21.09.2018 波蘭甲組聯賽 第九週 MKS Pogoń Szczecin - Wisła Kraków SA Stadion Miejski imienia Floriana Krygiera 賽果： 2:1 (1:0) 入場人數： 3.750 （無作客球迷） 更多相片
幾個月前有位好耐無見既西班牙朋友話我知佢買左機票去柏林，叫我一齊去。當時以為只有兩個選擇：自己揸車或者搭火車，兩個選擇都要最少七個鐘車程，仲要唔係平。後來等到火車做特價，見到 29€ 單程覺得好平就諗住動手買飛啦，好在手㾗用 Skyscanner 睇下係咪真係無飛機由我地附近飛去柏林，比我搵到原來 Easyjet 有機由盧森堡飛柏林，仲要我地想去果幾日唔知點解特別平，好可惜佢每兩日先有一班，我地只好買星期四去，星期二回；叫多一個朋友同我地一齊去，最後三個人來回總共 98€，即係每人只係 30€ 左右！
買完機票就要係咁祈求果五日有波睇，我地一早知哈化柏林會係果個週末有主場賽事（即係柏林聯會作客），但柏林仲有幾間低組別大球會我地都好有興趣，搵下搵下發現位於德國同波蘭邊境城市 Szczecin （德文係 Stettin，讀音：sh笛天，波蘭文我聽火車入面既讀音係 sh蓆ch千）同一週末有主場賽事！！！！
波蘭甲組每個星期五都有比賽，一係六點開波，一係八點開波；即係我地要希望場波會被編到星期五六點開波！如果八點先開波就會趕唔到尾班車返德國。等到出發前三星期終於公布比賽時間，係星期五夜晚，仲要係六點開波！！！真係諗起都興奮，仲要可以係德國用 29€ 買 Berlin-Brandenburg-Ticket （最多五人同時用）係包埋去 Szszecin 既火車同當地交通！車程只係兩個鐘左右。
由於張火車飛要 9 點後先生效，所以我地等到 9 點鐘後既第一班火車搭到去 Angermünde 轉車，然後直去 Szczecin 火車站。火車站係條河旁邊，一落車就見到河既對岸有個超大 Pogon Szczecin graffiti。我地三個都係第一次去波蘭，人生路不熟，亦都唔識講波蘭文，靠事前準備搵電車搭去市中心一個商場搵舖頭搵當地貨幣。1 歐可以換到大約 4 polish zloty (plz)，唱完錢就搵 fan shop 買波飛。
波蘭之前申辦歐國盃時要先搞好球場安全問題，當地就要求所有球隊實行 fan card 制度，即係每個球迷一定經佢既球隊申請一張卡先可以買飛，張卡入面有球迷既名、身份證號碼同地址等個人資料，主要用黎防止來自其他城市既死敵混入主場區搞事。現時大部份球會已經棄用呢個制度，但 Pogon 係其中一隊要 fan card 既球隊。雖然上網睇左話外國人士可以唔洗買卡，但職員都係要求我地比身份證佢搞 fan card，唔洗填 form，職員幫我地入哂所有資料落電腦。申請左張卡後，職員就問我地想買邊個區，我地㨂左主看台有上蓋既區，即係最貴果一區，因為最貴都只係 30plz…. 最後我地三條友總共要比 120plz （已經連埋張卡），即係 30€，亦即係每人 10€ 就可以睇波蘭既甲組聯賽仲要坐靚位！！！唔係淨係呢場無吸引力既波先咁平，其他聯賽賽事都係大約呢個價位。
