16.03.2019
德國西南地區聯賽 第 25 週
SV Elversberg - TSG Hoffenheim II
Waldstadion an der Kaiserlinde
賽果：1:0 (1:0)
入場人數：773 人 （3 名作客球迷）
門票：8€ (6€) - 企位
更多相片

仲記得歇冬前我地忙住搬屋忙到連波都無時間睇，最後一次睇 SVE 已經係十一月尾既事。到二月左右終於開始得閒啲又未開季，開季之然連續四場週中波，完全唔知趕得切。就連嘉年華週末有好野玩我地都無份一齊玩。

唔知你地仲記唔記得，呢兩季我地由犯眾憎既 Roland Seitz 做領隊加技術總監，佢上任後隊波踢得一塌糊塗，歇冬前大部份時間係降班區徘徊。隊波毫無組織，無策略，輸左波條友仲話隊波踢得好好話我地針對佢喎。鬧下鬧下終於比我地成功鬧走左佢；新領隊上任後第二日就要作客 Balingen，輸左。果陣我地好擔心隊波真係玩完。點知歇冬後連續五場不敗入 15 球波，只失一球，係去到上場老遠作客先失一球輸波。

今年我地睇左 7 場波後，平均入球率都係得一球左右 （上年平均有 3 球）-_- 今場波呢，未開波我地都知道一定會 1：0 完場囉。。。

星期六當日，我地 10 點由法蘭克福出發， 12 點左右到 Elversberg，食啲野之後就去球場。三個半月後我地終於可以返黎睇返場波啦！！！雖然對手只係廢隊，但起碼有得入場食野飲返杯啤酒嘛！

今場波雖然只得一個入球，仲要係十二碼，但隊波既踢法進步左。 有人會係邊線接應，有人會走位，最重要係大家終於有返默契，唔知 9 跑 9 傳波…. 唔能夠大炒對方只可以話係唔好彩！好多攻勢最後都以射門作結，唔係係中場傳失，或者發夢踢甩之類既激氣波。

下半場無上半場咁緊湊，Block C 都靜左落黎。突然之間有隻烏鴉低飛企左係我地正前面既喇叭上面，然後鴉鴉聲係度叫，烏鴉都兼球場太圖書館！！！德國啲烏鴉超大隻好恐怖，又唔怕人，呢隻野似係想趕我地走添囉。 Anyway，入球唔多，但成場波都算輕鬆～ 完場後，我地把握難得既機會去法國既超市買面包同零食返法蘭克福….

有時真係有啲掛住鄉下，因為以前條村近法國／盧森堡，所以超市賣既都有唔少法式面包。法式面包除左有長法包之外，仲有牛角包，排包軟綿綿既包類。係法蘭克福係搵唔到的…….. 所以我地去鄰國掃貨～滿載而歸返屋企過週末。

下週末 SVE 會黎法蘭克福，所以我地可以係主場睇作客波，可以訓晏啲～～