09.03.2019 德國東北地區聯賽 第 24 週 BFC Dynamo - FSV Optik Rathenow Friedrich-Ludwig-Jahn-Sportpark 賽果：1:0 (1:0) 入場人數：421 （無作客球迷） 間票：12€ (8€) 更多相片
靜左兩個星期，終於有場波係值得寫返幾隻字！呢段時間其實我地都有去睇波，但睇既都係第五級 Hessenliga，對香港人黎講毫無吸引力，所以睇完就算 最值得一提就係去左兩個球場都係正飛機升降路線底下，一路睇波可以一路研究邊間航空公司，機型係乜之類，完全係另一種樂趣！
呢場波其實無咩特別，只係我地好想係個球場被拆之前可以係入面正正式式咁睇返場波。原先諗住二月頭去，後來因為某啲事去唔成，最後係 BFC Dynamo 今季最後一場星期六上演既主場賽事搵到平機票飛去柏林，所以神早就將呢個星期六定左比柏林， 絕對唔會改行程。
真係發夢都無諗過可以搞得成柏林一日遊，一直都諗住最少要留一晚。搬到法蘭克福後我地得閒就睇下有咩地方睇去，見到 Easyjet 有飛去柏林既路線，我地買左 8 點半飛；9 點鐘返～ 飛大約一個鐘，機票每人 50€。 由於今次係我地搬到大城市後第一次去機場，而之前每次去法蘭克福機場我地都一定會去 T2 既麥當勞打座，因為間麥記望住機場跑道，可以好毒咁 planespotting! 所以我地一早 4 點鐘就要起身，搭 5 點鐘既 S-bahn，6點鐘到機場去麥記食早餐。
當時仲係天黑黑，塊玻璃反哂光乜都睇唔到，然後個天越黎越光，厚厚既雲擋住左陽光，但都算天朗氣清。飛歐盟內陸機係完全唔需要過海關，入閘時係嘟張boarding pass，花左大約 10 花鐘等安檢，然後就可以行去登機閘口。
上次我地由盧森堡飛去柏林 Schönefeld 機場，今次我地飛到較近市中心既 Tegel 機場。係天上面一直都望到地面，但一入到柏林就淨係見到雲，chok 住咁降落。落機後，經過幾條行李帶就已經到出口。真心覺得堂堂德國首都，點解兩個機場都好似貨櫃屋咁勁醜勁舊，柏林機場起左 19 幾年都未完工，真係好失禮！！！
而 Tegel 機場係無鐵路接駁，要去市中心就要搭巴士，買左 AB 區日票（7€），就可以搭當地交通公司 BVG 既所有交通工具，由 Tegel 搭巴士去中央火車站只需 20 分鐘，搭去 Alexanderplatz 就半個鐘左右～我地落車後諗住去 Hackeschermarkt 買路邊檔買野醫下肚先（當時只係 10 點半，食晏好似又太早），點知乜都無，咁就去行下街先，大約 11 點半我地就已經出發去 Prenzlauer Berg 度食平意粉～
Prenzlauer Berg 係年輕人好中意去既地方，所以一切都一定係以平價為主！我地叫左一份 pizza, 一份意粉，一碟沙律再加野飲都唔洗 14€！食到超飽就出發去 Mauerpark （柏林圍牆公園）散步。估唔到半年前仲有係星期日開放比人搞跳蚤市場既 Mauerpark 如今已經變成地盤。
而我地今日去既 Friedrich-Ludwig-Jahn-Sportpark 下年亦都會變成地盤，所以我地咁急趕住再去柏林就係為左入呢個球場！！！而今場波亦都係 Dynamo 今季最後一場星期六主場比賽，其他都唔係星期五就星期日！Friedrich-Ludwig-Jahn-Sportpark 位於 Mauerpark 旁邊，係場外可以望到四枝超靚既射燈。上次去既時候淨係可以係場外望住果四枝燈覺得超唔憤氣！！！好在今次終於可以入場 <3
