03.11.2018
德國西南地區聯賽 第 16 週
TSG Balingen - SV Elversberg
Au-Stadion
賽果：2:0 (1:0)
入場人數：1,450 （約 40 名作客球迷）
更多相片

突然之間就已經到十一月，突然之間黎到上半季最後一場作客波！上星期日球會夜晚傳出炒領隊既消息，星期一正式確認領隊兼體育總監 Roland Seitz 已離任，同時宣佈 Horst Steffen 接任成為 SVE 既新領隊。球迷開心到差啲訓唔著，因為大家已經唔係今季成績差先走出黎話唔中意前領隊 Seitz，呢條友早在 SVE 係德丙季尾要出盡力搶分護級時走出黎話「寧願降班重新再黎，好過而家打生打死」，淨係呢種思想就已經足夠令球迷討厭佢！

Balingen 位於 Stuttgart 同 Freiburg 之間既無人之地，巴士車程預計連埋塞車最少要四個鐘。每朝開收音機聽到既都係圍繞 Stuttgart 有幾多公里既車龍，點知當日來回都完全無塞車！由於前領隊走左，大家好開心咁想借呢程作客係巴士上好好慶祝，每人買左幾枝烈酒諗住上車劈到落車。就連球會都送左五箱啤酒比我地任飲（一箱 24 枝）！今次仲有一架豪華巴士載我地南下！ 車尾有個 pantry 連雪櫃、咖啡機同微波爐，最後果幾行係四人對座，中間有張枱，大家都好似小朋友咁超開心爭靚位坐。

我就一如以往唔想去廁所，所以無咩特別點飲。巴士朝早 9 點出發，上到高速公路有人問：咦，啲旗同個鼓放左係邊呀？ 全部人先醒覺……. 個個掛住捧啲酒上車，完全忘記左所有打氣物品。哈哈哈哈，唔記得都好既，因為 Balingen 個球場無分作客區太唔安全。更何況呢條村咁近 Stuttgart，容乜易佢地又有人走黎搶野架！唔記得左就唔洗關心呢個問題，開開心心咁去睇波！

搭巴士除左一定要有啤酒同野食之外，仲一定要有音樂，每次我地都會帶一大個喇叭係車尾播自己既音樂。去到公路休息站時， 大家拎埋個音樂盒落車係路邊跳舞。另一班人就好似餓鬼咁衝入麥當勞買 4€ 20 隻麥樂雞～ 由於路路暢通，我地 1 點未夠就已經到達 Balingen。呢條村睇落好有錢，可能因為近 Stuttgart 所以好多有錢人會㨂呢啲村仔黎住。

個翻新無耐既球場亦都好新好靚，主看台係用木造，造價六百萬歐元， 六百萬歐元！！！！！！SVE 成個擴建球場計劃先 800 萬歐元，真心唔知咁樣既小球會仲踢緊第五級聯賽時點樣搵到咁多錢走黎咁樣執個看台。 離遠睇有啲似香港啲運動場，都係一個高層看台加幾條跑道同塊草地係中間。其實大家原先都好期待呢一場波，因為球迷可以（隔住幾條跑道）企係後備席後面，如果 Seitz 唔係被炒的話我地係諗住係正係後面全場追住佢地鬧！

既然佢人已走，我地就聽保安話好乖咁去主看台對面既「作客區」。點知個太陽彈左出黎正面曬住我地，熱到除褸又除衫真心頂唔順，等到就開波大家又走返去看台底避太陽。啲保安就好緊張咁即刻搵警察入黎睇住我地。 我留係看台對面等到球員出場影幾張相先走，開波時班友開左幾句歌，我經過啲主場球迷時佢地好驚訝咁話：「嘩，有人唱歌喎，佢地有球迷架？」 哈哈，佢地驚訝完全唔出奇，呢隊波係今季既升班馬，所以佢地個球場仲未有分隔作客區，所以如果佢地既對手係大球會，會有過百名球迷跟去作客的話，佢地就要借鄰村 Reutlingen 既主場去比賽。即係如果佢地係呢個球場比賽時，就代表對方係一隊「無球迷」既球隊。

Balingen 呢隊升班馬同我地一樣係鄉村隊，唔同既係佢地無球迷組織。雖然有過千四人入場，但場內完全無人唱歌打氣，連球迷阿叔都無。就連勁 standard 既球場廣播想帶動球迷一齊歡呼時都無人會和應。

我地二十條友都係開波時唱左一兩句就收聲。兩隊波既排名相若（都係要護級），即係實力差唔多，我地而家有新領隊所以球迷都開始有返希望。點知都係無咩變化，但大家都明個領隊上任一星期都未夠都改變唔到好多！最明顯既就係，我地隊中真係有幾個球員特別廢，係廢呀！！！！！！每次有波上腳，下一腳唔係甩左就係送左比人，有兩次係中場既自由球唔明點解第二腳波就去左對方腳下。最後比鄉下隊係我地身上搶哂三分，佢地開心到賽後係球場慶祝。

唔知飲太多酒定乜，成班人都勁肚餓。我地得二十幾人，但食量好似有一百人咁。個個都來回幾次去小食亭買野食，舊包仲要大平時一倍，第一個買完返黎話個包超好食，然後每人都話要試一啖，試試下就每人都去買一個自己食。有人最後總共食左十個包，啲職員都問乜事要特登去貨倉拎多啲野食出黎。

完場後又係同啲球員交流幾句，我地就好安靜咁回家。車上眾人無去程時咁興奮，但有酒就不能不劈。

希望黎緊會見到球隊有轉變，你起碼比啲埋門機會我地睇下都好啦….