16.12.2018
德國甲組足球聯賽 第 15 週
法蘭克福 對 利華古遜
Waldstadion Frankfurt
賽果：2:1 (1:0)
入場人數： 46,500 （1150 名作客球迷）
更多相片

安靜左三個星期，終於都安頓好一切可以抽空去睇場「地區波」啦！原來對上一場波已經係十一月尾 Elversberg 主場對 OFC，歇冬前既一場作客同另一場主場打比戰都去唔到。

搬屋後第一個週末諗住去附近睇場西南地區聯賽，但最後裝修超出預計時間去唔成。第二個週末成功就到時間星期日去睇場業餘地區波，點知黎個難以致信既 culture shock. 過去係 Trier/Saarland 睇最低組別 (Kreisliga) 每場都有最少幾十人，好多可能係球員既親戚朋友，再加住隔離街食飽飯無野做既阿伯，球場會有燒烤食物，無豬扒包都會有腸仔甚至係薯條。但當我地去到隔離村諗住睇我地搬屋後既第一場波前，現場無燒烤，只有咖啡同三文治，場內計埋我地只有 8 名觀眾。8個！！！啲球員無朋友架？ 最後我地逗留左十分鐘就決定返屋企砌家俬好過。

因為工作關係，過去兩星期我地只係搬左梳化（床）同埋一啲重要既細家俬去新屋，要等到第二個週末先有人力同時間清舊屋。為左報答幫手搬屋既朋友，我地請佢星期日搬屋後一齊去睇場德甲！波飛一早買左，無論如何我都要係第三個星期睇到一場波！！！！

終於，所有野剛剛好 3 點半搞掂，有 15 分鐘比我地換衫 （星期日朝早落大雪超凍），準時 3 點 9 出發去火車站，搭大約 9 個字火車去法蘭克福森林球場。搭車去到球場站仲要有大約十分鐘既路程要行，由於我地食完早餐之後就掛住搬屋完全無時間食野，所以一見到小食店就仆埋去買野食！係咁e 醫一醫肚之後就排隊入球場，見到有薯條又忍唔住買多份先入座。冬天去睇德甲好似已經成為我地每年既必備節目。

我地張飛今次係正作客區上面，呢區早兩星期先開售，因為利華古遜無咁多人跟作客，所以主隊就將原定劃左做作客區上層賣返比自己球迷。話哂球隊近況咁好，有唔少人都好想入場睇返場波！ 㨂呢個區最主要都係因為係最平選擇 （33€），同埋諗住坐正係客區上面應該唔會食哂佢地啲聲。

開波前，森林球場先播出法蘭克福既會歌，然後宣布長谷部誠續約既消息，所有球迷都高呼佢既大名感謝佢繼續為球隊效力！我就好好享受法蘭克福西北看台既打氣聲～ 球迷們，以 Pippi Langstrumpf 兒歌黎做其中一首開場樂，好簡單既 Schlala，但偏偏係我最中意既其中一首打氣歌！

利華古遜既球迷組織 UL 唔知係咪因為塞車所以遲到，頭十五分鐘都要靠啲球迷自發唱歌。 到佢地入場時，大家好趕急咁係圍欄掛起橫額同拉大旗，capo 亦都拎住大聲公企（向住我地既方向）係欄頂發號司令。就係咁，成個上半場就客隊啲聲音蓋過左離我地一個球場咁遠既 UF 打氣聲。

呢場唔只係法蘭克福對利華古遜咁簡單，佢地分別同西南地區既球隊 Mannheim 同 Offenbach 結盟。有咩特別？ 呢兩隊波係死敵囉！ 即係今場係盟友打比戰～兩隊德甲球隊都有為佢地既戰友高歌，圍欄前亦都有兩隊地區聯賽既球迷組織橫額。

