30.03.2019 德國乙組足球聯賽 第 27 週 SV Darmstadt 98 - SSV Jahn Regensburg Stadion am Böllenfalltor 賽果：1:1 (0:0) 入場人數：10,385 (500 名作客球迷） 門票：26€ (24€) － 座位 更多相片
連續三個週末都去老遠睇波，今個星期係時候留返係自己地頭睇下本地波。係 Hessen 州入面可以話所有大家求奇 up 得出既球隊都睇哂，就係差 Darmstadt 未去過！咁岩今個星期 SVE 場波可以話無關痛癢（最後大炒 5：0），可以比自己偷下時間去睇波～
睇德乙最好就係星期六 1 點就開波，即係睇完波先 3 點，仲有成個下午可以去行街享受週末！Darmstadt 可以話係正我地旁邊，唔需要預太多時間出發，一早仲可以去超市買埋餸先開車～ 我地先揸車到 Langen 火車站泊低架車，然後轉搭火車 10 分鐘唔洗就到 Darmstadt 火車站。 唔直接揸車去球場係因為佢地收 10€ 停車費，我緊係唔會比啦….
今日比上週末更加好天，氣溫有成 20 度，我地連褸都無帶就咁著短袖衫出去，超明智既決定，最後我地係太陽下曝曬左兩個鐘。三月尾成功黎今年第一個 sunburn! 到 Darmstadt 後，我地先去市中心兜個圈，食杯雪糕然後就搭電車直達球場。 一落車就已經係球場入口，入場時保安查飛時見到係優惠票，即刻話要查學生證。睇咁多次波第一次真係查學生飛＠＠ 就係咁張學生證到期前最後一日有史以來成功發揮作用 😀
入場後我地即刻搵自己位坐低，買飛時特登㨂呢一個區既頭幾行，因為第六七行左右開始會有枝柱阻住視線，一定要坐最前先可以視線無阻，仲可以好安樂咁睇左兩邊既球迷。
有留意開德甲既一定唔會覺得 Darmstadt 呢個名陌生，早幾年先踢完德甲～ 佢地十年內由第四級聯賽碌下碌下好好彩咁趁人地破產而成功護級，然後一口氣爆左上德甲，雖然佢地唔係第一次踢德甲，但佢地以一隊無乜錢洗真係靠自己而升上德甲，係現今既商業足球下真係一個奇蹟。 當佢地越踢越好慢慢升班既時候，佢地已經知道自己個球場會唔合乎足總既規定，所以一直都有計劃既重建球場。佢地個球場唔係唔夠大，只係足總規定德甲球隊要四邊看台都有上蓋。直到佢地升上德甲可以有三年時間去重建，佢地就開始趕工，拆左南北看台，然後用鐵皮極速起兩個有頂既看台。不過去到 16／17 年季尾佢地知道護級無望後，球隊就即刻將工程拖慢。呢個重建完全搞死左一個原本好大好靚既典型德國運動場….
六年前 SVE 歷史性升上丙組時亦曾經係呢個球場作過客，往事只能回味… 東看台現時拆左一半，只有作客看台好零丁咁棟左係度，而近南看台既部份就只係一 pat 啡色既泥土，前面好似 Hollywood 咁插左 Böllenfalltor （球場名）…. 而我地既 N1 北看台就只係一個鐵通看台，就咁係舊有既彎型看台上搭出黎….
我地既座位位於北看台，南看台係球迷組織集中地；左手邊就係作客看台。入場時見到作客看台無乜人，心諗 Regensburg 姐，預左唔多人啦。 但越接近開波時間，佢地啲人就慢慢湧現，可能原先係看台底嘆緊啤酒避太陽。 見到佢地看台前有塊白布，有幾條友打開左紅白色既遮，應該準備左開波前有野要展示。果然，當球員入場時佢地幾百個人一齊打開紅白遮係咁轉，感覺好開心好治療！！！看台前大大塊大布報寫住 REGENSBURG。
而主場球迷就一齊唱會歌，一開波就叫大家企起身拍下手咁…. 然後…. 都無乜特別。最煩係我地果區超多小朋友，佢地係咁講野好鬼嘈！！！！我一直係度諗 到底係啲小朋友太嘈所以我地聽唔到對面看台班球迷組織，定係佢地真係唔太聲？ 直到啲小朋友去廁所，耳根清靜返啲既時候… 都仍然聽唔清對面唱緊乜。 有時啲球迷唔大聲，但聽到啲旋律都好快估到佢地唱乜，但呢度真係聽極都聽唔清！
左邊主看台有幾塊英國旗同埋用英文寫既橫額，就咁落去果個角落都已經好似英國睇波咁，一堆人企左係度，然後間唔中有條友帶起唱歌。，一首係 We love you Darmstadt we do…. 仲有 the boys in blue。 英國人真心淨係唱黎唱去都係果兩首，同埋都係果幾隻字… in blue, you reds, dhjfahkj boys 之類。除左佢地之外，其他球迷都成日會一齊拍手同唱幾句，呢樣就真係同其他球隊唔同！其實係因為球場重建工程動工後，原本同球迷組織企埋一齊會唱歌既人全部四散到唔同既看台，即使現時佢地分隔一個草皮咁遠，但佢地有時都會跟埋一齊唱歌。
上半場客隊比主隊多好多攻擊，但我地既開細魔咒仲係解除，上半場無入球。下半場主隊越踢越順，向住我地呢邊狂攻，然後首先係 55 分鐘射入今場首球。但 Regensburg 係 15 分鐘後成功追和。雖然最後得呢個入場，但成場波都算緊湊。
本來我地係諗住即場先買飛，因為兩星期前好急先決定睇呢場波，當時網上賣飛只可以有 print-at-home ticket。最後我地為左可以免費搭車都係要左張 A4 紙，好彩一早買定先，因為當日爆滿～一票難求！！
完場後，睇埋啲球員走到各自既球迷前致謝後，我地都離場搭電車返去市中心。 3 點鐘左右完場，可以話仲有全日可以慢慢做其他野。食飽後去超市買多少少野，然後就返屋都未天黑～黎緊應該要睇多啲德乙，啲時間太靚！