15.09.2018
德國西南地區聯賽 第 9 週
SV Elversberg - SC Hessen Dreieich
Waldstadion an der Kaiserlinde
賽果：4:3 (2:2) 
入場人數： 687 人 （ 18 名作客球迷）
更多相片

繼上場作客終於成功入到兩球波贏得三分，今場我地返到主場對榜尾球隊（我地係尾三）。對方係早幾年先成立既 Hessen Dreieich，以為佢地無球迷啦，點知出乎意料地有差唔多 20 個人企係作客球迷區打氣！作客區前仲有兩塊紅白色既電腦印制橫額，仲有兩塊印有球會會章既大旗。

賽前估波遊戲我繼續估球隊輸波，因為隊波通常對廢隊都無咩運行。更何況對方上場主場對贏到開行既 FC Homburg 輕鬆贏波，呢啲升班馬係剛開季既時間絕對唔可以睇小！但呢場波對我地黎講亦都十分之重要，雖然對方被其他球隊視為魚腩，但對我地黎講係護級對手，所以輸波既話真係肯定今季條路唔會易行。

球隊今季踢得咁差，好多人連去球場都無動力，唔好話仲有無人想一齊打氣。以聲勢黎講一定差左，但仍然有唔少人一齊想唱歌唱走個領隊。最近兩場興起左一首來自多蒙特改編既新歌，歌詞大意為就算球隊贏波，我地仍然會繼續唱歌要領隊辭職；然而輸波時我地都會企係場邊為我地既球隊繼續唱歌打氣。

開波幾分鐘對方就係門前輕鬆篤左個波入網，作客球迷當然勁開心咁慶祝啦。無耐之後，對方又有一次射門機會，點知射中我地後防球員隻腳改變方向入網。我地真心笑左出黎。 嬲嬲地鬧左幾句之後大家又開始唱歌鬧領隊。中間有唱一兩首歌叫球員加油，但其他時間都係無啦啦有人係度 9up 改詞大家笑住咁苦中作樂。35 分鐘到對方入個烏龍波比我地追返一球，完半場前球證吹罰對方禁區犯規，主射十二碼既依然唔係前鋒，即係開季以來十場波我地既前鋒仲未射入一球波！ 不過邊個射都唔緊要啦，最緊要係入到波追和。

下半場第 55 分鐘係我發緊夢既時候對方又再一次射入領先…. 真心唔知講乜好。呢個時候大家又有另一首新歌去「歌頌」領隊，大家互相搭住大家既膊頭，好似唱聖詩咁左右搖擺 😀 😀 唔睇比數真係會以為我地領先幾球太悶要搵野做。

我想話，我地既前鋒 Koffi…….. 又唔可以用賓迪基黎形容佢，因為佢明明上季踢得唔錯仲入左幾球好重要既入球，但今季真係唔知佢踢乜，又唔夠人扭，推波可以好地地推甩左，總之每次個波傳到去佢腳下就一定唔會有希望。總之見到佢掂波都好嬲！ 去到七十幾分鐘，我地有個角球，當時 SVE 向住 C1 主攻，望住個波飛入禁區，去到遠柱… Koffi 竟然搶贏頂左個波入網！！！！！！！！！ 好耐無睇波睇到尖叫（平時好憎人尖叫….-.-）真係「丫！！！！！！！！！」 咁樣大叫… Koffi 入波呀！前鋒入波呀！我地又追和啦！！！！！（但對手其實只係魚腩）

諗住今季咁既成績一分都收貨，呢場波好多入球，好似好緊湊咁，但場上既節奏其實勁慢勁悶，一啲都唔覺得熱血。唔係果種球員出盡 200％ 血汗去追波，超有鬥心咁想搶分，而係「唔知點解又入左波」既感覺。去到補時階段，對方想拖時間，龍門食黃牌，其他球員變哂豆腐咁一掂就跌。去到最尾一分鐘，我地係近球角位置有個罰球，點知斬得唔夠高比對方頂出底線。球證望一望錶之後表示可以開埋個角球，即係呢一次真係最最最最後一次機會。

我地係看台上有個小遊戲，就係將飲完既膠杯向下拋，如果個杯企得穩就會有好運。半場休息時有個人成功拋到個杯企左係度（真係好難得！！），有人即刻話「 ya!! 我地陣間會反勝啦！！」呢啲低智迷信野聽下就算，但估唔到…. 最後呢腳角球開出，先比對方輕輕一頂去左遠柱，比我地一腳篤左入網！！！旁證無吹越位，一大班人超興奮咁衝哂落去。而球證同時都吹雞完場，波都唔洗再開過！

慶祝完之後，大家又歸隊大叫領隊辭職！同時又為球員鼓掌，多謝佢地為我地搶返三分返黎。呢一場波…. 真係唔知可以點形容。對住榜尾球隊我地都踢得咁辛苦… 成場波完全唔會令人覺得係踢得比較好既一隊，之前既問題仍然存在，毫無組織踢波。不過三分已袋…. 而家以 11 分排尾四，同中游球隊相差兩三分。 希望黑氣遠離，慢慢可以爬返上去。升班應該就無望架啦…. 但踢波踢好啲得唔得？？

下星期我地唔會跟球隊去作客… 因為我地會去柏林幾日，順便會去新球場打卡！好多機會我地會見到大型 choreo… 好期待～～～～