Szczecin 只係波蘭第七大城市，係市內其實無咩野好行，亦都無咩好睇。條街上面亦都無咩人，去到所謂既市中心都係無咩人。唔知係咪因為我係捷克住過一排，所以覺得無咩特別，只係有一種親切感。當地既人同物都同捷克好似（好似東歐就係咁既樣），連普通打招呼講唔該之類既單字都同我仲記得既捷克文差唔多。事前問定波蘭朋友推介當地食物，搵到間餐廳就入去醫肚！三個人叫左三份野食，三杯野飲最後再黎多杯咖啡，總共只係 30€ 左右好抵食！ 食飽後仲有三個鐘先開波，又無野好做，所以我地就慢慢向球場方向出發。最衰波蘭法例唔比人係街上面拎住酒精飲品一路行一路飲，我地見到超市都只可去買枝水就繼續上路。
比完錢發現出面倒緊水！頭先明明仲勁熱好好太陽，我地知當晚會落雨，所以一早準備好哂風褸用黎擋雨，但天氣預報明明話六點幾先會開始落雨架！好在呢場只係過雲雨，等左五分鐘左右又出返太陽仲見到彩虹！再行多十五分鐘就見到球場既射燈，經過球場旁邊既火車站，沿路去到作客區入口，再沿住條路行就去到球場正門。途中由一位客隊球迷既訊息得知今日唔會有作客球迷到場… 唉，我都知我地唔會咁好彩架啦，係我地去睇波先被罰關閉作客看台…
頭先落完場雨之後就一路都好大風同埋越黎越凍，主看台入口旁邊係一個泥地停車場，每次有車駛過都一陣沙塵飛起哂要食土！由於有太多時間淨，我地圍繞球場行左一個圈，買左條頸巾就紀念就去返自己個門口入場。去到閘口，拎張 fan card 出黎嘟一嘟就可以入場，每道閘都有三個保安企係前面，由你踏入球場果一刻佢地就已經會塞住你搜你身同袋。雖然我個小袋子塞左兩件嬲，佢地都無叫我打開比佢地睇，就咁望一望就比我入場。
所有既看台入口都係看台頂，即係一入到去就可以由高處飽覽呢個可以容納大約萬八人既球場。雖然個球場唔係一個有田徑賽道既運動場，但佢地龍門後既看台係一個 “Curva” 典型彎看台，唔洗講都知呢個 Curva 係屬於主場球迷組織既地盤啦！
我地不嬲都對波蘭既球迷文化好好奇，一直都只係得基本認識，普遍黎講東歐既球迷都比西歐球迷更加激進。我地一直都對東歐既文化好有興趣，咁岩近期有人寫左一本講關於波蘭球迷既 fanzine ，有另一本講得更加深入既書不過好貴同埋暫時我地平平地睇下「入門級」既書仔都夠。波蘭既球迷文化好複雜，係德國或者其他國家，唔少球迷組織都同其他組織結盟，間唔中去幫朋友助下陣咁，然後有時朋友既朋友都會當係自己既朋友咁。例如 A 同 B 係朋友，B 同 C 係朋友；而 A 同 D 係敵人，咁 B C 都會一齊視 D 為敵人。
但係波蘭呢， A 同 B 係朋友，B 同 C 係朋友；而 A 同 D 係敵人，B 同 D 可以係朋友，D 同 C 可以係世仇，係我地既角度真係完全諗唔通點解可以係咁。而佢地有更多既組織係借球隊既名義去撩交打，當然每個國家都有呢啲球隊流氓，但波蘭比我地所認識既流氓更加流氓，佢地唔只以城市（或市內區域）做地盤，更加會畫某幾條街做自己地盤然後每幾日就過隔離街搞事，呢啲係波蘭黎講已經係日常到連報紙都唔會再寫。呢啲只係最基本既資料…. 睇完本書之後真係頭都大埋，亦都覺得好吸引，因為真係完全另一個世界。Anyway，今場波既主隊 Pogon Szczecin 既球迷組織比起其他波蘭球隊可以話係蚊型，作客球迷又被禁入場…. 即係無野好睇 :\
