18.08.2018 德國足總盃 第一圈 SV Elversberg - VfL Wolfsburg Waldstadion an der Kaiserlinde 賽果： 0:1 (0:0) 入場人數： 5321 （約 500 名作客球迷） 更多相片
由上季季尾贏得莎蘭地區盃賽冠軍獲得今季德國盃首圈參賽資格後，我地日夜期待抽籤一刻，希望可以抽中一個好對手。對我地黎講，好對手係指有我地中意既球迷同我地黎一個震撼教育，唔係拜仁果啲指會吸引一堆從來未入過球場既人然後黎同我地反客為主。更加唔想抽中鄰居凱莎羅頓或者商品隊之類。
過往 SVE 抽中過奧格斯堡、漢諾威之類既 ok 球隊，更加試過殺入第二圈先出局。三年後再次晉身德國盃首圈抽中左德甲既禾夫斯堡…… 球迷黎講一般啦，佢地既母公司鬧出醜聞之後隊波都跟埋一齊差，過去兩季都係好彩先護到級，但點講都好，大家都知實力上一定有差別，但得知抽中佢地之後都認為有一線生機可以偷到雞。
點知地區聯賽開季四場只得一分，以近況黎講真係唔認為可以偷雞。然後又收到消息狼堡既球迷組織有成員係比賽當日結婚，有機會要同兄弟慶祝唔得閒黎。不過佢地最後都以球隊為先，用最少 6 個鐘車程黎到鄉村小鎮支持自己隊波。
上季結束後，我地就已經計劃要準備一個 Choreo 係呢場波用，用黎慶祝球隊成立 111 週年！好簡單咁係看台前一大塊球隊全名 Sportverinigung Elversberg e.V. 然後由底下拉上去寫住 111 Jahre 既大布。C1 看台上既球迷就會一齊 fing 黑白旗同球會慶生！ 今次啲旗仔係由大家一手一腳親手整，買左幾卷黑白膠布，買一千枝膠棍，分哂組咁幾個人負責剪布，幾個人負責痴布，幾個人負責痴落碌棍度咁工廠式作業！球會今次亦幫左組織籌錢，季尾搞左個球迷同樂日，當日賣小食飲品既收入全部歸組織所有去準備今次既 Choreo！
花左大約兩個星期準備，最後係比賽日前終於趕工完成。地區聯賽週末平時兩點鐘開波，而德國盃就同德甲時間一樣，大部份都三點半先開波。開波前突然多左咁多時間感覺好奇怪！班男人朝早十一點就約埋一齊入球場準備一切，我就大約兩點先到球場。當日好曬好熱，我唔怕曬但我好怕熱…. 所以可以越遲去球場就越好！ 行去球場時見到唔少著住綠色衫既人，當時對面既球迷大部份都已經入左場。
作客球迷係看台前掛起主要既橫額，然後再有一大塊黑白色寫住 “Erstklassig seit 1997” 展示佢地自 1997 年就「穩居」頂級聯賽（唔知仲可以穩幾耐呢）。作客區旁既空位佢地掛起一塊大字報：「Zinnenwappen Symbol des VfL-Umbruchs」去抗議球會擅自更改會章設計。狼堡既會章係一個綠色 W 字，傳統以黎個 W 字頂係好似城堡圍牆咁，因為 “burg” 係德文就係解城堡。
關於狼堡既「特式」仲有一個傳說中既「狼手勢」，將中指、無名指同姆指指尖痴埋，然後豎起指同尾指，正面睇黎就好似一隻狼咁，然後大叫 good kick，係禾夫斯堡球迷專用既「暗號」…… 其實呢個係好耐之前德國有個節目 Circus HalliGalli 玩一個唔睇波既主持人 9up 左呢個手勢出黎要佢出醜，但自始之後就被觀眾拎黎笑。不過呢個 gag 已經唔再好笑，當日開波前我地都玩左一陣，如果你遇到真既狼堡球迷千奇唔好亂玩，我估佢地唔係好中意呢個 gag!