上半場首先由利華古遜開齋，不過經過 VAR 裁判後被判因越位而入球不成立。今次係我地第一次現場睇配有大電視+ VAR，係大電視唔會重播，但會播出一個勁廢既表解釋點解不成立。主隊大難不死，好快後福就來了，幾分鐘後首先射入一球。

完半場前我地睇準球場中心既山頂位置，諗住半場休息時嘗試鼠入去坐靚位。好好彩原先用黎分隔作客球迷既閘今場保持開放，我地好容易就走左去心水位置，可以清楚睇同聽哂兩邊球迷既打氣聲。 利華古遜？可以睇返我之前睇過既幾場波。唔知點解好似次次去睇德甲都係去睇利華古遜咁，佢就黎係我既groundhopper stat 成為其中一隊top seen club 啦！！原本坐佢地上面都覺得聲勢ok, 但一離開左佢地就唔係好聽到佢地把聲。

走左上山頂之後凍左勁多，森林球場最頂果行有位通風超凍，好想飲熱蘋果酒但又唔捨得走出去買，唯有三條友原地跑取暖。場內只有啤酒仔捧住啤酒周圍賣，但無人賣熱飲囉！識唔識做生意架？ 下半場既節奏緊湊好多，雖然間唔中都唔小心淨係掛住望啲球迷，但更多時間真係專心睇波！開波大約十分鐘後，法蘭克福入多一球領先二比零，然後比客隊追返一球。

法蘭克福既球迷真係好好好好正。之前成日講講早幾年佢地週中有近萬人跟住隊波歐洲賽作客，今季佢地以德國盃冠軍之名獲得歐霸盃資格，大家即刻超期待佢地今季會有咩啲搞作。首先，佢地淨係會員預售就已經賣哂所有波飛，然後去到作客賽事，佢地好多球迷就算無飛都飛到去場外助陣。特別係對拉素既時候，就算比拉素球迷警告佢地咪諗住係羅馬造勢，後果自負，佢地一樣照吹雞去人地鬥獸場前踩場。佢地既球場外有個 grafitti 寫住「我地為勝利而戰鬥，為戰鬥而生存」，呢種氣勢唔係隊隊波都有！ 去到場內，佢地三場主場比賽都準備左超震撼既 Choreo. 啲評述員同埋成日話球迷＝搞事者既記者都不禁大讚法蘭克福球迷既「表演」。去到而家分組賽完結，佢地以全勝姿態殺入 32 強，仲要聯賽既表現一啲都唔差！

完場後，利華古遜先去到作客區前比球迷鬧下。法蘭克福球員就先繞場一週多謝球迷，最後行到去仍然係全滿既西北看台前排成一字，同球迷一齊唱歌。其中一首係唱「邊個唔跳就係 Offenbacher！」我笑左咁話 我係喎！！ （我地住果區屬於 Offenbach 分區 ._.）睇到球員返入更衣室後我地都離場向火車站出發。沿路經過小食店又走左去買杯熱蘋果酒暖身（場外平場外 0.5€，仲要大杯啲)，反正火車站一定塞滿哂人要人潮管制，急都無用。 最後大約 9 點成功上車， 10 點返到屋企，沖個涼，回味下場波，第二日起身要繼續執屋！

搬到法蘭克福地區，即刻多左好多選擇去睇波，由德甲去到超低組別都任君選擇。之前住鄉下唔係唔好，但由鄉下坐一個鐘巴士先去到一條小鎮；而家我都係住郊區，但坐半個鐘火車就可以去到法蘭克福，要乜有乜，想買件靚啲既衫返工都有多啲選擇！一個鐘內既車程除左有法蘭克福，仲有 Wiesbaden, Mainz, Darmstadt… 仲有 Offenbach, Mannheim, 再雞啲既可以計埋 Dreieich 入去既。 仲可以隨時搭高鐵去遠啲既地方睇波…. 呢度既公路就算塞車都係以 100km/h 咁高速塞車 （唔計有意外）。 下星期我地去紐倫堡都只係兩個幾鐘車程～～～～