09.11.2018 德國丙組聯賽 第 15 週 FC Würzburger Kickers - FSV Zwickau Stadion am Dallenberg 賽果：0:2 (0:2) 入場人數：5,035 （約 450 名作客球迷） 更多相片
最近超級之忙，連想搵時間打幾隻字既時間都無。但無論點都好，都一定要抽時間出黎睇波，因為係球場時先可以令我地放空，比兩個鐘頭時間自己去享受自己最愛既娛樂。
九月我地去柏林咁岩順便有得見下工，最後比拒絕。原本都有啲唔開心，但如果最後真係要搬去柏林既話真係唔知點搵屋！呢排我地開始集中啲搵工，唔係全國漫無目的咁，咁岩係慕尼黑有間公司邀請去見工，車費佢包。即刻搵下有咩波睇，好可惜星期四同五晚慕尼黑都無波睇（我地只想留一晚），但見到位於巴伐利亞州既 Würzburg 有場週五夜波。由慕尼黑開車返沙蘭正常路徑要經過 Stuttgart 同 Karlsruhe 等著名塞車城市，先北上經 Ingolstadt 同 Nürnberg 去 Würzburg 睇場波再經 Frankfurt, Kaiserslautern 去莎蘭就可以一舉兩得避開星期五繁忙時間！
就係咁，星期五一早 P 先去見工，我獨自去市外城堡公園散步。等佢搞掂時大約 1 點鐘，我地就開 3 個鐘車到 Würzburg。 丙組星期五既賽事都係 7 點開波，我地 5 點就到左，行到去球場就連售票處都未開門！等到 5 點半終於買到飛 （唔會賣哂，但買左飛先穩陣啲～），係附近散步到開波前 15 分鐘先再入場。 我地仲準備好充足咁著哂 heattech 底衫，點知當晚有成 8 度又無風，根本就唔洗著咁多衫！
入場後第一時間係醫肚，買左塊類似豬扒包既物體，但塊肉係超軟熟好好食！只係配菜係類似 sauerkraut 咁好嘔心，點解唔可以正正經經配洋蔥？？
我地買左 3b 區，入看台時一手拎住個包另一隻手拎住杯汽水，見到有保安企係門口就諗住拎返張飛出黎比佢睇，但佢話：「唔洗啦，我信你地。」 就趕左我地上去！ 3b 區係中線旁邊，可以話一個好位置，最重要係可以見到兩邊既球迷！
Würzburg 大約四年前係地區聯賽既升班附加賽入班擊敗來自莎蘭既 Saarbrücken 而升班到丙組，然後以升班馬姿態升班上德乙，最近先跌返落丙組。附近比佢地大既球隊多的是，一個鐘頭左右車程就有法蘭克福同紐倫堡，係市內四周都可以見到紐倫堡球迷留下既蹤跡，紐倫堡既球迷組織係 Würzburg 有分部，大家都話佢地既分部可能已經多人過 FWK 整個球迷組織，所以 FWK 只可以暗地裡憎紐倫堡。球迷組織 Block B 規模唔大，但佢地同德甲球隊奧格斯堡係好好朋友，今季德國盃首輪仲一齊慶祝結盟十週年。
而作客球隊 Zwickau 來自東德，佢地既好朋友係德國足總聽見都怕既 Dynamo Dresden。原本諗住我地識既朋友會去助陣可以見下面，可惜佢要返工趕唔切星期五去睇呢場夜波。作客區入面都有幾塊 DD 既旗仔，但我認為即使無 DD 助陣，FSV 球迷既氣勢都完全唔輸蝕！
FSV 對 Elversberg 球迷黎講係一個傷口，大家三年前係升班附加賽既對戰，對方無論球員定球迷都贏哂。不過佢地既球迷真係好正，就如好多其他來自東德既球隊，佢地有好多我地平時未聽過既歌。作客區前既欄杆掛左唔少橫額，而球迷中間就只有一塊大旗；另一邊既主場區就一直都有最少五塊大旗飛黎飛去。對 FSV 黎講，佢地著重用身體出聲出力打氣，而 Block B 就係要用旗海令自己睇落有氣勢啲。
球場上，FSV 近幾場既戰績比主隊好好多。FWK 已經連輸幾場，今場都唔例外繼續輸波…. 主隊好似 SVE 咁踢埋啲屎波，前鋒埋門無威脅，到後來被換走時，看台上既球迷好開心咁話終於換走佢！！！FSV 係上半場入既果兩球世界波（其中一球係三十多碼平飛入網！！！！）幫佢地作客搶到三分！
佢地既球迷半場完全無休息過，由第一分鐘一路唱歌唱到完場，直至球員走過去同佢地一齊慶祝完啦，就連我地去埋廁所諗住走人時，佢地都仍然仲唱緊。呢一種既激情真係好正！！！！ 到底係咩驅使佢地咁興奮咁有動力唱歌到完場？？
離場後，我地就行返去河邊既停車場，大約只係 15 分鐘，市內完全無塞車無人影，完全唔似岩岩比賽完結囉。我地沿公路經法蘭克福返莎蘭，準備第二日去睇 Elversberg。黎緊我地唔會有咁多時間去睇 Elversberg lu，因為新工關係，我地要搬屋到法蘭克福做一個城市（旁既鄉下）人～～ 所以要趁今年完結之前好好珍惜鄉下波 <3 好多朋友問我係咪要轉會去法蘭克福，嘿，我不嬲都好中意睇法蘭克福既球迷！！！