08.09.2018
德國西南地區聯賽 第 8 週
TSG Hoffenheim II - SV Elversberg
Dietmar-Hopp-Stadion
賽果：0:2 (0:2)
入場人數： 243（45 名作客球迷）
更多相片

國際賽賽週期間，德國既頭三級聯賽都會暫停比賽一週，好多時候地區聯賽以下既比賽都會繼續有比賽，所以我地唔洗受無波睇既痛苦～

話說頭七場聯賽加埋只贏過一場，總共入過兩球波。上場主場輸左比 Ulm 之後，球隊突然係星期一宣佈約戰左一隊鄉下聯賽（連 Kreisliga 都不如既聯賽）球隊黎一場友賽。可能想借大炒魚腩部隊去幫班球員搵返射門同入波既感覺，最後以 12 比 0 完場。

黎到第 8 個比賽週我地要作客 Hoffenheim，球迷巴士於 10 點半由 Elversberg 出發，1 點到達 Hoffenheim 既 Dietmar-Hopp-Stadion。 成程巴士大家都好開心咁係咁唱歌改歌詞，全部係鬧領隊 Roland Seitz。架巴士呢兩季只可以泊係山腳，即係我地要行上山頂既球場！！有幾個老人家行到索哂氣勁辛苦。

一入到球場一班餓鬼第一件事就係去買豬扒包，好多人塞左係小食亭前面等職員即刻折袋燒豬扒。西南地區聯賽 18 個球場就係得呢個球隊有球扒包，仲要配鮮制勁多汁既燒洋蔥，其他球場只有腸仔同漢堡（Offenbach 之前有 Schnitzl 但今季無左！！！）我好好彩第二個搶到包，到我食到一半時，豬扒包已經賣哂！！！！其他人好驚訝咁話「下，唔係卦，你估我地黎係為左睇波架？我地黎食豬扒包架！！！」有人提議職員過去主場小食亭度拎多兩包豬扒過黎賣，職員話睬你都傻，食腸啦！

SVE 既死敵 Homburg 同 Hoffenheim 係朋友，今個星期無德甲，我地原本都有擔心佢地會黎搵我地搞事 （上季佢地都有出現）。最後好和平亦都無人出現，只係對面有一個球迷係咁係度9 叫唱歌。 我地可以安心啲輕鬆咁睇波。

開波五分鐘左右，SV 竟然憑住一個角球將個波頂左入網！！！！！！！！（後來先知其實係烏龍球）完全唔敢相信自己對眼！！ 十五分鐘後，今季新加盟既中場球員 Feil 射入第二球波！！！同時賀芬咸既球員對我地都無乜威脅。不過即使我地領先緊，大家仍然唱歌叫領隊走。

臨完上半場前見到小食贏職員真係拎住幾包腸仔同豬扒係球邊走過黎，我地即刻為豬扒高歌！！

下半場，SVE 唔單只再無波入，仲要連攻勢都無埋。過去幾場既問題仍然係度！呢八場波我地未試過下半場入波，即係有好多問題仲未解決。只係對方太廢我地先可以入球波同贏波！上場贏波又係對 Dietmar Hopp 部隊，唔通我地係佢既剋星？

客隊既攻擊方向向住作客區，有一腳飛機個波比我地接實左，我地即刻收埋想帶走。點知有職員老遠走入黎看台黎拎波囉！佢想逐個逐個人 check，我地最後都係放返個波落地下，然後話佢姑寒。佢回應：「都輸左兩球波比你地啦！」 仲有我地前面既旁證動作勁慢，由於個球場得二百幾人勁安靜，我地講乜個旁證都聽到，最後佢都比我地煩到笑左。總之今日係難得歡樂既一場波！

完場後我地繼續大叫 Trainer raus，唔好以為贏左一場波我地就唔反你！球員照樣黎到看台前鼓掌多謝球迷既支持～ 我地亦都慢慢執野黎開，然後坐 2 個半鐘巴士返去。

其他主要對手都失分，唯獨上季升班附加賽搞到比賽腰暫既 Mannheim 瘋狂贏波，現時領先第二位五分排榜首。佢地附加賽搞事既手尾仲未完，足總仲係度傾緊要扣佢地幾多分 （由原先話 9 分到而家可能只扣 3 分）。如果最後佢地真係被扣 3 分，佢地都仲係領先 2 分，睇黎今季佢地立定目標一定要贏冠軍升班。（老實講，我都祝福佢可以升到班，地區聯賽太委屈佢地班球迷啦）