同大部份球會一樣佢地有優惠票，除左學生、老人等之外，就連女人都可以享有優惠價～～佢地張波飛係硬卡紙，上面印有銀色球會logo 水印好靚，但個水印係入場時被撕走左無得 keep，好在影左張相可以睇返！ 入場時佢見到我個袋有幾包零食（剛剛係無印買左士多啤梨朱古力），仲有一個咭既水樽，佢縐哂眉咁問我入場睇主隊定客隊。 我勁驚佢要我 dum 走啲野，我話淨係想睇波，同時諗住拎個水樽出黎 dum，佢就好懷疑咁話OK………然後放我入場。
入場後發現我地身處係球迷組織堆人旁邊，望下球場對面，原本屬於佢地既區域吉既，成個球場除左主看台呢面有開，其他全部都關閉，所以球迷組織都要搬黎呢邊。如果你有留意開，你應該都知我㨂位通常都要㨂可以望到兩邊球迷既地方。今次㨂主看台都係諗住可以正面望到球迷組織區域，點知而家只有一區開放，我地行到邊都同佢地平排，即係乜都睇唔到……
更加恐怖既係，佢地就算係阿伯級既人，睇落都好似好想打交咁。同埋佢地既政治立場係極右，甚至可以話係德國黎講最右既球隊。 由球隊成立只今都無乜朋友，因為係東德政府既年代有東德政府係後台撐腰，係球壇要風得風，所以幾乎所有平民都超憎呢隊波。當年每個東德城市都有一隊有後台同無後台既球隊，無後台就係啲工廠隊，有後台就係啲權貴既玩物。 東德政府瓦解後就當然得返有平民支持既球隊可以成功存活。 正因為呢個政治背景， BFC Dynamo 一直都聚集唔到好多球迷。 當日只有四百幾人入場，而當中有超過一半既人都屬於某個組織或者係足球流氓。
我地想離呢堆人有咁遠得咁遠，起碼影相時唔會比人鬧，所以我地行到去最遠最邊邊既地方。睇唔到球迷都仲可以安心睇波！
不過，當日超大風！！係打風級別既風，我地企既位超級食風，一開始諗住只係陣風都仲頂得住，但最後係 45 分鐘瘋狂刮風。啲風吹落塊面度係痛架！！！我原本戴左隱形眼鏡，但啲風吹到對眼乾哂，搞到係咁流眼淚，完全開唔到眼。好在我諗住今日行程咁長對眼一定會超攰所以帶定眼鏡，開波十分鐘後就頂唔順換左眼鏡。啲風超打落塊臉度再攝入眼，我完全集中唔到睇波，吹到個頭好痛，眼又痛，手指又凍到無哂知覺。
心諗，我放棄啦。下半場我搵個無咁大風既位企就算，睇唔到球場已經唔重要，最緊要有命返屋企-.- 上半場主隊射入全場唯一一球領先。
半場休息時，我地走左入看台底避風，買左杯熱茶暖返個胃先。等到再開波先出去。好好彩搵到有牆既位可以企，即刻無咁食風！！
而下半場既節奏都緊湊左，雖然客隊只係魚腩，但都有唔少機會埋門。最後好緊張咁不知不覺就完場。
完場後我地即刻走人，去我地最中意既酒吧嘆返幾杯手工啤酒～ 然後去搵 kebap 食！係柏林而家最興食 Gemüsekebap，直譯係 vegetable kebap。就咁睇個名會以為係素食，但千奇唔好搞錯！！！ Gemüsekebap 係除左普通既生菜之類既沙律之外，仲會有炒過既薯仔、茄子同翠肉瓜等等，然後再加雞肉！
我地上次無留意就咁入一間 kebap 店買野食，之後覺得超好食。今次仲諗住以返同一間食，以為有炒菜係佢地獨有，上 google 搵佢時先發現佢係 Gemüsekebap 店！ 柏林最出名既一間叫 Mustafa’s Gemüsekebap，但聽講條隊排到去下一個街口，所以我地無時間去試。係路邊搵間寫住 Gemüsekebap 就入去食。果然不負所望！！！！
食飽後，我地就中搭巴士去機場，上機時開始落超大雨，起飛時比風吹到搖黎搖去，到法蘭克福降落時都係咁被氣流轟炸。可以平歸家真係好感恩！！！
咁樣 daytrip 真係好攰，應該有排都唔會有下次！！