27.10.2018
德國西南地區聯賽 第 15 週
SV Elversberg - SV Waldhof Mannheim
Waldstadion an der Kaiserlinde
賽果：0:2 (0:1)
入場人數： 1376 （約 500 名作客球迷）
更多相片

就如上次所講，今場波係留名等輸波。不過我地仍然好期待作客球迷既來臨，SVW 既球迷可以話係西南地區最有氣勢既組織，好可惜過去連續三年升班失敗一直被困係地區聯賽。黎到今季雖然因為上季升班附加賽搞事所以被扣三分，但佢地仍然企穏榜首，瞄準今季既直接升班位置。

我地以為 SVW 被足總重罰後會令到球隊永不翻生，地區聯賽既球員不嬲都來來去去，SVW 上季有超過十名球員離隊，球會簽入十名新球員，咁大既變動都無損球隊合拍問題。相反 SVE 就有永遠解決唔到既問題，真係唔知係球員廢定係夾唔到？？但今季好多球隊都留隊，上季真係唔係差到咁…….

SVW 管理層極之不滿球迷組織搞事搞到球隊被罰錢又扣分，所以收返球迷組織既「地盤」，限制佢地只可以去角球旗後面既看台，唔可以係比賽日以外入球場準備打氣物品之類。雖然球迷組織已經認錯，但呢個心結可能要等到佢地真係成功升班先可以解開。由於球迷組織係主場失去地盤，佢地係主場都收聲唔打氣，留返作客時先出力。而今季佢地每場波都會係看台前掛起一大塊黑白色既橫額，上面寫住 「Otto-Siffling-Tribüne unverhandelbar」，話比球會知 Otto Siffling 先係佢地既看台。

意外既係佢地當日只有大約 500 人到場。後來再諗下其實唔算意外，早幾季我地係佢地主要競爭對手，一齊爭聯賽頭兩位去升班，所以作客 SVE 係重要賽事，每次迫爆作客區黎打氣。黎到今季我地變成佢地既魚腩，應該好多人都唔洗花錢同時間走黎睇可以預計既比賽。。。 佢地黎到 Elversberg，準備左幾枝大旗，同埋 choreo 係賽前打開，大意係講自己打遍天下無敵手。

球員進場時，對面搞 choreo，我地都有一塊大字報向剛過生既 SVE 名宿致敬。除此之外，球迷決定今場波唔打氣去表示對球隊既不滿。賽前既估波遊戲我估輸七粒，其他人話淨係輸兩粒喎，我仲恥笑佢地太過樂觀，估唔到我地捱到 30 分鐘先第一球波。上場作客踢得差都仲可以賴地硬，今次返到主場都可以無咩埋門機會，成場波捱攻。完全唔覺得班球員想出盡力去補不足，交失波就企係度嘆氣，無意識踢多幾步追波。

下半場失第二球後，Block C 終於開始唱下歌，不過唔係打氣歌，而家叫領隊收皮。今季頭幾場波雖然都失分，但賽後大家都覺得踢得好有希望只係唔夠運之類，但係而家就黎週中，就連贏波時大家都唔知到底係點贏返黎…. 絕望到對方入波時我地都忍唔住拍手。

完場後，阿領隊兼體育總監如常係第一次奔返入更衣室，有幾個球員都好似走左去，另外幾個仲肯過黎看台聽我地呻下。真心無眼睇……. 到底今季幾時先完！！！！！

－

上面原本諗住星期日就公開，後來因為時間太趕所以要留到星期二先再搞。星期日我地臨訓前，有報紙話領隊兼體育總監已經離職…. 好快就有同球會內部有接觸既朋友係 Whatsapp group 入面證實真係炒左領隊！！！！！！！差啲開心訓唔到覺，到第二朝大家係咁等球隊官方宣布，星期一中午官方確認 Roland Seitz 已經離任，會由曾經執教過 Stuttgarter Kickers, Preußen Münster 同 Chemnitz 既 Horst Steffen 接任。 老實講真係唔知佢係乜水，但 Chemnitz 上季好似係比佢搞死而要降班 -_- 而體育總監就由一位球探接任。

上半季踢得咁差已經無機會爭升班，但可以利用下半季重新搞好隊波，期望下年可以再有能力去爭冠軍。