19.08.2018 法國甲級聯賽 第二週 RC Strasbourg - AS Saint-Etienne Stade de la Meinau 賽果：1:1 (0:0) 入場人數： 25.385 （約 500 名作客球迷） 更多相片
作為德國西南部既居民，唔趁地區優勢去睇下鄰國邊境既球隊真係講唔通。我地一直都想去睇 Strasbourg，但佢話近唔近話遠又唔遠。最近已經去左附近既 Nancy 同 Metz，只要去埋 Strasbourg 就可以話睇哂法國東北部既大球隊。
早兩星期發現原來德國火車公司同法國火車公司有共同推出一張叫 Saar-Alsace-Ticket，呢張飛只有在當地售票機發售，係週末只需 29€ 就可以最多五人同行由 Saarland 搭當地交通公司 (Saarbahn) 轉乘法國地區火車 TER 到 Alsace 地區任何一個站。我地由 Saarbrücken 出發，搭電車到 Sarrguemines 再轉火車到 Strasbourg，如果唔計轉車要等一段時間，淨車程黎計唔洗兩個鐘就可以到達目的地！
Strasbourg 係法國其中一個比較出名既旅遊景點，我地都特登早啲出發預時間係市入面觀光。八點出門口，去到 11 點幾。首先研究下點買車飛去球場，球隊官網上寫球迷可以以優惠價買車飛 2€ 來回球場，去 information 問佢話唔知，原來係所有電車售票機都可以買到寫住 “Special Racing” 既車飛。 (當地人以 Racing 黎簡稱 Racing Club de Strasbourg Alsace)。上車前記得要係車站嘟一嘟先，唔係比人查飛見你無 “check-in” 可能會當你逃票！
去到法國我地會去超市買法包、火腿同芝士自己整三文治食！去完超市買野就拎住條法包係市內遊走，好有「法國味」！ 去到最名勝大教堂附近就坐低食法包當午餐～ 食飽之後沿住萊恩河既支流散步，大約 1 點半就搵電車站搭 A 車去球場。搭車大約 10 分鐘就到球場站，落車後行大約五分鐘就會見到球場。開波前一個鐘場外場內已經有好多球迷，係法國黎講算罕見，法國球迷通常都係開波前十分鐘先陸陸續續出現。
佢地點解特別唔同？因為佢地係少有破產降班後能夠成功重回頂級聯賽既法國球隊。係法國，好多球會因為破產而要降班甚至解散，一但降班就可以話會永不超生，但 Strasbourg 係 2011 年破產後，向足總申請從第五級聯賽從新黎過，並一直得到球迷係背後既支持，最終成功一級一級咁升返上甲組。我地最中意就係睇呢啲以球迷為本既球隊！
呢個城市係一戰前原屬德國，RC Strasbourg 最初係以 1. FC Neudorf 之名成立，就咁睇都知係德文名，並參戰德國既聯賽，戰後法國收回東北地區，不過去到二戰前又被德國搶返，曾經挑戰德國頂級聯賽同足總盃，來來回回咁最終都係成為一支法國球隊。不過以前留落黎既德國文化係市內唔同地方都仲係好易搵到，球隊更以德文 “Jetzt geht’s los” 為口號。（不過法國就係法國，唔好諗住去到可以講德文，只會比人黑面！）
球場既設計好奇怪，每邊看台最底都有三級裝有 safe-standing 既企/座位區，只賣 16€，而其他座位就大約 50€。我地幾大都買企位啦，原先睇中左南看台，最容易望埋客作區，不過手腳太慢搶唔到飛，最終只能買北看台。當日太陽超級猛烈….. 頭上一舊雲都無，入到場真係好想喊，個太陽係完全直射北看台，我地要乾蒸咁企係度睇波，望住對面既有陰影既南看台真係超級羡慕。
我地已經早左一個鐘入場，看台上除左球迷組織既看台之外其餘都仲係吉既，但看台前頭三行已經企滿哂人。原來係因為如果你搶唔到第一行黎企，企第二第三行你唔夠高既話（例如我呢啲矮小亞洲人）根本唔會睇到波…. 所以個個都一早入去霸位。我地由正門入場後，要行到去球場另一邊先搵到位企第一行。 後來發現其實無人會 check 你買左邊個看台黎企，想去南看台避太陽，但望去對面見到已經企滿哂人根本唔會有位….. 只好死死地氣曬太陽。
