22.12.2018 德國甲組聯賽 第 17 週 紐倫堡 對 弗賴堡 Max-Morlock-Stadion 賽果：0:1 (0:1) 入場人數： 36,190 （約 1600 名作客球迷） 更多相片
十二月頭因為搬屋（sor, 寫左咁多篇都仲提緊搬屋）搞到幾個星期無波睇，連鄉下打比戰都唔去唔到，好唔甘心 2018 年就咁樣完左，諗住去法蘭克福睇場波做結尾，點知「唔小心」買多左場波飛，就係離新屋大約兩個鐘車程既紐倫堡，可以順便去埋德國最大既聖誕市集！
今個週末係 2018 年最後一個比賽週，換句話說，即係聖誕前最後一場比賽，係聖誕前最後一個週末出街其實未必係一個好選擇。新聞叫大家要有心理準備路面會有好多車，好多人好多人星期六已經開始放假，計劃一早就揸車去渡假或者係返屋企，唔洗趕路既人最後午後先出發。
我地原定星期六大約 8 點半出發，兩個鐘左右車程，預埋塞車應該 11 點左右可以到。最後大約 9 點 3 出發，上 A3 公路就可直達目的地！一個鐘頭後先係 Würzburg 遇上工程要兜路無左 15 分鐘，後來就到紐倫堡時又塞車，電台同網上面都無提到呢段塞車，Google map 顯示為深紅色，話有 23 公里長。塞左大約 45 個鐘，終於見到有架貨車係路中心死火….. 終於終於，1 點左右成功泊低架車，去個廁所，搭地鐵向市中心舊城出發！去到聖誕市集二話不說要食紐倫堡腸仔！佢地通常三條小腸仔配 Sauerkraut 或者芥辣夾包，叫 3 im Weggla；我就食豬扒包配超多汁既洋蔥～～有野 long 胃之後就當然要去飲熱紅酒！紐倫堡市集最出名既係藍梅紅酒～ 咁岩個天開始落暴雨，檔口姐姐好好人咁比我地企係佢檔口面前避雨。然後就去買塊 Lebkuchen 一路行一路向球場出發！
Lebkuchen 薑餅有幾款，有一款係周街見到，啲舖頭會整唔同形狀上面寫幾隻字咁，仲乾過餅乾。紐倫堡既正宗 Elisenlebkuchen 係完全超班！！！！！！！兩歐一塊好貴但物有所值～～～～ 不過就咁叫薑餅我覺得唔岩，因為薑唔係呢舊餅既重點… 如果大家有興趣既話可以搵老字號 Lebkuchen Schmidt 試下！
食埋甜品，我地就搭地鐵去火車總站轉火車去球場。每逢比賽日，當地都會有特別班次開往球場，一個站唔洗 5 分鐘就到達 Frankenstadion。 一落車就見到球場既射燈，但首先你會經過一大座類似看台/球場/賽道咁既物體，叫做 Zeppelinfeld。 現時每年會有幾日被用黎做賽車賽道、大型音樂節或者其他活動，以前係由納粹政府興建… 呢一忽只係「納粹公園」既其中一小小小小部份。行遠少少仲有一條超闊既道，仲有超巨型既建築物，目的係用黎閱兵向外國演示佢地既軍力同財力。當年佢地既目標係將呢一個地區成為歐洲既中心。當日原本預左一個鐘左右時間去遊花園，最後因為遲左出門口同塞車搞到無哂時間，只係見識到 Zeppelinfeld 同埋球場。等冬天過左我地一定會返去慢慢細味下歷史！
由火車站到球場行路十分鐘都唔洗就到達球迷組織聚腳地 北看台，我地買左南看台，諗住可以是但一個閘口入去先圍住個球場行。點知張飛寫住邊個閘口就一定要邊個閘口入去！一開始仲記錯左閘口號碼搞到兜左兩個圈先成功入場。
Max-Morlock-Stadion 係德國唯一一個八角形球場，球場名唔洗講都知係以名宿命名。球場既冠名權多年以來都變黎變去，邊間公司有錢就有球場冠名權。而球迷一直都希望以名宿 Max Morlock 既名做做球場名，直至上年有一間銀行成功投得冠名權，間銀行話佢地會設立一個眾籌網，如果成功籌到 80 萬歐元既話，個冠名權就由球迷話事。呢 800 萬係會去返球會身上，但係限期前，球迷已經係籌到大約 30 萬歐元。不過間銀行最後都話，算啦，個冠名權照比球迷啦，另外再撥多大約 200 萬贊助費比球隊。 當然，大家都知呢個只係一個 marketing 手段，無人會肯蝕住錢咁送免費野比你。但最後大家都開心又何妨？
