29.09.2018
德國地區聯賽 第 11 週
SV Elversberg - SC Freiburg II
Waldstadion an der Kaiserlinde
賽果：3:2 (2:1)
入場人數：923（約 15 名作客球迷）
更多相片

上個星期去左柏林所以無跟到 SVE 作客法蘭克福，（1：1 和波，我地無錯過啲咩～～）星期二一落機就即刻仆去睇莎蘭盃，今個星期終於回復平淡既聯賽生活。

今場波對方只係某隊波既二隊，完全無果種好想去睇波既衝動。我地等到差唔多開波先到球場，望住對面空空如也既作客球迷區，心諗 今場波應該得返幾百人入場。 （果九百人真心唔知邊度黎）加上另一場賽事係莎蘭打比 Homburg 對 Saarbrücken，號召力一定高過呢場波多多聲…

開波後第一個攻勢就比我地係禁區外搏到個自由球，直射入網！正當我地以為呢場會好輕鬆之制，對方就係我地仲慶祝緊既時後追和一球。 原來人地有球迷入場，不過坐左係主看台仲有枝旗仔，可以係住係莎蘭既 Freiburg 人～

主場球迷對領隊仍然有好多不滿，就連德國既八卦報紙圖片報都講我地點解咁憎個領隊。其實兩年前大家已經唔想佢擔任技術總監，積埋積埋而家成績又差先再次爆出黎。不過我地既不滿由上季表現左出黎到而家，球隊一啲動靜都無，睇黎 Seitz 會安座領隊兼總監 fat fat 咁收錢，所以我地都唔想再浪費氣力去叫佢走。

話說我地每季都總有一位賓迪基專門浪費射門機會，今日我地依然無期望過佢入波。去到 38 分鐘我地贏到角球，有人求奇up 一句話 「咪洗旨意 Koffi 可以頂入」，點知佢偏偏就接應角球頂左個波入網！！！！大家都不能接受咁話「有無搞錯呀，我返屋企唔睇波啦！」 😀

呢場比賽既時間過得好快，下半場中段我地再入一球拉開到 3：1， 但人地完場前係禁區頂勁射入網。好在我地都可以保住三分咁走人！ 我地唔知點樣爬爬下就爬返上第八位，爭冠軍就應該無望，但希望隊波可以踢多幾場好波等我地開心下。 下場波就係莎蘭打比作客對 1.FC Saarbrücken，要睇我地係咪進步左就靠呢場既表演黎分…

另外：上季升班附加賽 Waldhof 因為球迷導致賽事腰斬，足總季初已經決定左罰佢地錢同扣三分，後來佢地上訴，一直等緊結果。上星期終於決定都係唯持原判，要扣佢地三分。但被扣三分既 Waldhof 仍然係榜首領先….. 睇黎今季終於可以升班 :\