後來曬耐左就開始慣，望住頭頂既作客球迷慢慢入場，又見到主場球迷開始準備打氣，慢慢就唔記得左好熱。 為左搵靚位睇波同睇球迷，我地企左係近作客區既位置，上半場被作客球迷既打氣聲（其實主要只得鼓聲）蓋過哂主場球迷既聲。
Saint Etienne 聖伊天 我地前年睇過佢地作客緬恩斯，當時仲咁岩係球場外遇到警察封路睇住佢地唱住歌咁大搖大擺咁入球場。果次係我地一次聽近排利物浦球迷好中意唱既 Allez Allez Allez，個節奏一聽就已經入左腦。好斯待今次可以再聽佢地唱多次！ 上半場佢地只係係咁唱啲唔洗識法文就可以唱到既歌 Schlala，olele 之類；但佢地每首都唱起碼五至十分鐘先會換歌！
Racing 既球迷組織係 Ultra Boys 90，佢地應該係法國唯一一班無分裂既球迷組織。佢地係開波前一齊 fing 藍白色既旗，為今季第一場主場造勢，掛上「為我地既城市、為我地既球隊、為我地既顏色而戰」。我地身邊既球迷都好激動咁一齊跟住打氣！我地企係看台最前，球場邊線旁邊，不過同球場草皮相隔一個深溝。球場職員每人有個網用黎撈返所有跌左落去既野。
不得不提既仲有見到好多球迷著住法國國家隊波衫去睇波，由於波衫顏色幾乎一樣，唔係特別留意既話真係未必會分到係法國波衫。原本我都無特別留意，只係發現所有人既法國波衫背後都係印住法國新星 Mbappe，一個唔屬於今日兩隊波既球員，唔洗講都知點解個個都印佢啦！
上半場中段聖伊天既球員攔截對方單刀機會時剷中腳而被罰紅牌出場，主場球迷拍哂手慶祝，而作客球迷就無暫停唱歌去鬧球證，一路繼續唱佢地唱緊既歌。如果你只係望住球迷既話根本唔會知場上有事發生。踢少一個既客隊係打後既時間完全無輸蝕，頂得住主隊既攻勢之餘仲成功造到唔少機會！
半場完之前我地慢慢攝返出去看台後面，一吹雞就走去對面南看台，諗住趁啲人去買野食野時偷人地個位。點知完全無人離開！！！！仲有好多人塞住係看台入口，好在眼利既我望到遠處有個空位，攝下攝下成功攝左去後備席旁邊。雖然企唔到最前，但唔洗再受太陽既煎熬又可以睇到波已經好感恩。 好在呢個球場有兩個大電視直播場波，即使前面有兩個大隻佬阻住視線，我都可以睇電視 (-_-)。
轉邊既另一個原因係想可以聽下主場球迷既打氣聲，果然離遠班作客球迷先可以聽到。唔係話主場球迷細聲，只係企得太近就唔會聽到其他聲。我地都再聽唔到作客球迷既打氣聲，即係最後都係無機會聽到佢地唱 Allez Allez Allez。 佢地係半場準備打開佢地既 Choreo，可能佢地太遲入場唔夠時間係開波前準備好所有野，只好係下半場先黎搞。Choreo 最後以紅綠黃色既煙霧黎作結尾。
下半場 55 分鐘主隊先攻入一球，終於見識到佢地既氣勢。射入一刻全場一齊歡呼慶祝，東看台既球迷越唱越有，連帶所有主場球迷都一齊拍手唱歌打氣。佢地一直都重用藍白膠旗黎做唔同既方式打氣 （係德國通常用完一次就 dum）。 可惜一個入球係唔夠佢地贏波既，去到完場前客隊成功追和。 講真，你大半場波都踢多一個，竟然未能夠借人多既優勢去拉開比數，比人地追和可以話係意料之內囉！
完場後，法國人又表演五分鐘離開球場大法，個球場極速清空。我地都返去搭電車去火車站返德國。電車站係賽後超有效率，電車唔會理滿唔滿，總之一關門就會即刻開車。唔似德國咁等到架車塞到門到關唔到搞到道門壞左然後叫球迷自己行路去目的地。 我地花左二十分鐘就返到去火車站，搵間士多買枝凍水解渴。市內周圍都有好多飲水機比人裝水，我地用一秒鐘清左枝水後再裝滿水先去搭火車。
以為整天行程十分暢順時，返到德國搭電車去 Saarbrücken 時，電車司機開咪話「下個站係總站，乘客請搭下一班車」。司機到站後就逐下架車，有人即刻問佢做乜要趕我地落車，佢話「我夠鐘收工啦，你地等十五分鐘就有下班車可以去市中心」。好波呀人權國家～～