係電視睇既時候成日覺得北看台睇落好細無乜氣勢咁。 入場親眼見到北看台既感覺完全唔同，視覺黎講震撼過電視睇好多！！ 我地個位直望北看台，而作客區就係我地右邊下層～ 我終於都黎到參觀好朋友既屋企啦！升班馬紐倫堡開季至今只係贏過兩場波一直徘徊係降班區。 佢地作為史浩克既好朋友，我當然希望佢地可以護級成功留係德甲啦！佢地有幾好朋友？ 紐倫堡 2014 年跌落乙組，足足搞左四年先升返上黎，上個月兩隊波再次係聯賽碰頭，史浩克既球迷組織花左超過 2 萬歐元去將全個球場轉為藍白紅黑色。屬於史浩克既北看台演化成紐倫堡既會章；而南看台包括作客區就係史浩克既會章，意指兩隊波不分你我，友誼永固。今場波每當球場大電視播出史浩克領先既消息後，場內球迷都一齊拍手為好友歡呼！ 果然係真朋友～
開波前我地已經留意到北看台有一條條線掛係度，即係佢地準備左一個大型 choreo! 等到球員進場時，佢地係北看台上層先向上打開紅色部份，然後向下拉開黑色部份，中間露出球會會章，係一塊超大型既紅黑布。 當佢地收起呢塊布後，布下既球迷每日 fing 一塊迷你塊旗仔，造成一片紅黑旗海，簡單得黎好震撼！！！！ 史浩克上兩個星期都整左個類似既 choreo，但唔知點解勁醜 -.- 紐倫堡既旗海中間有一塊大橫額寫住 “Nordkurve Nürnberg – Als kleines Kind träumt man davon, hier zu stehen” 大約意思係 我地自小就夢想可以站立係紐倫堡既北看台。 係作客區既上層附近，有超多紐倫堡既小朋友，佢地間唔中就一齊雞仔聲尖叫 FCN! FCN! 超有氣勢！！你諗下，佢地竟然可以係兩班球迷既打氣聲中間突然重圍，叫到係球場對面既我地都聽到佢地尖叫…. 到佢地大個可以係北看台立足既時候一定超幫得手（口）！！
作客區係東看台下層，呢度就係當年法蘭克福作客時跳到上層震下震下既地方…. 弗賴堡帶左大約 1600 名球迷黎作客，聲勢唔錯～ 不過我唔得閒成日望佢地，好少留意佢地唱乜。 佢地 19 分鐘就靠自由球入波，好興奮咁唱歌唱到完場。
成場波其實紐倫堡完全禁住客隊黎攻，但係佢地完全制造唔到機會，角球比數最後係 12:2 （好似係），但果 12 個角球唔知有無一次係成功製造機會射中目標！！淨係望住球場既話會以為睇緊上半季既 Elversberg，如果你唔知 Elversberg 踢成點既話，另一個例子就係德國國家隊。 控球在腳呀，係咁傳波呀（但向後傳多過向前傳），無人走位架，全部人唔係塞哂係中間就係跑得太慢跟唔到節奏…. 完全無計劃咁踢呢場波。
下半場開波前，北看台拉開一大塊橫額，祝坐緊監同埋被罰球場禁制令既好友聖誕快樂，然後點起紅綠色既煙花仔～ 好似有時生日蠟燭果啲小煙花，但佢地係 1 米長既版本，呢種煙花係德國平時都可以合法燃點，所以球場都無開咪叫佢地唔好玩火。主隊踢足大半場攻極都攻唔入，後來佢地想換人既時候，我身邊既球迷全部爆哂粗話 唔好呀！！！！ 我就知準備換入既球員係紐倫堡版本既 Koffi…. 完全明白球迷們有幾絕望。 有幾下大家都拍哂手咁苦笑，又或者激動到企起身指住空哂既球員大鬧 傳波啦係咪盲架咁都睇唔到！！！！！！
就係咁…. 唔知睇左場咩波就完左。 比賽質素黎講真係唔知想點，但球迷質素就無得彈。 去到 90 分鐘都無明顯大班人離場，去到完場後人潮漸散，但北看台既球迷仍然全員留守。
作客區既球迷好開始咁同自己既球員慶祝可以拎 3 分過聖誕，而主隊球員繞場一週多謝球迷之後就走到北看台前。 雖然我同北看台相隔一個球場，但我見到球迷們係舉起雙手鼓掌。 然後聽到 capo 拎住大聲公對住班球員演講，大約係話 輸波我地都唔會放棄，仲有半季比我地去搶分 等等鼓勵球員既說話。 球迷知道佢地升返上德甲，目標唔係贏冠軍或者殺入歐洲賽，而係護級。 佢地升班後無開水喉亂咁買人，所以大家都知自己隊波既實力係邊，護級係最現實既目標。 最後大家一齊吶喊球隊名字作完結，出年繼續！
離場後，我地又走返去聖誕市集～飲多杯熱白酒同買啲手信就返屋企。回程好好彩無塞車，兩個鐘無多無少，11 點返到屋企，極速沖涼訓覺，好好準備過聖誕。我地仲未有計劃出年去睇咩波，等 2019 年真係黎到先再算～
祝大家聖誕快樂及新年快樂！！！