22.08.2018
德國西南地區聯賽 第五週
SV Elversberg - FC Astoria Walldorf
Waldstadion an der Kaiserlinde
賽果：1:0 (1:0)
入場人數：978 （無作客球迷）
更多相片

呢個星期我地係 Elversberg 小住一星期，星期三趁夜晚比賽前有時間就把握機會黎個莎蘭一日遊認識多啲呢個小法國。

就如好多其他國家一樣，每個地方總會對其他地方有唔多唔少既「歧視」，有好多針對其他地方既笑話，而來自莎蘭既人經常比其他州份既人笑係法國人，甚至係「無身份」既人。莎蘭以前曾屬法國，現時係州內仍然會搵到唔少法國文化既蹤跡；莎蘭語亦都有唔少字眼係由法文而來，莎蘭小朋友仲要好似香港人要學英文咁要學 N 年法文（但最後都係唔識講）。

莎蘭曾經短暫獨立過，仲有莎蘭隊去參加過世界盃外圍賽！最後經過一輪公投，莎蘭人唔想獨立，「自決」成為德國一份子，直至而家。如果你問其他德國人對莎蘭有咩認識，佢地除左會話莎蘭係法國之外，佢地可能仲會覺得莎蘭好似魯爾區 (Ruhr) 咁污糟。因為礦業曾經係呢個州份最重要既工業，對整個國家黎講亦都有相當高既份量。

Elversberg 呢條村都係因為礦工而出現，成個州既小朋友細細個就要學唱採礦歌 Steigerlied。大家都知史浩克係著名既礦工球隊，佢地每場波播會歌前都會播採礦歌，同埋佢地常用既打招呼係 “Glück auf” （例如入波後其他球場擴播最後係 Danke，然後球迷回答 Bitte；但史浩克係 “Glück!” 然後球迷回應 “auf”），對礦工黎講，能夠平安上返地面就係美好既一天。而莎蘭出產既最要主既有煤礦同鋼鐵，雖然佢地唔知西部礦區咁廣為人知，自 2012 年起更加已經終止所有採礦活動，現時仍然有製鐵工場，當中最出名既就係 Saarstahl；但礦業對莎蘭仍然十分重要。

賽前我地去左一個叫 Ensdorf 既小鎮，當地有個座人工小山，山頂上有一個「又」字型既塔，用作紀念莎蘭既礦業。莎蘭地區有好多呢種人工山，材料全部來自採礦時從地底挖出黎既沙石。係山頂可以望到 Dilligen 既製鐵工場，睇住佢地既煙通因進行冷卻過程而噴出好似雲咁厚既白色水蒸汽，然後望到一層薄薄灰色既塵係半空飄揚，硬係覺得即刻呼吸有啲困難！

然後我地就去左莎蘭必到景點 Saarschleife，由觀景台望去莎河既景色，同樣係每個莎蘭人曾經到過既地方。欣賞完景色就當然要去當地既釀酒廠食飯啦！莎蘭人介絕呢間 Brauhaus 可以話係佢地既茶餐廳，只有當地人會去，同埋餐牌上有好多莎蘭特色美食，上面用既係莎蘭鄉下話！一定要點既有我最中意食既 grumbeerekiechle，其實即係薯餅配蘋果醬！ 總之任何薯仔做既野食我都好中意食！！！！

夏天係歐洲真係好慘，出面三十幾度唔緊要，但室內同室外一樣熱，完全無冷氣！！！！現時有啲新樓開始有裝冷氣，但接近九成既屋都係舊樓，送部冷氣比你你都唔知可以點樣安裝！我成日比人笑香港人怕熱，但我都會回答：「係香港無咁落後，室內唔會出汗囉！」

飲飽食醉後，我地返去休息大約個半鐘又要出動去球場。（終於開始講下波啦）

對手係賀芬咸分支小隊 Astoria Walldorf （幕後老闆同樣係 Dietmar Hopp），即係唔會有作客球迷入場。估波遊戲我估左  0:1，諗住輸波既話贏到個獎起碼可以安撫下傷痛。點知 SVE 開波八分鐘就入波，俗語有話領先一球最危險，我超認同呢句說話！後防不斷犯錯令客隊有機會係咁攻，好在我地既神龍回歸作出好多精彩撲救！

上季季尾開始神龍 Lehmann 因為要養傷，早兩星期係預備組復出，今場再次正選上陣。原先有人覺得後備龍門守得都好好，但我一直都覺得爭咁啲野。到今場見返佢我就知爭啲乜，就係佢會一直係最後提場，係咁大叫提大家回防，走甩邊個之類，仲會紐亞上身去到中線睇實大家咁。加上佢同球迷關係好好，比賽完結一定會走到看台最前同大家傾一兩句先走。多得佢守住個龍門我地先捱到去完場都無失波。

球證吹雞一刻，全場球迷如釋重負咁振臂高呼，呢三分我地等左一個月有多啦，呢三分真係好好好好重要。得到呢三分，暫時以四分仍然排係降班區，希望今場係好運既開始….