06.10.2018
德國西南地區聯賽 第 12 週
1.FC Saarbrücken - SV Elversberg
Hermann-Neuberger-Stadion
賽果：2:0 (0:0)
入場人數：3,203 （約 250 名作客球迷）
更多相片

咁就又一個星期，今個週末要到 Völklingen 作客 FC Saarbrücken。我地對呢場波完全無任何期望，賽前亦都無任何大戰既感覺。

開波前一個鐘我地就到達球場，又係呢個極醜既球場….佢地個球場重建計劃又因為標書問題要暫停，現時話最快要 2020 年先完成。黎緊兩季都要去呢個垃圾球場睇波 >_>

又再一次走到作客區既最遠處嘗試影主場球迷區，影係影到，但完全睇唔到佢地係看台前面既大字報寫乜。後來問返人先知，佢地就上場打比戰輸左比 FC Homburg 之後寫左幾隻大字，大約意思係話「我地一係（因為打比輸波）唔開心唔出聲，一係就為球隊出盡全力」，安靜左大約十分鐘先開始為球隊打氣。

佢地既打氣區人數係多，但係真係舉手打氣既人好似一年比一年少。無諗過經過上年差啲升到班之後都仲要少左人一齊打氣？？FCS 上季以聯賽冠軍身份進入升班附加賽，抽中拜仁地區冠軍 1860 慕尼黑，首回合回場輸 2：3，失左三個作客入球比對方。次回合作客慕尼黑可以話絕望，但佢地竟然首先成功射入兩球，以為可以反勝升班時，60 係完場前一回氣追返兩粒，粉碎莎蘭人既升班夢。

同樣係作客區都係一年比一年少人，今場可能得 250 人左右。早兩季大家都仲覺得係大戰要黎睇，但而家好似無人理咁。上半場唔失球算好彩，SVE 又係完全無策略咁 9 踢，毫無組織咁亂咁踢個波上前就算。最嬲係我地既前鋒 Koffi，話哂上季係靠佢係最後一分鐘追和，原本都唔諗住對佢太 harsh，但佢今場真係腳腳都甩波，一係踢空氣，一係就自己帶甩波，總之個波去到佢腳下就知一定無機會，真係唔明點解一個球員可以廢到咁….

賽前大家只係相差兩分，即係話大家既實力可能差唔多。上半場踢得咁差都未失波，唔通我地今場仲有機？點知下半場開波唔夠兩分鐘 FCS 係禁區外黎個冷箭一射入網，失呢球波真係無野好講。十分鐘後對方將個波送到去前場，我地既龍門出迎想清走個波，對方球員同時到達，兩個望住個波衝埋去，點知對方踢中左我地個龍既男人最痛，痛到佢爬左係地唔郁得。球證走埋去向對方球員出示黃牌，最後兩黃一紅離場。

其實我地睇唔清佢踢中邊度，亦都唔知係撞到定踢到，問心果句我地唔覺得要搞到人地食第二張黃牌囉。主場球迷當然超級嬲啦，後來每次 Lehmann 掂波都噓爆佢，連埋球證一齊鬧。我地有人多優勢？錯啦，唔講真係唔知我地踢多一個人。 仲要失多個十二碼輸到二比零。 餘下時間繼續 9 踢，完全無埋門既機會～ 同樣我覺得主場球迷都唔會滿意呢場波既表現，不過佢地三分已袋，而我地失三分完全係應得。

完場後等到班球員過黎鼓勵下佢地之後，我地都拿拿聲走人向法國出發。一車四條友趕住去睇法國既第五級地區聯賽 Sarre-Union 對 Mulhouse。果場波我唔會另外寫一篇所以係呢度簡單咁講下，Mulhouse 既球員全部都係巨人咁，個龍門最少有兩米高！！！呢場波雖然無入球，但好睇過場德國波多多聲囉。