23.03.2019
德國西南地區聯賽 第 26 週
SC Hessen Dreieich - SV Elversberg
Sportpark Dreieich
賽果：2:3 (0:2)
入場人數：523人 （約 60 名作客球迷）
門票：9€
更多相片

呢個星期氣溫再次回升，日日晏晝都有十幾度，藍天白雲陽光普照～完全係去睇波既好日子！係太陽底下飲住啤酒睇波… 呢個 moment 我地等左好耐啦！！！

今場波 SVE 作客 Dreieich，唔洗問都知無人聽過呢隊波。我都係上季佢地接近升上地區聯賽我先第一次聽過 Dreieich 呢個名。呢個小鎮位於法蘭克福以南大約 10 分鐘車程，係機場既東南既位置，係一個無咩特別都唔會去既地方。

由屋企出發，我地都係只需要 25 分鐘左右～離球場大約 10 分鐘路程有停車場可以泊車，由停車場行去球場只係見到草同幾間屋，感覺好似去緊睇超低組別既超級鄉下波咁！球場無咩特別… 我叫黎出trip 既同事一齊去睇呢場波，比佢地睇下個球場之後佢地話似大學運動場所以無興趣，搞到我有少少覺得人地山長水遠黎到德國然後叫人去啲咁既球場睇波有啲唔好意思 😛

圍住球場行大半個圈後終於去到作客看台，雖然買既係企位飛，但好在佢比我地去作客座位區，因為企位區真心唔知想點，超高既鐵欄勁阻住視線，睇得出呢個區係後來求奇搭出黎，完全無係球迷既角度諗過！

法蘭克福離 Elversberg 只有兩個鐘左右車程，唔算遠，可惜今日連埋其他朋友黎助陣都只係得 60 人左右；當中核心成員更加只得 6 個…. 所以佢地個個好激氣。再加上班老球迷係巴士上面狂隊酒飲到醉哂，係咁亂咁唱歌，搞到大家覺得好難頂。 其實班醉酒佬有時可以好好咁被「利用」，只要我地帶頭唱歌佢地都一定會跟住唱仲會大大聲唱，但今日係比佢地帶返轉頭… 上半場內訌咁係度鬧交。

鬧交既時候 SVE 就已經入左兩球，第二球係一個反擊，由後場去到入波已經四腳波就搞掂！！！半場時候大家終於平心靜氣傾下計，但大家都已經有啲放棄唱歌既心態。枝鼓棍直情比左其他一個醉酒佬控制～如果以旁觀者角度黎睇成件事超好笑，一個半裸既阿叔企係看台前跳黎跳去 （係東歐或者意大利好多呢啲阿叔，但人地係真係熱血打氣唔係醉酒玩野）

互邊後一開波主隊就追返一球，比數終於開大～～～～ 然後雙方再各入一球，睇比數好似好緊湊咁但成場波 SVE 其實都踢得好輕鬆 ，後來人地黎個兩黃一紅踢少個，我地都唔再擔心會失分… 拎埋黎 3 分又比我地爬到上聯賽榜既第 7 位。

今季邊隊升班已經好清楚：Waldhof Mannheim。 佢地係榜首遙遙領先 10 分！！！ 我地只能用今季淨返既賽事練兵然後期望下季能夠贏冠軍升班。 睇完呢場波就緊接下場係法蘭克福市中心睇 Rot-Weiss Frankfurt… 第 6 級聯賽。

佢地既主場 Stadion am Brentanobad 同時係女子德甲球隊 FFC Frankfurt  既主場。 係場內可以遠望到市中心既大廈～ 入到場睇啲海報我先知原來高普曾經為呢隊波效力過一季，當時 RW Frankfurt 係附近賽輸波升班失敗，所以佢後來轉會去緬恩斯踢到退休…. 然後佢成為隊波既領隊…. 如果唔係 RW Frankfurt 升班失敗，可能佢就會留隊繼續踢，然後佢地成就可能會完全唔同..