22.09.2018 德國甲組聯賽 第 4 週 哈化柏林 對 慕遜加柏 奧林匹克體育場 賽果：4:2 (2:1) 入場人數：51,852 （約 6000 名作客球迷） 更多相片
黎到柏林之旅第三日，我地終於係可以有個輕鬆啲既行程。前一晚我地係波蘭遊左一日，最後遇上火車 delay 搞到半夜先返到去。好在今朝可以好好咁訓到夠，好好嘆杯咖啡食個靚早餐先再出發。
德國足總一早就公布左聯賽首輪既賽程，雖然我地好想再去睇柏林聯，但更加想去奧林匹克球場見識下，好好彩咁第四週編左哈化柏林踢主場。同時又好興奮咁得知第五週係英式比賽週，即係週中會大比賽，柏林聯會係星期二迎戰 Holstein Kiel，可惜因為機票行程關係，我地星期二下午就要走，唔可以一口氣睇哂柏林兩大球會。
哈化柏林對慕遜加柏既戲碼聽落好似無咩特別，但以花生友角度黎講絕對唔可以睇小呢場波！慕遜加柏既球迷組織同柏林聯既友誼一直都係公開的秘密，係比賽前一週佢地正式宣布雙方結盟確認大家既友誼關係，即係話慕遜加柏作客西柏林會被視為一場球迷打比戰。
我地等到哈化官網開始公開售票就即刻買左三張 31 區上層看台既波飛。奧林匹克球場平時真係好難坐得滿，即使拜仁去作客都好容易可以買到飛。呢個球場真係太太太太大，就算坐左幾萬人睇落都仲係好似好吉咁。所以佢地舊年提出計劃起新球場，希望可以趕係租用奧林匹克球場既合約完結時搬到去新球場，暫時仲未知市政府批唔批準佢地用奧林匹克公園黎起新球場，如果申請被拒的話佢地就要搬去另一個地區既球場。
係德國，除左拜仁慕尼黑之外，其餘職業球隊既波飛都會包埋當地交通費用，通常係開波前 3-5 個鐘就生效至凌晨 3 點。（記得 check 清楚波飛上既條文）呢場波 3 點半開波，即係我地最早 10 點半先可以拎住張波飛去搭車。 我地先去遊客地方兜個圈，為我地未去過柏林既朋友做下導遊，先去 East Side Gallery 好極速咁專過堆遊客望下 graffiti，再去 Hackesche Höfe 兜個圈，然後參觀下鄉下無既大火車站。本身諗住出去望下條河同遠觀下啲政府大樓，但門口有班人係度遊行抗議咁，大約 1 點我地就搭 S-Bahn 3 號線去奧林匹克體育場站出發。
係 S-Bahn 一出站就即刻會見到個球場，離遠睇都已經覺得好靚好震撼。我唔識形容建築物，只可以話好靚好靚好靚，好似真係未試過用個靚字黎形容一個球場。遊客可以係比賽日以外既日子免費去球場參觀，我建議大家有機會一定要去望下！！！！有波飛既我都建議早啲去球場附近參觀下，因為呢個公園好多野睇。雖然睇相見過好多次，但親身去到都一定要自己影返幾張相，包括場外既奧運五環，西看台，游泳比賽場地等等！個泳池到而家都仲運作緊架，平時仲會開放比民眾入場使用！場外仲有好多告示牌去講解奧林匹克公園同球場既歷史，可以好好認識下德國。
當我地係屋企收到波飛時，入面仲有一張明信片 size 既卡寫明球場有手袋限制，只限細個 A4 size 既手袋入場，背包、運動手提包之類既大袋唔可以帶入場，如果唔想自找麻煩就記得唔好帶大袋入場！雖然佢寫到明唔可以帶背包，但我都係帶左個迷你狐狸背包入場，最後都成功入場。
差唔多開波我地就行去看台搵返自己個位，我地以為要行勁多級樓梯去上層，但原來球場入口係位於上層看台，即係話買下層看台既人離場時要向上行樓梯離場！！我不嬲都唔係好中意有跑道既球場，但唔知係咪因為當中既歷史元素令將呢個球場帶左去另一個 Level。成個球場外圍都好似博物館咁，真係好靚，入到球場就好似去左第二個世界咁好新好現代。加上大大小小既球會都夢想住終於一日可以去柏林比賽，因為入到德國盃決賽就代表能夠係國際賽亮相。亦都係因為每年都有外人去奧林匹克球場「踩場」，哈化球迷有時都好唔中意成日都有其他球迷企係佢地既看台上… 所以最好佢地可以有一個真正屬於自己既球場同看台。
哈化柏林既球迷看台位於東看台，慕遜加柏球迷就位於西看台（近南看台部份）。我地既位置可以清楚睇哂兩邊球迷～ 哈化柏林既球迷早前抗議球會擅自更改開波前播放既歌曲，一直以來哈化既主場賽事開波前都會播放球會會歌 Nur nach Hause，最終球會都肯聽球迷既聲音用返會歌黎開場。
