20.10.2018
德國西南地區聯賽 第 14 週
TSV Steinbach - SV Elversberg
Sportzentrum Haarwasen
賽果：3:0 (0:0)
入場人數：1103 （23 名作客球迷）
更多相片

自從前年升班失敗後，球隊既情況好似一場比一場差。上季唔知點樣贏左莎蘭盃決賽頂一頂，但今年既實力證實成功入到德國盃只係一場虛火。隊波踢得差就自然越黎越少人入場，就連岩岩既作客莎蘭大隊都只係得大約 200 人到場，主場都已經再無四千數字既入場人數。今次作客要大約 3 個鐘車程，最後只有 14 個人一齊搭巴士北上，加埋其他自己揸車既人，總共只有 23 條友。

其實上季季尾先作客過呢隊波，即係同一年搭長途巴士去呢個鄉下球場兩次，可以啲人覺得悶唔想去卦。又或者佢地覺得隊波踢得咁差做乜要花咁多時候去睇波？巴士出發時候定係 9 點，預會塞車既話可能要 3－4 個先到，點知最後路路暢通，12 點半都未到就已經差唔多到。 我地求個巴士司機唔好停係高速公路既休息站，最好搵間超市比我地去買野食（平好多），最後佢肯早一個出口去另一條村比我地休息半個鐘食飽先再開車。 入到超市即刻去搵熟食檔買野食，班男人成程車係咁隊啤酒勁 high, 係收銀台買左幾枝迷你烈酒一齊隊 😀

飲飽食醉後就繼續去球場，入到條村司機迷路。好似去咁多次都係行錯路，我地又要幫手睇地圖睇下點樣去作客區。到達時仲有成個鐘先開波，我地就係場外等埋揸車黎既朋友先一齊入去。Steinbach 呢幾年一直都擴建緊個球場，今次黎到佢地已經砍哂場外啲樹，呢啲工程費用當然要向球迷開刀，學生飛 9€。 比多幾歐我可以去睇德甲啦！

成程車我都唔敢飲太多野，因為呢個球場只有流動廁所，唔係忍唔住既話真係唔想用！ 但經過三個鐘車程大斷飲酒，其他人已經集中唔到睇波，一開始都仲唱左幾首歌，但由於球員既表現太激氣，大家睇睇下就坐底左安靜咁睇波。 上半場雖然無失波，但對住現時聯賽排第二既球隊真係一啲機會都無。

下半場對方終於成功開齋，仲要係我地擺烏龍，真心唔覺得驚訝….只可以苦笑 大家鬧都無鬧過。我地旁邊主場區既球迷係咁係度挑釁我地勁煩，得啦，知你勁啦。 輸到第三球波時，我地已經收哂啲旗執好一切準備隨時走人。 成場波好似只有一次射門中目標……. 完場後球員走過黎，大家已經唔係好似早兩個月咁勁勞氣咁鬧佢地，好似已經睇化左咁，但都好認真問佢地到底踢緊啲乜？係咪真係諗住降班？球員話佢地都唔知發生咩事。

到底呢一季幾時先會完…… 有時真係覺得點解要浪費錢同時間？但我地去睇波又唔係只係為左球隊贏波，而係希望一直陪住佢地，但佢地可唔可以生性啲…… 起碼比團火黎睇下好唔好。。。。。。

另一場波係 Waldhof 大炒我地既死敵五比一。心諗，佢地近況超哂班，下場作客 Elversberg 時，我地又會比人大炒幾多粒？

OT 一個廁所記：最後我都係去左個流動廁所，因為佢地話乾淨過巴士入面個廁所。係香港真係好少會去流動廁所，但我記得係有得沖廁同埋有水洗手。德國既廁所無得沖廁又無得洗手！好在今場波無咩人用所以個廁所真係好乾淨。呢度既流動廁所係你打開個馬桶蓋就會見到底下一大缸藍色既消毒藥水，呢缸藍色既水混雜住所以人既排泄物 （唔知多人用既時候仲係咪藍色），等到就滿既時候先會 call 廁所公司黎換廁所。如果你唔好彩跌左個電話落去就真係 gg…………. 我真係見識少第一次見咁樣既廁所………