25.08.2018
德國西南地區聯賽 第 6 週
Stadion am Bruchweg
FSV Mainz II - SV Elversberg
賽果：0:0
入場人數：590 （65 名作客球迷）
更多相片

德甲球隊緬恩斯早幾年係市外起左個新球場，淨返舊球場比預備組用，不過呢個舊球場正進行逐步拆毀工程。現時近作客球迷區既龍門後看台已經無左，唔知佢地拆左個球場後會用黎做乜呢？

作為一個前德甲球場，場內設備當然十分齊存。由鏡頭影到企滿哂人既 Bruchweg 睇落可能唔錯，但其實呢個球場設計十分簡陋，只係一個由鐵皮同鐵通起出黎… 一班大細路係咁拍啲鐵皮造成勁大回音，嘭嘭聲咁響！

今季連埋場德國盃已經踢左七場波，但我地只取得兩個入球。今場波唔係悶和，大家都睇得好激動。中場搶到波，然後交失波既戲碼不斷重演。仲有死都要推個波去中間先射，仲有龍門前面總有一隻腳擋住，仲有手球無吹十二碼，仲有開角球傳波傳返去比龍門等等等等，全部都係激到球迷嘔血既事。

一兩個球員屎波犯錯好易睇得出，但唔通我地真係成隊波都咁廢？大家都中意個波上腳，然後引兩三個對方球員埋身，仲以為自己腳法如美斯可以輕鬆扭過？係咪真係無人識走位？點知球隊成日堆埋左去一邊，到另一邊有空位時又無人提場轉邊？ 點解球員永遠慢個波幾步？點解我睇其他比賽，人地可以好輕鬆咁走位篤個波入網……..

雖然仍然執到一分，亦都睇得出球員十分落力，但整體表現仍然唔合格…. 球迷只好自娛，仲突然間作左一首新歌出黎。球證吹雞完場後，作客區內既 65 名球迷一齊大叫 “Trainer raus!” 要領隊走。球員們走返去後備席時，領隊自己一個先返入更衣室。球員好似唔敢走過黎咁，我地向佢地拍手鼓掌，想比佢地知我地唔係想鬧佢地，唔想怪佢地，想佢地繼續加油。 佢地最後都過黎同我地短暫交流一下就返入更衣室。

現時我地以 5 分排尾二，榜首既就有 15 分。 今季真係唔知要捱到幾時先可以見返希望！

題外話：球會同我地講返，原來足總因為我地係德國盃場波向球場扔白紙罰左球會四千歐，仲叫球會可以睇返影片捉扔紙既人出黎然後罰球場禁制令，球會既回應係：（叫足總）收皮啦。扔幾卷紙就走去叫罰人你估個個都好似足總咁弱智？