開波前大約十五分鐘，我地開始分派黑白旗比 C1 看台上既球迷，派完之後我地就走到落場邊準備影雙方球迷既表演！見到狼堡球迷手上揸住一舊綠色既野，我估佢地準備拋野上半空，果然佢地向球場掉綠色既彩帶同碎紙，仲有應該係用黎慶祝兄弟結婚既氣球！另一邊 SVE 就如計劃展示 choreo 慶祝球會 111 週年紀念！ 再擰轉頭就見到作客球迷舉起 „DFB, DFL & Co. – Ihr werdet von uns hören“ 大字報，頭頂蓋上綠白色既大布，即係準備要放 pyro!!! 佢地一直唱住反德國足總既歌，叫足總食屎，然後放綠白色既煙霧。
今場波要係球場搞 Choreo，事先一定要向足總申報 Choreo 內容，我地當然有申報啦，不過其實仲有一塊大字報無向足總申報，就係 Seitz raus！大家已經頂唔順個領隊，好想佢快啲走！
呢場波既時間過得超快，因為場上既節奏好快，一上一落，雙方都完全無係中場浪費時間，一有機會就推個波上去。 睇落我地真係唔似係低三級水平！！只係我地一直搵唔到機會埋門，同樣地對方都係攻極都攻唔入。 不過人地始終係頂級聯賽既球員，腳下功夫同埋球員既水平真係一眼就睇得出。隊友未傳波前，佢地已經會睇定兩邊有無自己友，當隊友傳波時，佢地可以唔洗望就一腳交波去隔離。呢啲聽落好似好簡單咁，關於呢一樣野係呢四場波我成日都鬧，SVE 球員下下都要個波上腳，推一兩下先再望下有無人接應，你望得黎人地都到啦！
賽前我有睇過陣容，但真心唔識禾夫斯堡既球員…… 近幾年睇波真係完全無留意過球員名，有時去現場睇波都係返到去睇下資料先知原來有我識既球員。聽講禾夫斯堡有個前多蒙特球員喎… 所有有唔少支持多狗既人都話好期待會下佢。
SVE 球員今場出盡哂力，有波就追，有位就攝，有力就跑，完全 chur 到對方無氣抖。可能知道自己唔夠班就一定要以勤力搭夠。如果佢地上兩場波都可以咁努力就好。 半場好極速就完左，睇下其他比賽既成績，見到鄰居比賀芬咸大炒真心笑左出黎，可能下季真係要同凱莎羅頓爭升班上丙組…
由於班球員個個都格外落力，我地唱歌打氣既動力都大大提高，仲有好多其他球迷都一齊幫手助陣！但對面完全無甲組球隊應有既氣勢…. 只可以話我地地區聯賽有幾隊波閒閒地都大聲過佢，就連早兩星期黎作客既 Worms 都唔差得過佢地囉！！！諗諗下，甲組球隊習慣左有看台上蓋幫佢地制造回音，唔洗出力都已經可以好大聲；但黎到鄉下既 up dup 球場照用返佢地先進球場既方式打氣既話完全係兩回事！（後來好多坐 vip 區既人都走黎同我地講下半場我地大聲過客隊好多！）
下半場開波，SVE 向住 Block C1 攻，氣勢有增無減！多次成功突破狼堡既防線，但同今季既問題一樣，永遠爭最後一腳… 或者就係爭一個球員係中間接應。突破到防線又點？推到個波落底線又點？送到個波入禁區又點？我地既前鋒次次都慢半拍又走唔岩位，好好彩咁起到腳時又唔知點解硬係有人擋住個波…. 唔係搵借口，但真係唔知點解可以咁唔好彩！！！！有段時間更加係禁住狼堡黎攻，球迷越黎越激動，我地仲成功呼喚到主看台既球迷一齊企起身拍手唱歌，全個球場進入最熱烈既一刻，個個企起身唱 “Steht auf für die SVE…” ，點知對方係呢個時黎個反高潮，一個傳中接應頂入。靜哂。
又係咁樣比個係禁區中間空哂接應，又犯同一個毛病。呢一球波真係一盤冷水咁淋落黎收我地皮，上季到而家既問題原來仲係度，人地一兩個機會就可以入到波，但我地死攻欄攻都送唔到個波入網。 不過我地仲未放棄，因為只要入到一球波就仲有機會。 球員同樣無放棄，繼續搶波向前攻。迫到客隊要玩拖延時間策略，對住地區聯賽都驚到咁！！！
好可惜，直到球證吹雞完場我地都追唔返。 無唔開心，只係覺得好唔抵。原先睇牌面真係預左出局，但球員既表現說服左我地，個個奮鬥到最後一刻，令我地覺得有機會出線。好耐無試過呢種唔服輸既感覺，就算輸都覺得我地唔應該食蛋！ 好多球迷完場後都留低為球員鼓掌，希望佢地可以 keep 住呢團火！
後來見到應屆冠軍法蘭克福出局，仲有其他球隊比人大炒，即刻覺得我地都未算慘。
每隊低組別既球隊都唱住同一首歌「某日我地會現身國際舞台… ohhhoo..」，所以呢個足總盃係好多低組別球迷既夢想，我地成日都話只要贏五場波就可以踢歐霸晉身國際賽。今年既夢已經完結，來緊我地要係莎蘭盃再次加油，贏得下季德國盃參賽資格！同時希望有其他低組別既球隊可以獨當一面爭一口氣！