19.04.2019
捷克丁組聯賽 A 組 第 22 週
FK Admira Praha - FK Spartak Soběslav
Stadion v Kobylisích
賽果：2:1 (2:0)
入場人數：322
門票：20czk ／ 0.80€（40czk）
更多相片

一早就睇定復活節要離開德國去第二度睇波，但復活節呢啲旅遊高峰期去邊都好貴，機票貴，酒店又貴，問題係我地又請唔到假去偷多一兩日，最平又最方便既一定係自己揸車去玩。望下個地圖，問下有無朋友一齊去，最後決定向東走 － 布拉格！

布拉格曾經係我第二個家，果度有好多好美好既回憶，所以我絕對唔會 say NO～ 由法蘭克福出發布拉格要大約 5 個鐘左右，要趕得切呢場波就要一大朝早 7 點半就出發，好好彩咁無遇上塞車，最後仲早過預計時間到達布拉格市郊～ 仲可以係正球場門口泊低架車！

布拉格係捷克既首都，有好多大大少少既球隊，諗住復活節呢四日可以睇到四五場波。點知今個週末係賽季倒數第二週，即係所以比賽都會同一時間開波…. 我地計劃只係留係布拉格，架車只係用黎來回德國，好在低組別聯賽都仲有啲選擇比我地㨂下。

係球場泊低架車後就先去搵銀行㩒錢，唔係連波飛都買唔到。點知有錢都差啲買唔到飛！ 現時1蚊港幣對大約 3 czk，一張學生波飛只係 20czk，正價 40czk，我地三人加埋只係 80czk，但我地身上只有 1000 蚊紙…. 好在售票姐姐佢銀包有啲散紙可以同我地唱。我之前學既捷克文估唔到咁多年後仲用得著….

入場後，我地先去個廁所，然後經過正門行去買捷克球場名食 Klobasa。行到去正門時，撞到一個之前一齊係香港睇過波既 groundhopper，仲有另一個之前一齊係德國睇過波但無再聯絡過既 groundhopper。 突然之間我地既三人團變成五人團，一齊買啤酒同 Klobasa 就搵個可以曬太陽既位坐低傾計聚舊。 佢地來自西北部 Osnabrück，佢地隊波只要明天唔輸波就正式升上德乙。 不過今個長假咁好天，唔去第二度睇波真係對唔住自己，佢地淩晨三點出發開車到捷克北部睇十點三早場，然後睇兩點呢場，再睇五點一場波先再返德國，幾乎直踩到第二日下午去準備慶祝自己隊波升班。 我自問真係無咁好精力可以咁樣長途拔涉一口氣睇三場波

食飽後就去看台搵位坐，一路睇波一路傾計，無諗過去到咁遠都可以相認到人。場中仲有好多德國人，而佢地同樣撞到好多其他認識既 Groundhoppers，有唔少人都係星期五黎一日遊，然後週末就返德國睇自己隊波。我地就比較自閉無話成日特登走去識好多人，今次借朋友可以同其他交換下情報學識左更多野！最後有 30 個人係呢個球場打卡！ 呢四日假都係萬里無雲超好天氣，所以見到咁多人走黎睇波飲杯啤酒完全唔出奇。

呢個球場既主看台係一個四四正正有上蓋既看台，而我地就企係對面係斜坡搭出黎既草／石看台。最早要係想上星期係雪下睇波後即刻好掛住個太陽，一有機會就想同陽光玩遊戲。

捷克既低組別聯賽係唔會有和波呢回事，如果法定時間未能定出勝負既話就會進入互射十二碼。主隊 Admira Praha 黎到季尾一直企係榜首，只要守住個位下季就可以升上丙組，今場只要佢地全取三分就篤定升班，而佢地都好輕鬆咁係只係排中游既對手身上拎到三分。

完場後同朋友道別，佢地繼續去第二度睇波，我地就去 check-in，休息一陣就去市中心同另一班朋友食飯，重回當年我第一次到達布拉格時，朋友帶我去既餐廳食返同一道菜，然後飲返幾杯最正宗既 Pilsner 啤酒～ 布拉格被譽為東歐最貴既城市，但對遊客黎講真係天堂….

可惜今晚我地唔可以係市中心留太耐，因為第二日我地要一早起身去睇波。捷克既早場係朝早 10 點 3 …..