06.02.2019
德國西南地區聯賽 第 28 週
SC Freiburg II - SV Elversberg
Möslestadion
賽果：2:0 (1:0)
入場人數： 400 （約 30 名作客球迷）
門票：6€ (5€)
更多相片

成為都市人既結果就係唔可以成日去睇鄉下波，要南下作客既幾乎都去唔成，但今次作客 Freiburg 係一早計劃左要返 Elversberg 再跟大家一齊搭球迷巴士出發，感受下久違既作客氣氛！

星期五晚一放工就揸兩個鐘車返到 Elversberg 唔洗第二朝咁趕。由 Elversberg 去 Freiburg 要大約 3 個幾鐘，穿過法國東北部，經過 Strassbourg 然後就好似到達目的地。唔知點解呢場波 3 點先開波，球迷巴士可以 10 點先出發；最後仲早左成個半鐘就到左！！

巴士駛經 Freiburg 市中心時我順便走馬看花一下，呢個城市細細地但好舊好靚！之後有機會一定會再黎多次做遊客慢慢遊下呢個城市。 今場有近 400 年走黎睇 2 隊比賽，可以話係好多人！ 當中仲有 1 隊既球迷組織走黎睇實我地，過往佢地都會入場監視我地既舉動，曾經更加有近 20 人成場波望都無望過草地，一班黑衣人真係牛咁眼咁企哂係度。

除左球迷之外，仲有唔少 1 隊既球員都入場睇波。有幾個仲好中意坐係我地後面聽我地 9up 娛樂下自己。 而我地因為好耐無坐過巴士作客所以好興奮，一枝枝啤酒咁係咁飲，開心到波都無專心睇。反正呢個球場就好似有魔咒咁，我地知道無咩機會會贏波。

果然，隊波成場毫無組織咁亂咁踢，一個係中場發生失誤就導致第一個入球。入埋第二球我地就知翻身無望。雖然今場踢得差又輸波，但大家都好似預左咁無人鬧過啲乜。 今季我地既目標得返莎蘭盃，升班已經唔關我地事。餘下比賽就好似用黎練陣式咁。

另一邊，Mannheim 一早係榜首已經遠遠拋離其他球隊。下場佢地作客死敵只要贏波就可以宣佈升班。而我地就主場迎戰同州對手 Saarbrücken，好有機會係 pre 莎蘭盃決賽，希望我地頂得住唔會比人大炒～～