23.11.2018 德國西南地區聯賽 第 18 週 SV Elversberg - Kickers Offenbach Waldstadion an der Kaiserlinde 賽果：0:1 (0:0) 入場人數：1025 （約 110 作客球迷） 更多相片
幾個月前開季第一場波作客 Offenbach 時仲係可以熱死人既炎炎夏日，轉眼間就黎到得返幾度既秋冬天。同首輪一樣，今場波係星期五夜晚舉行，但七月既開波既時候仲係天光光，而今日就已經天黑到好似 12 點咁。 呢場波對我地黎講有一個特別既意義，可以話係 “Old home vs new home”。十二月我地會正式搬到法蘭克福，住係近 Offenbach 外既郊區。雖然我地唔會視 OFC 為我地既新 “home club”，但黎緊唔會再有咁多時間可以場場返去 Kaiserlinde 主場睇波。作客反而無咩問題喎～因為西南地區大部份球隊近 Frankfurt 多過近 Saarland!
星期五一早我地先要出發到新屋交收新鎖匙～ 一車滿滿既雜物帶到新屋度放低先。大約 3 點左右向 Elversberg 出發，感覺就好似跟 OFC 到 Elversberg 作客咁。星期五好多人都可以放早，再加上法蘭克區附近永遠都超多車同埋修路工程，係收音機聽到既係永無止境既 N 公里塞車！！！！原本大約 2 個鐘既車程最後要花 3 個鐘先到。我地已經好醒目咁行山路唔行公路… 但都要大長征咁。 呢段車程證實左一樣野：除非請假，唔係以後既星期五晚波我地都無可能趕到返去！
頭先講過 OFC 唔會成為我地既新 home club，最主要既原因係我地從來對呢隊波都無乜好感。 以低組別聯賽黎講佢地既規模唔細，但係佢地既球迷完全無吸引力同無創意。每場波唱黎唱去都係果兩三首歌或者9叫下 OFC OFC Kickers Kickers 咁。講真，佢地附近咁多大球隊，應該真係得土生土長既 Offenbacher 先會支持呢隊波。你問我，我會去睇佢地既死敵 Waldhof 或者去睇 Darmstadt 都唔會去睇佢地！！
由於天氣寒冷，我地食飽飯 hea 到差唔多開波先去球場。到我地入場時，作客球迷已經到哂，只係得百幾人…. Block C1 唔知點解好多人，個個仲好有動力咁又跳又唱咁唱足上半場。場上既組織睇落順左好多，不過我都唔諗讚太多…. 記得開季作客和波，果陣我地都話 SVE 踢得好好，失分只係不幸。今場有啲似開季頭幾場咁，踢得好但把握唔到機會 （淨係呢樣都已經夠死），對方同時又無咩攻勢，所以贏波唔係無希望的。
賽前估波遊戲我估左輸 0:1 ，因為我就係覺得場波會係咁，踢得好但僅僅輸一粒，果然比我估中左！！下半場對方唔知點樣送左個波入網，最後全失三分。但球迷無嬲，反而係咁鼓勵班球員繼續加油！！
原本我都唔記得我估波估中左，兩日後收到球會 email 話我估中又被抽中贏得 50€ 旅遊禮券！！！從來都無抽獎運既我咁都比我中到！！！！～～～ 雖然 50€ 唔算多，但係歐洲已經可以訂到一晚酒店，比我地去第二度睇波時用！！～
十二月歇冬前仲有兩場地區聯賽，但我地完全抽唔到時間出黎去睇波… 所以今場係我地今年睇最後一場 Elversberg 既比賽了。多兩星期我地搬大傢俬既時候會有朋友黎幫手，我地用法蘭克福波飛黎答謝佢。下個週末就可能睇法蘭克福附近既地區波，同埋要做返啲 Christmas shopping 等我地可以安安樂樂咁過聖誕同新年。 黎緊可以都無時間可以睇完波過兩日就即時 update 網站，如果有興趣想即時知道我地睇左咩波可以 follow 我個 Instagram: @bohc9，如果想練埋德文既話可以 follow @grenzenlos_groundhopping！ （網頁頭頂可以直接 click 去～）
搬到去法蘭克福好在唔算離莎蘭太遠，想返去到隨時可以返去。同埋以後要去其他地方睇波真係方便好多！！！好期待搬屋後既首次睇波旅行！