踢完！！！（後來我上網睇的士網，佢地預價我地呢個路程唔洗 300czk :-)，算啦，都過左去）
搵到門口入場時，我地就先買飛，見到波飛既價錢即刻笑左出黎：正價只係 50 czk，然後 女人再平啲 🙂 就算我地將的士錢計埋入波飛價錢，唔洗十歐就可以去到呢個球場睇波真係超抵！！！！！ 入到場後好開心咁係咁爆粗，係咁話自己好好彩，只可以怪唔認真啲 check 比賽資料。
黎到呢個大球場，都係無人賣野食…. 但我都完全無投訢，佢肯開門都算係咁！！ 只係啲座位既塵厚左啲咁… 要去門口拎幾本場刊黎坐。
山上面除左呢個球場之外，仲有一個小球場同一個巨型運動場。旁邊既 Strahov Stadium 場內有 9 個球場 （好似跑馬地咁），但圍住呢 9 個球場既唔係馬場跑道，而係巨型看台，一個可以容納 25 萬人既看台！ 現時有幾隊低組別球場都會係某一個小球場比賽，另外 Sparta Prague 都用呢個球場黎做訓練。
而我地既 Stadion Evžena Rošického 曾經係捷克國家隊既主場，二千年左右Sparta 死敵 Slavia Prague 都用過黎做主場，佢地搬出後有唔同既布拉格球隊都用過黎做主場。 後來佢地都有自己既主場，呢個球場就變左好似臨時場咁間唔中比人用下。
影夠相後，我地就坐低欣賞下個球場。射燈，作客看台，座位分布之類，全部都係歷史！上半場好難專心睇波，下半場都唔容易…. 因為朝早我特登留肚諗住係球場食腸，點知乜都無得食… 又熱（係企太陽下）又凍（係陰影下，超大風），又肚餓，淨係係度諗到底幾時先完場！！！！主場最後射入左兩球波，開心大結局。完場後，我地去尋找旁邊既巨型 Strahov 球場，球場外既閘口同門都已經爛哂，甩哂肥，又係歷史既痕跡…. 雖然入唔到場，但有啲位都仲可以望到入去可以影到幾張相。
然後就要行落山，一路行就一路話，如果一開始要行呢條路上山既話我可能會寧願唔睇波！！！！落山後，見到第一間餐廳就衝入去食野。遊客區既餐廳對我地黎講已經唔算貴，呢間餐廳再平市區一半！！ 我係捷克住左咁耐真係未試過有野係唔好食既（食素既朋友就未必生存到）。場波完左先十二點，食飽飲夠之後先一點，仲有成日可以慢慢做遊客，搭電車去市中心，然後就帶朋友去睇城堡～～
明天仲有一場甲組等緊我地！但我地知道今日呢場波一定係成個旅程既精華。今次未完已經想計劃下次再返黎…