我對呢場波真係無咩期望，應該話唔知期待啲乜。柏林聯同慕遜加柏係朋友，但柏林聯當日有作客賽事，即係唔係會好多柏林聯球迷入場幫慕遜加柏助陣。哈化作客我地見識過，一般啦，而哈化柏林既主場氣勢又會係點呢？佢地有咁大個球場，平時睇相睇電視只係見到好多吉位，都唔知佢地把聲夠唔夠大，同埋到底西柏林既人點睇呢隊波？係柏林聯既地盤我地見到有好多 FCU graffiti 但搭車去球場時都唔見有哈化相關既野。對呢隊波有好多問號（自己比自己既答案都偏負面），但最後真係出乎意料之外。
呢場波最後有超過五萬人入場，氣氛仲要超好！慕遜加柏球迷一齊搭特別班次火車到柏林為球隊打氣，賽前準備左球會顏色既黑綠白旗海慶祝其中一個係柏林成立既球迷會 30 週年紀念：「Fanprojekt MG… gegründet an der Spree」。 今年同時係哈化柏林既主要球迷組織成立 20 週年，好可惜佢地無係呢場波慶祝….. 但佢地都準備左好多大字報去挑釁對方同鬧球會及足總！
當中包括對球隊內部既不滿，寫大字布提醒球隊唔好再諗住停用會歌改變傳統；同埋表示對電子廣告總監既不滿。仲有質疑慕遜加柏同柏林聯之間既關係，因為當慕遜加柏同柏林聯某個球迷組織宣布正式結盟後，有其他柏林聯表示不滿，所以哈化球迷就拎呢件事黎笑佢地，叫佢地出黎澄清下到底咩事。然後再拎柏林聯既會歌其中一句出黎諷刺佢地「唔係對西方既錢無興趣 (kaufen) 架咩？同西德人一齊飲酒 (saufen) 就無問題呀？」就連流氓組織都整左大字報挑釁作客球迷。
場上面既球員我地都係無個有特別認識，除左慕遜加柏既莎蘭球員 Patrick Hermann～ 不過呢場波真係好好睇！客隊最先以 12 碼開紀錄，主隊失望左唔夠兩分鐘就追和返，看台上既氣勢都越黎越勁。哈化柏林其中一個眾所周知既打氣口號係 哈呵嘿, Hertha BSC! 個哈呵嘿無咩特別意思，但我覺得呢句野好得意。三分鐘後哈化再射入一球反超前！成個球場既人都好興奮咁打氣到完上半場。呢一刻係其中一刻令我覺得意外既時候，真係無諗過西柏林人對球隊熱情程度會比我想像中高咁多。
呢兩個星期既比賽週都有唔同既抗議活動，例如下週有頭 20 分鐘安靜睇波，比足總睇下為電視直播收入而放棄球迷既後果就只會得返一個無氣氛既球場。而呢個比賽週就係抗議德國舉辦 2024 年既歐國盃，將原先德國爭辦歐國盃既口號由「United by Football. Vereint im Herzen Europas」改為：「United by Money. Korrupt im Herzen Europas. Wir brauchen keine gekaufte EM, sondern Veränderungen!」（為錢而團結，在歐洲中心貪污。我地唔要買返黎既歐國盃，我地要既係改革！」
下半場哈化柏林打開比數到 3：1，但客隊仲未放棄幾分鐘後又追返一球。賽前統計佢地既積分，射門同入球數字都係一樣，所以兩隊波既實力係五五波，但哈柏今場真係踢得好好，組織流暢，前鋒又企岩位個波一到就送到入網，最後以 4：2 完場全取三分係 100％ 值得。
完場前，東看台球迷全部一齊手搭膊頭左搖右擺，用低音發出「哦….」既聲，中間主隊作出換人調動，球迷為兩位球員鼓掌，但呢個舉動無打斷東看台既「哦」聲，佢地一路搖搖到成個球場既球迷都一齊跟住搭膊頭一齊係度哦哦哦，然後一齊 fing 頸巾唱 Hertha BSC 唱到完場。等到球員過黎時一齊大叫 Spitzenreiter （榜首），即刻笑左，幾個鐘後拜仁咪又上返去第一！
哈化球迷既團結的確令我幾驚訝，不過唔知呢個係咪因為開季成績唔錯而帶來既假象。睇返上季佢地大部份比賽都係得三至四萬人入場，今場有成五萬人係因為對慕遜加柏好重要？定係因為成績？點都好，呢場波比我地既印象真係唔錯，如果要搵野彈既話真係個球場太大浪費左！
完場後我地行去搭地鐵返去市中心，地鐵站離球場比較遠，但地鐵可以直達我地想去既站～賽後我地約左西班牙朋友好好食返餐飯聚舊，然後再去學生區轉場 Happy hour 續攤～ 明天朋友會去睇低組別賽事（哈化二隊同三隊-,-），我就去帶朋友去玩。柏林由頂級聯賽到超低組別都有大家意想唔到既熱血球隊，唔係一時三刻可以見識得哂～～我黎左咁多次柏林都仲要睇哂我想睇既野呀！！！！今次我地仲去到圍牆公園去望下 BFC Dynamo 既主場，又係一個充滿歷史既球場，希望下次可以入場睇波。
－
好啦，岩岩宣布德國成功爭取舉辦 2024 年歐國盃….. 繼 06 年世界盃，18 年後再一次有足球盛事係德國舉行。其實真係完全無興趣囉…