01.09.2018
德國西南地區聯賽 第 7 週
SV Elversberg - SSV Ulm
Waldstadion an der Kaiserlinde
賽果： 0:1 (0:0)
入場人數： 912 （60名作客球迷）
更多相片

好野，又輸一場波！對方入波時真係忍唔住拍手，讚美一下我地報陣十分成功既領隊。

呢隊波原本可能無咩人識，不過人地兩星期前係德國足總盃第一圈爆冷踢左應屆冠軍法蘭克福出局；同時開季以來成績都唔錯，係聯賽榜上游位置，淨係睇數據都知我地唔會夠人勁。

大家一直覺得隊波會係最出乎意料既情況下贏波，例如呢場個個唔睇好既情況下大炒對方。一場之後又一場，場場都覺得會贏，隊波偏偏就輸比你睇！

講到個口都臭，場上情況同過去咁多場都一樣。對甲組既狼堡又好，對今季暫時踢得唔錯既 Ulm 又好，對方牌面有幾多優勢都好，落到場時我地仍然係中場有能力搶得贏，同時亦都對方有咩明顯優勢。早兩場我話要贏波首先就要識入波，但過多兩場我只可以話，要入識就要先肯起腳射波。

領隊今場收起踢左幾場正選都無乜表現既前鋒 Koffi，派左間唔中有神來之筆既 Perstaller 踢單箭頭。雖然佢今場無波入，但佢係前場好活躍造到唔少機會。點知去到下半場，踢得好地地時竟然被換走，換入 Koffi 頂佢個位。過左咁多場其實好明顯睇到單箭頭根本就唔可行，因為佢地成日走左後面又唔夠快上返最前，其他球員同樣唔識走位去頂吉左出黎既空位，變到最後果一腳無人係禁區中心接應。就算有人接應，佢地都無立刻射門既意識，係都要推返順先起腳，呢個時候個波已經比人篤走左啦。

上半場我係看台頂睇波，聽到唔少其他球迷既金句，果然係啲阿叔講野先最精警最好笑。「我地比 10 歐入場睇波，你地（班球員）就免費企係度睇波，公平咩！？！！」聽完之後我都嬲嬲地勁想叫球隊回水！

對方既攻勢真係唔多，但人地一次機會足以收我地皮。佢地有大約 60 人黎作客，氣氛只係麻麻。我地大部份時間都好安靜，但係都聽唔到佢地把聲。佢地入波後，班球迷好激動咁慶祝，呢三分可以拉開佢地既優勢。

如果要學我地領隊既正面態度既話，我地今場射中目標比之前幾場多，起碼中左兩次柱…. 有一下我真係以為個波會飛入波，點知都係過唔到條柱……… 領隊話我地要睇 big picture，要 focus 去下一場喎。聽佢講野完全唔似就快比人炒咁。

完場後班球作客球迷唱左好耐歌，當中大部份都係針對同恥笑我地，但我地唔識閒理佢地，更重要既係要比領隊同球隊踢到我地既不滿。但佢地真係好煩，有人話：「隊隊波都係我地身上搶到分啦，你唔好以為自己好特別呀！！！！！」 咁樣既自嘲真係好心痛….

我地同樣繼續拍手鼓勵班球員繼續努力，佢地過黎時我地要佢地理解現時針對既係個領隊唔係班球員，球員們亦都表示佢地明白我地既反應。 大佬，七場波得五分，榜尾隊升班馬特別廢我地先唔洗包尾咋。望下丙組既凱莎羅頓同樣得五分，但點解人地排尾六，我地就尾二？？