10.11.2018
德國地區聯賽 第 17 週
SV Elversberg - FK Pirmasens
Waldstadion an der Kaiserlinde
賽果：3:0 (0:0)
入場人數：589 （約 50 名作客球迷）
更多相片

黎到今季首輸賽事既最後一場，一起身就見到窗外落住大雨，心諗唔通連個天都唔中意我？

平時我地會係開波前大約一個鐘去到場，今日我地開波前十五分鐘先出門口。平時落雨我都唔會帶遮，但今日唔想變落湯雞又要受球隊既屎波氣，反正落咁大雨都唔會有咁多人去睇波，開遮都唔會有問題。果然，兩個 Block C 看台都無咩人企，只有主場看同 VIP 區果邊多人。作客區都一班人一字排開咁有大約 20 個人企係度睇睇，連埋主看台坐係度果班應該有大約 50 人。

其他人就一早已經準備會變落湯雞，係雨中超開心咁自 high 唱歌。有人笑住話佢杯啤酒飲極都唔會少 😀 😀 上季作客 Stuttgarter Kickers 又係咁樣落超大雨既時候大家反而情縮高昂咁打氣。今日就半場未到已經玩到個鼓爆左！

兩隊波既排名接近，上半場都無分邊隊佔優勢，但睇落 SVE 好似開始有返啲戰術部署，終於有人會走兩邊，去到底線有人走位拉多啲空位出黎比人入攝之類，唔再係亂咁放亂波去前面等運到希望有人接應，現時球員之間總係爭咁啲默契，希望呢樣野可以慢慢改善。再加上不斷被咒罵既球王 Koffi 仍然係未能成材！去到下半場終於黎料，第一球睇住個波慢慢碌入網，第二球 Koffi 再次入波，然後完場前再黎多一球。

看台上面有一班長期飲醉酒既資深球迷，佢地好開心咁係咁唱歌。但呢班阿叔永遠都唱唔岩音又唔岩節奏，要我地帶佢地「走回正路」。班醉酒阿叔最好笑既就係超容易被控制，例如我地亂咁唱一首歌，佢地就會跟住一齊大聲唱 😀 當日佢地仲自己作詞，之前唱開叫前領隊返歸既歌，佢地勁開心咁唱「Roland ist zu Haus(e)」 － 領隊已返歸！ 哈哈哈哈哈，仲有其他人同佢地一齊和唱。 淨係睇佢地唱歌唱得咁開心就知佢地好滿意今場波既表現。

終於，贏波係開開心心咁贏波。唔係贏左都唔知咩事，唔係靠好彩咁負負碌碌執三分！而係真係踢得比人地好！ （賽前我估 SVE 輪三粒架，睇黎我可以繼續咁樣落咒！！）完場後，球員終於可以開開心心咁走過黎比我地讚下！

下個週末係國際賽期，地區聯賽同樣無比賽。平時地區聯賽唔會因國際賽而休息既，但今季既賽期一早以 19 隊球隊參賽既情況黎編排，造成呢個無比賽週末。再下個星期次輪就會開始，踢多三分波就會進入歇冬期，到時我地真係未必有時間可以場場去睇 lu!