開波前大約一個鐘天色越黎越暗，以為雨帶開始殺到，但係個天唔係越來越黑，而係越黎越啡，由個底啡上去，大約十分鐘後，呢陣啡色既「雲」吹到埋黎，係沙塵暴！！！！！突然之間好似卷左入去個龍卷風咁超大風，球場上無被綁好既廣告全部吹走哂，我地用背擋風但完全開唔到眼，因為全部都係沙同石，硬食 15 分鐘後場沙塵暴終於走左，然後我地成口成面都係沙…. 跟住就開始超大風大雨。個球場上蓋比旺角場個上蓋更加廢，一來個上蓋勁高，二來勁細，三來後面通風既，所以基本上全部人都係濕哂。 （後來返到德國睇返新聞，原來場沙塵暴由 Brandenburg 吹過黎，德國多條高速公路要關閉，黎到波蘭時已經算係弱左好多）
越近開波就球場就越黎越多人，我地附近都坐滿哂人。而 Pogon 既球迷組織成員亦都開始出現，佢地好辛苦先成功係強風下掛起兩大塊橫額。好可惜佢地企既位置近我地既看台，即係佢地聲音方向係向住另一邊，再加上我地附近既球迷長期都十分激動咁叫囂，所以我地唔係成日聽到佢地既打氣聲。更加奇怪既係，通常鼓聲係最大聲，但當日我地完全聽唔到鼓聲，個鼓手睇落都好似無咩用力咁….. 不過佢地的確全場企係度叫足九十分鐘。果然係波蘭球迷，佢地唔會淨係企係度叫唱，佢地會不斷咁拍手舉手之類連埋身體動作咁去打氣，仲要個個都光頭勁大隻咁，總之遇到佢地你係唔會敢直視佢地。
聽唔清球迷組織既聲係有啲失望，但主看台上既球迷既激情已經足夠令我地大開眼戒。看台底有幾個阿叔係咁帶起啲人一齊唱歌，帶唔起時仲鬧返啲人轉頭問佢地做乜唔一齊唱。唔知點解佢唔走去龍門後面一齊唱呢？後來佢搵到幾個志同道合肯同佢一齊唱歌，佢地就好開心咁拎住啤酒咁又唱又跳。波蘭既球迷比我地既印象係戰鬥格，呢場波亦都證明左係真既…. 男女老幼都好激動，我旁邊既後生仔仲要路用瓜子攻擊。
呢場波既比賽節奏好快，不過完全唔理解球證既吹罰準則，搞到班球迷超級嬲，成個看台一齊指住球證大叫益力多（唔知佢地講乜，但聽落似益力多）。賽前主隊排尾二，而客隊排第二，相方實力應該有一段差距，但主隊睇落完全無輸蝕，仲要開波 15 分鐘就領先一球！ 去到下半場開波無耐就射入第二球，一直壓住客隊黎踢。
之後第一次係現場睇 VAR，球證走左去睇電視睇左起碼五分鐘，以為佢會吹返轉頭比十二碼，但佢只係罰客隊球員一張黃牌。 總之我地係完全唔知咩事既…. 完場前客隊追返一球但都無用，主隊咁就爆冷咁贏左。球證一吹雞我地就離開球場趕住搭車返去火車站，因為賽後只得一班車返德國，預左有半個鐘 buffer 但都勁驚會遇上塞車定唔知乜搞到要留係波蘭。
係雨中要行十分鐘先去到電車站，一開始仲要搭錯車，好在發現得切仲可以轉車。去到火車站仲有二十分鐘左右，站內間 KFC 未關門諗住買外賣上車食，但有成十幾個人係度排緊隊…. 只好去便利店買零食醫肚。搭車去到 Angermünde 轉車，廣播話下一班車因為之前沙塵暴影響會遲半個鐘….. （場沙塵暴已經係四個鐘前既事！！！！）
當日由原本差唔多 30 度，去到夜晚得返唔夠 10 度，仲要係火車站咁樣呆等真係好想喊… 本來諗住搭到去柏林大車站食野，但無啦啦咁樣多左半個鐘即係要成十二點幾到達，所以直接返去算！回程唔知點解用左差唔多 4 個鐘…. 返到去成身散哂。有時真係會問返自己點解會有個咁既嗜好，好地地一個假期唔去休息，反而搭幾個鐘車去睇場波，唔知曝曬兩個鐘就係冰天雪地急凍兩個鐘，超過一半既行程都勁多阻礙…. 好在大部份都係值得花咁多時間同精神去見得更多更多既文化。有機會一定要去波蘭睇多幾場波！！