13.10.2018
德國西南地區聯賽 第 13 週
SV Elversberg - TSV Eintracht Stadtallendorf
Waldstadion an der Kaiserlinde
賽果：2:1 (1:1)
入場人數：654 (21 名作客球迷）
更多相片

上星期對 Saarbrücken 輸波後，週中有場莎蘭盃比賽，好輕鬆咁大炒第七級聯賽球隊 11 粒，係弱隊魚腩面前都仲可以嚇下人，只希望可以幫球隊搵返啲信心返黎。

今個星期聯賽主場對上季先升班上黎既 Stadtallendorf，佢地球隊表現一般，但球迷質素反而另人眼前一亮。同樣係來自一條村仔，因為球隊上季升上地區聯賽，喚醒左唔少後生村民去為球隊打氣。上季佢地閒閒地都有千幾二千人入場睇波。黎到今季佢地已經再無咁多人入場，今次只有大約 20 人黎到 Elversberg，當中仲有塊 FCS 地區球迷組織既大旗掛左係度幫佢地手助陣…. 但以我地所知 除非 FCS 主要球迷組織公開宣布同其他組織結盟，如果唔係佢地係唔准任何組織私自係人地既看台上面掛起同 FCS 相關既旗幟。我地緊係即刻影張相去報串啦 （其實都係想了解下….）

而 SVE 同 TSV 就有少少恩怨，上季 SVE 作客大炒九粒完場後，TSV 既幾個後生仔走左過黎作客區外好似想撩交打咁（即係果啲自認為 Ultras 就要去做搞屎棍既 on9 仔），OK，你地主場你中意做乜都得，但 SVE 雖然都係鄉下隊，但點都要做啲野比果幾個後生仔知，我地既規模係細，但點都大過你。最後 SVE 幾十條友一齊想走過去問佢地想點，佢地立即拔足狂奔返去自己門口。不過今場波佢地無做啲咩回應，只係係作客區度為自己隊波打氣。

Block C1 既人都越黎越 hea，唔知做乜大家好早就去左球場，未開波個個就已經飲左幾杯啤酒已經集中唔到打氣，就算球隊先開紀錄都無咩反應咁，個個係度自 high 😀 然後對方黎個世界波（又係世界波！）破網追和。 今場波 SVE 好主動，TSV 好似無咩掂過波咁，但佢地每次埋門就衝去我地既龍門搞到佢訓地要叫軍醫叫左幾次！唔知係人地廢定乜，今日 SVE 睇落好似開始有返啲組織，識得用哂球場闊度拉多啲空位出黎，無奈始終都係差最後果腳。 鬧鬧下鬧到下半場，鬧到連 Koffi 都成功入波助球隊贏三分。

雖然無驚無險，但今多場都係以一球波分勝負:\ 全靠呢三分我地就爬返上第 8，鄰市一開季連贏幾場，而家又連輸幾場，比我地追到只有3 分差距～ 之後連續兩場對聯賽榜第一同第二名，真係可以留定名睇到時點慘敗。..