13.04.19
德國西南地區聯賽 第 週
SV Elversberg - 1.FC Saarbrücken
Waldstadion an der Kaiserlinde
賽果：4:3 (4:3)
入場人數：3413 （2000 名作客球迷）
門票：6€
更多相片

今場波…. 只可以用神奇黎形容。兩隊波黎到賽季呢個階段已經無野好爭，無人要搶分爭升班，無人要護級，火藥味都無乜。

呢兩星期我一直係度話萬里無雲，藍天下曬太陽好舒服。今日，佢竟然落雪！！！！仲要唔係淨係凌晨時候落，係由朝落雪落到 4 點左右。不過地面溫度都仲有 3－5 度，啲雪一落地就會即溶。但我唔明四月要係雪下睇波係想點！！唔知以為就快到聖誕，搞到大家都忍唔住一齊唱 Last Christmas.

上半場我想影幾張相，所以自己企係角落睇波。8 分鐘，客隊先得十二碼，佢地好開心咁慶祝。5 分鐘後，我地又有十二碼，輕鬆追和。然後我地一口氣再入多兩球，無啦啦反超前。

原本對方球迷既氣勢可以反客為主，但我地領先後，大家都開始更加落力打氣。唔出聲都會跟住一齊拍手。但正當我地以為可以食下花生時，對方又連追兩球。心諗咩料，半場未到就已經有六個入球。

但上半場唔只六球，完上半場我地再黎多一球，半場比數 4：3。 唔知係咪兩隊波都無壓力咁比賽，有波在腳就向前攻。隨左果兩球十二碼，4 個入球都係來自流暢既組織，由後場到入波都係三四腳波之內完成。 不論係我地既後防定人地既後防都只可以企係度睇。

去到下半場大家開始懶散咁踢，無上半場咁刺激。我地話下半場一係黎多 7 個入球，一係就悶到完場。最後就係無入球啦；但我地都好開心可以擊敗同州勁旅～

不得不提既係早兩季由 SVE 轉會去 FCS 既某一位球員，我諗過去我都有提過。今場波佢黎到我地面前開角球或者甩波時，成個看台都一齊叫佢食屎。 最正係佢真係聽到我地話佢，仲要比回應。唔明佢點解過左兩年都仲唔化。 轉左會咪又係要同我地一齊踢地區聯賽～ 好威咩？

完場後，我地好快就離場，返去點火開暖爐暖身。下星期我地會去鄰國過復活節，暫時計劃左總共會睇四場波～ 希望到時一切順利～～